ئه‌ڤرۆ جوانیا پتریا دێمان جوانیا نیشتەر‌گه‌ری و مێك ئاپێنه. هزرێن پتریا مرۆڤان هزرێن ده‌ستكردن. لڤین و ره‌فتارێن وان لڤینێن كه‌سێن دینه. كاركرن و ده‌ستكه‌فتێن وان ژ بۆ و ژبه‌ر كه‌سێن دینه. مرۆڤێ ڤی سه‌رده‌می هه‌ر كه‌سه بتنێ ئه‌و بخۆ بخۆ نینه. ل چاخێ به‌رزه‌بوونێ دا، هه‌می تێگه‌هـ بژاله‌بووینه و هه‌می پره‌نسیپ هاتینه پشتگوهكرن. شاشيا و كه‌سێن شاش پێگه‌هه‌كێ هه‌ر مه‌زن ژ بو خۆ ئاڤاكریه. ئه‌ڤرۆ هه‌ر كه‌سێ به‌ریكێن من ژ دره‌وا پربكه‌ت یێ خۆشتڤیه و ل گۆبیتكا هه‌ر جهییه. هه‌ر كه‌سێ راستی و شاشیان بده‌ته دیاركرن ژ كه‌سێن شاش دهێته هژمارتن. لێدانا دهۆلێ جهێ ده‌ستخۆشیێ یه و به‌لاڤه‌كرنا هزرێن تۆره‌هات جهێ شانازیێ یه و ره‌خنه‌گرتن ل ڤان جۆره كه‌س و كاران دبیته جهێ توندره‌ویێ.
ل چاخێ خۆ ونداكرنێ دا ئه‌ڤرۆ دره‌و بوویه خوێ یا ناڤ هه‌می گراران و دره‌وین بووینە ئاغايێن هه‌می دیوانان. دره‌و ئه‌و ره‌هندا زێده كرێت بوویه سه‌روه‌ر و رێبه‌رێ رۆژانێن مه تا وی راده‌ی دره‌وین دره‌وێن خۆ وه‌كی راستیا دبینین و خۆ وه‌كو راستگۆیان دده‌نه دیاركرن. هه‌كه لدویڤ ئه‌گه‌رێن ڤێ بوویه‌را ترسناك بگه‌رین دبینن ئه‌گه‌رێ هه‌ره سه‌ره‌كی په‌روه‌رده و ژیواره‌كێ شاش بووینه. ژیواره‌كێ پر ژ توندی و خه‌مۆكی و خۆخاپاندن و رازیكرنا كه‌سێن ده‌وروبه‌ر و ژده‌ستدانا هه‌بوونا تاكی ل ژێر ناڤێ گه‌له‌ك زاراڤێن فێك؛ وه‌كو رێزگرتن و شه‌رم و ترس، بێ كو تێگه‌هشتنه‌كا درست ژ بۆ وان هه‌بیت. ئه‌و رێزگرتنا ژ شه‌رمێ دایك دبیت و ئه‌و شه‌رما ژ ترسێ بووی، بوویه ئه‌گه‌ر تاكێ ڤی سه‌رده‌می هه‌بوونا خۆ ژ ده‌ست بده‌ت و چ رێز ده‌ستپێكێ ژ بۆ بوونا خۆ نه‌بیت وه‌كو بونه‌وه‌‌ره‌كێ خودان كێم و كاسی و ڤه‌شارتن و بنپێكرنا ڤان كێماسیا برێیا گوهۆرینا سیمایێ ده‌رڤه و برێیا بده‌ستڤه‌ئینان ده‌ستكه‌فتا ب هه‌ر شێوه‌یه‌كێ هه‌بیت چ برێیا بكارئینان بیت چ كرین و فروتن بیت و چ ونداكرنا پره‌نسیبا بیت و چ ژ ده‌ستدانا كه‌سایه‌تیا تاكی بیت. ئه‌ڤ كارێن هه‌ژی هه‌می ل ژێر سیبه‌را دره‌وێ خۆ جوان و چالاك دبینن. به‌لێ ئه‌ڤرۆ ده‌مێ ئه‌م به‌ر خۆدیكێ دراستین ئه‌م چاڤێن هه‌ر كه‌سی دبینین لێ بتنێ یێن خۆ نه دفنه‌كا جوان و دوو لێڤن جوان دبینن وه‌كو یێن هه‌ر كه‌سی. لێ بتنێ نه‌وه‌كی یێن مه‌نه ره‌هندێن مه ره‌هندێن هه‌میانه لێ نزا ئه‌ڤ هه‌میه چه‌ند درستن و چه‌ند دراستگۆنه دگه‌ل خۆ و كه‌سێن دی. ره‌فتارێن مه بریارێن مه ئاوازێن موزیك ژه‌نێن دینه لێ بتنێ نه‌یێن مه نه. ئه‌ڤرۆ ده‌مێ به‌رێ خۆددەینه خۆدیتا ژیوارێ خۆ دره‌و ل خۆ و كه‌سێن دی مه‌زنترین ده‌ستكه‌فتێ تاكی و سیاسه‌تمه‌دارێ رۆژهه‌لاتیه. ئه‌و تاكێن قاتێن ره‌ند ل به‌ر خۆدكه‌ن و په‌یامێن سه‌رنج راكێش به‌لاڤه‌دكه‌ن لێ كریارێن دویری په‌یاما ئه‌نجام دده‌ن.
- (گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)