وەڵاتێ مە پڕە ژ سازیێن میدیایی و یاسایەك ژی هەیە بۆ رێکخستنا کارێ رۆژنامەڤانی. هەروەسا سازیێن جڤاکا سڤیل ژی هەنە و هاوڵاتی مافێ خوەپیشاندانا مۆلەتدار ژی هەیە. لێ هندەك راپۆرتێن نێڤدەولەتی بەحسا هەبوونا ئاستەنگان دکەن ل ڤی وەڵاتی و رۆژنامەڤان ل گۆر یاسایێن دی دهێنە دادگەهکرن. هندەك جاران ژی رۆژنامەڤان ب خوە، ژ ترسا دەسەڵاتداران، سانسۆرێ ددانە سەر خوە. ئەڤە ژی گۆمانێ دروست دکەت ل سەر هەبوونا ئازادییان ل دەڤەرێ. لەوما گەلەك جاران ئەڤ پرسیارە دهێتە کرن؛ ئایا ئازادییا دەربڕینێ ل وەڵاتێ مە هەیە؟! ل ڤێرە ئەم دێ رۆناهییەکا کورت بەردەینە سەر رەوشا وەڵاتی ژلایێ سەروەریێڤە، دا هەڵسەنگاندنەکا واقعی و بەرسڤەکا “زانستی” وەربگرین.
ئاشکرایە کو وەڵاتێ مە ژلایێ نەیارانڤە دۆرپێچکریە و ب گەف و گڤاشێن ئابووری، سیاسی، جڤاکی، ئەمنی و کولتوری، مایتێکرن و کارتێکرنێ ل بچووکترین کارێن جڤاکی دکەن، تا دگەهیتە دروستکرنا کابینەیێن حکوومەتێ. ڤێژی یەکرێزی تێکدایە و نەهێلایە سازیێن بنگەهینێن وەكی (دەستوری) دروست ببن دا ئازادی، ماف و دەسەڵاتان دیاربکەت و ببەخشیت. واتە وەڵاتی ئازادی نینە (یێ تشتەك نەبیت نەشێت ببەخشیت!). دەرئەنجام دەسەڵاتدار ژی نەشێن ئازادییا دەربڕینێ بدەن. لەوما ئەڤا هەیی ئەم دشێین بێژینێ “رێپێدانا دەربڕینێ”. بنگەهێ رێپێدانێ ژی دەمکی و سنووردارە و کێمەك مفادارن. بۆ نموونە ئەگەر رۆژنامەڤانەکی پشت هەبیت (جڤاکی و سیاسی)، واتە رێپێدان هەیە و دشێت دچارچۆڤەکیدا بنڤیسیت و یێ نەبیت ئاستەنگان دبینیت. ئەڤجا تا وەڵات ئازاد نەبیت، ئازادی نابن.
• خودان و سەرنڤیسکارێ (رۆژئارتیکڵ).