بەڵاڤبوون، مشەبوون و بەرفرەهبوونا پێگەهێن پەیوەندیێن جڤاکی و ئامرازێن پەیوەندیکرن، بەڵاڤکرن، راگەهاندن و میدیایێ هاریکاربوونە کو تاكێ ڤی وەڵاتی پتر زانیارییان ل سەر رەوشا خوە، جڤاك و وەڵاتی پەیدابکەت. هەرچەندە دبیت هندەك ژ وان زانیارییان دشاش، بەرەڤاژی و کێم ژی بن و بۆ مەبەستێن جودا هاتبنە بەڵاڤکرن. لێ دئەنجامدا ئەم دبینین کو کاریگەری ل سەر خەلکی کرییە و ب شێوەیەکی ژ شێوەیان ئاستێ هشیارییا وان ژی بلندتربوویە. ئێدی ل سەر هەمی بابەت و مژاران بۆچوونێن خوە دەردبڕن و رەخنێ دگرن. هندەك کەس و لایەن ژی ڤێ یەکێ وەك دوورکەتن ژ هزرا نەتەوی نیشان ددەن. لێ ئەم دبینین ئەڤە پتر دوورکەتنە ژ کەس و پارتییان.
ژبەرکو نوکە ژی دەما کوردەك ل هەر جهەکێ جیهانێ کارەكی دکەت یان تووشی بەڵایەکێ دبیت، سۆزا خەلکی ل هەمی پارچەیێن کوردستانێ رادکێشیت. ئەڤە ژی نیشانە کو هزرا نەتەوی یا زیندییە و ب باوەرییا مە هندی ئەم دبێ دەولەت بین دێ هەر ل پێش بیت. هەروەسا هەلگرێ ڤێ هزرێ ژی دێ پترین لایەنگر هەبن. باشترین بەڵگە ژی پارتی دیموکراتی کوردستانە، کو ژبەر پەیاما “نەتەوی” ل پێشییا پارتیێن کوردستانییە. بەروڤاژی ڤێ ژی، مە دیت ڤێ پارتیێ دهەلبژارتنێن ساڵێن دەربازبووییدا رێژەیەکا دەنگان ژدەستدان، ئەڤە ژی پشتی هندەك سەرکردەیێن وێ ژ پەیاما نەتەوی داکەتینە خارێ و هەڤڕکییا هندەك لایەنان کری ل سەر بابەتێن وەك عیراقچیتیێ، دئەنجامدا ئەوژی داکەت وەکی پتریا پارتیێن ژ پەیاما نەتەوی دوورکەتین.
- خودان و سەرنڤیسکارێ (رۆژئارتیکڵ)