پارێزگەها دهۆکێ پتر تووشی ئالۆزیان دبیت. ژبەرکو دابەشکرنا داهات و پرۆژیێن وەبەرهێنانێ نەهەڤسەنگە. زێدەباری کارتێکرنا پەنابەر و ئاوارەیان و رەوشا ئێمناهیێ. ئەڤ چەندە بیرا مە ل ئاخفتنا ئەندامەکێ کۆچکریێ سەرکردایەتیا پارتی دیموکراتی کوردستان دئینیت، دەما گۆتی: “پارتی دبێژیت؛ هەولێر سیارە و دهۆك پەیایە. لەوما گرنگە ئەم هەولێرێ بگرین.” ل ڤێرە ئەگەر بەحسا دابەشکرنا داهاتان بکەین، دێ بینین کو دەسەڵاتداران “پارتی” کێمترین رێژەیا فەرمانبەر و مووچەخۆران دایە دهۆکێ کو ل گۆر داخۆیانیێن وان دبیتە دۆرێن 10٪. ددەمەکیدا رێژەیا خەلکێ پارێزگەهێ دگەهیتە دۆرێن 25٪ ژ روونشتڤانێن هەرێمێ. هەروەسا ئاستێ پشتەڤانیا دارایی و وەبەرهێنانێ ژی کێمترە. ڤێ ژی کارتێکرنەکا نەرێنی کریە سەر ئابوورێ دهۆکێ و زێدەکرنا هەژاریێ.
هەڵبەت تێکچوونا ئارامیا سنووران ژی کارکرن و وەبەرهێنان ل وان دەڤەران نەهێلاینە. هەروەسا هاتنا پەنابەر و ئاوارەیان ژی، گڤاشتنەکا تایبەت کریە سەر جڤاکی دکێمکرنا دەلیڤە و کریا کاریدا. هەرچەندە دبیت هندەك دەسەڵاتداران “پارتی”، ئەڤ رەوش و مانا ئاوارەیان پێ باش بیت. لێ ئەگەر تەماشەی دەرئەنجامان بکەین، دی بینین کو پارتی نەبوویە یەکەما بێرکابەر ل باژێرێ هەولێرێ. هەروەسا رێژەیا دەنگێن پێویست ژ ئاوارەیان ژی وەرناگریت. دبەرامبەردا دەنگێن دهۆکیان ژدەست ددەت. لەوما گرنگە چاڤخشاندنەکێ ددابەشکرنا داهاتێن دارایی و پرۆژەیاندا بکەت و پشکا دهۆکێ بزڤرینیت. دگەل ئاساییکرنا رەوشا سنووران و ڤەگەراندنا باوەریێ. زێدەباری داخازکرنا هاریکاریێن پتر ژ لایەنێن نێڤدەولەتی بۆ دابینکرنا پێداویستیێن پەنابەر و ئاوارەیان و سڤککرنا بارێ کارگێریا پارێزگەها دهۆکێ و خەلکێ وێ.
• خودان و سەرنڤیسکارێ (رۆژئارتیکڵ)
