سەلاحەدین ئەیووبی ل دەسپێکا ساڵێن حەفتێیان ژ چەرخێ دوازدێ زایینی، دەولەتەکا پان و بەرین دامەزراند و شیا کوردستان، شام، مسر، حیجاز و یەمەنێ بکەتە دناڤ سنوورێن وێدا. پاشی کور و برایێن خوە کرنە مەلكێن وان هەرێمان. سەلاحەدینی بۆ دامەزراندن، فرەهکرن و بهێزکرنا ڤێ دەولەتێ، چەندین ساڵان ل سەر چەندین ئاراستەیان کار، شەڕ و بەرەڤانی کرن؛ ل سەر ئاستێ ناڤخوەیا دەولەتا عەباسی و جیهانا ئیسلامی میر و مەلکێن نەحەز ژ رێکا خوە لادان و هەبوونا خوە وەك (سوڵتان) سەپاند. دهەمان دەمدا ل سەر ئاستێ دەرەکی ژی بەرسینگێ مەزنترین ئیمپراتۆرێن جیهانا وی سەردەمی (ئینگلتەرا، فەرەنسا و ئەڵمانیا) و جیهانا مەسیحی گرت و سنوورەك بۆ بزاڤێن وان دانا.
سەلاحەدین ئەیووبی تنێ دبیست ساڵاندا بوو بهێزترین مەلك و خودان بهێزترین دەولەتا جیهانێ. لێ تنێ چەند رۆژان پشتی وەفاتا وی، کوڕ و برایێن وی کەتنە شەڕێ هەڤدوو و بوو دەسپێکا دوماهییا وێ دەولەتا سەلاحەدینی ب خوین و خوهێ ئاڤاکری. هەڵبەت “دبیت” ئەگەر رێبازا سەلاحەدین هاتبا پەیرەوکرن، نوکە ژی پاشمایێن وێ دەولەتێ مابان و ئەمژی “وەك کورد” تووشی گەلەك تراژیدیایان نەبباین. وەك پتریا دەولەتێن دنیایێ کو پشتی مرنا دامەزرێنەران، شوونگران بەردەوامی دایە رێبازێن وان و د ئەنجامدا ئەو دەولەتە ب شێوەیەکی ژ شێوەیان ماینە. لێ دیارە ئەڤ کولتوورە دناڤ کوردان دا ناهێتە ڤەگوهاستن. لەوما هەر سەرکردەیەکێ کۆچدکەت، رێبازا ویژی دگەل وی ڤەدمریت. پاشی شۆڕەش، دەسەڵات و دەولەتا وی ژی ب داوی دهێت.
