موزیكژه‌نێ سویسری (ئیرنست لیڤی) دبێژیت: “مرۆڤایه‌تی دێ باشترلێهێت، هه‌كه ئه‌م هونه‌ری بشێوه‌یه‌كێ جدی وه‌ربگرین وه‌كو چه‌وا ئه‌م كیمیایێ و پارا وه‌كو تشته‌كێ گرنگ دبینین”. هونه‌ر زاراڤه‌كێ ساده‌یه لده‌مێ بدیتنه‌كا ساده نێرینێ ژبۆ دكه‌ین، لێ یێ پڕه ژ گرێیێن مرۆڤایه‌تی هه‌كه بچاڤه‌كێ هشیار ته‌ماشه‌ی تێگه‌هێن وی بكه‌ین، بۆ؟ چنكۆ هونه‌ر وێنه‌كه ژ وێنێن پێگه‌هشتن و هشیاربوونا مرۆڤایه‌تی، برێیا ڤێ پێگه‌هشتنێ ده‌ربڕین ژ هه‌بوونێ ب هه‌می وێنێن وێ ڤه دهێته‌كرن، ده‌ربرینن هونه‌ری ژی جورێن خۆ هه‌نه وه‌كو شانۆ، سینه‌ما، دراما، موزیك، وێنه‌كێشان، سه‌ما، نڤێسین… بابه‌تێ مه دێ ل سه‌ر هونه‌رێ كۆمیدیایێ بیت، ئه‌ڤێ بۆ جارا ئێكێ ل یونانێ هاتیه ئاڤابوونێ ب جۆرێن خۆیێن كلاسیك، ترانه‌پێكرن، خه‌له‌تی، ڕه‌وشت، پرۆپاگه‌نده… ژ ئه‌كته‌رێن وی “تشارلی شاپلن” ژ نڤیسه‌رێن وی شكسپیر…
دبینم ئه‌ڤ هونه‌رێ جوان یێ دهێته كرێتكرن و ده‌ستكاریه‌كا بێ رامان تێدا یا دهێته‌كرن. هه‌ر كه‌سێ رابوو خۆ وه‌كو ئه‌كته‌ره‌كێ كۆمیدی دا دیاركرن. ئه‌ڤرۆ لده‌مێ ته‌ماشه‌ی سۆشیال میدیا عه‌ره‌بی و كوردی دكه‌ین دێ بینین یا پره ژ ژنێن بده‌رسووكێن نڤێژا. لێ ئه‌ڤ ژنه بریهـ و سمبێلن. پتریا گه‌نجێن عه‌ره‌بی و كوردی بووینه ژن و بده‌ورێ ژنێ رادبن و وێنێ ژنێ چ ده‌یك و چ كچ و چ بیك و خه‌سی ژبۆ جیهانێ دده‌نه دیاركرن. ئه‌رێ هونه‌رێ كۆمیدیایێ ئه‌ڤه‌یه و ئه‌ڤه بتنێ یه؟! و ئه‌رێ هه‌ما هه‌رده‌ما من ده‌رسووك كرێ خلاس ئه‌ز بوومه ئه‌كته‌ره‌كێ كۆمیدی؟؟ به‌رسڤ نه‌خێر هونه‌رێ كۆمیدیایێ ژی په‌یامه ژبلی خۆشیێ و په‌یامه‌كێ دگه‌هینیت و ئه‌ڤ په‌یامه ژی دڤێت هنده‌ك ئاریشا به‌رچاڤ بكه‌ت و جارا چاره‌سه‌ر بكه‌ت. چ برێیا رۆمانێ، چیرۆكێ، هۆزانێ، یان برێیا وێنه‌كێشانا كاریكاتێرا یان برێیا شانۆ و درامایێ. دڤێت راوه‌ستیانه‌ك دگه‌ل ڤی بابه‌تی ژی بهێته‌كرن و به‌سه وێنێ ژنێ برێیا ڤی هونه‌رێ زێده بتام بهێته كرێتكرن، (بابلۆ بیكاسۆ) دبێژیت: “فێری قائیده‌یان ببه وه‌كو بسپۆرا دا ته شیانێن شكاندنا وان هه‌بن وه‌كو هونه‌رمه‌ندا. ئانكو دڤێت گه‌نجێ مه پتر خه‌مێ ژ حه‌زێن خۆ بخۆن و پتر كاری ل سه‌ر هزر و برێڤه‌برنا خۆ بكه‌ن. ئه‌كته‌ری نه بتنێ هنده‌ك گۆتنێن كولانینه. به‌ری ئه‌كته‌ری ژ دایك ببیت دڤێت هزر و چیرۆكه‌ك هه‌بیت كاودانێن وێ ئاریشێن جۆره و جۆرێن جڤاكی دیاربكه‌ت وه‌كو یێن سیاسی ئابووری و جڤاكی. ئازارێن خه‌لكی ب قالبێ كۆمیدیایه‌كا پاقژ به‌رچاڤ بكه‌ت. دبینم هه‌كه هه‌ر ره‌گه‌زه‌ك ته‌مسیلا ره‌گه‌زێ خۆ بكه‌ت دێ پتر ده‌ورێ خۆ ئینیت. هه‌روه‌سا هاتیه گۆتن: “ره‌خنه كاره‌كێ بساناهیه لێ هونه‌ر یێ ب زه‌حمه‌ته” كرنا ده‌رسووكێ یا بساناهیه، لێ گه‌هاندنێ په‌یامێ بشێوه‌یه‌كێ گونجای گه‌له‌ك یا ب زه‌حمه‌تە.
- (گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)