رەمەزان هەیڤا خێر و باشی و خوەپاقژکرنێ یە. بەلێ گەلەك کەس ڤێ بۆ خوە ب دەلیڤە دبینن و بۆ مەرەمێن خوە یێن تایبەت ب کاردئینن. هندەك کەس خوە وەك کەسێن ئاینی و ئۆلدار دەردێخن و ریهێن خوە درێژدکەن و بەرسڤا پرسیارێن دینی ددەن و دبەررا ژی “تامساریان” دکەن، ب تنێ دا ئەکتیڤا ئەکاونتێ خوە پێ زێدەکەن. هندەك کەنال هندەك بەرنامەیێن دویر ژ هەیڤا رەمەزانێ دروست دکەن و تێدا یاریێن کرێت و ترانا دکەن، هندەکان ژی دەرفەت یا دیتی ئامیرێن میوزیکێ ببنە مزگەفتان بژەنن و سترانا بێژن ب بەهانەیا سترانێن دینی! ددەمەکیدا کو مزگەفت نە جهێ سترانانە؟! هندەك ژی کو خوە وەك خێرخاز نیشانددەن، هندی بەحسا کارێن خوە دکەن و بەلاڤ دکەن، خێزانێن هەژار ل شەرمێ ددەن. هەرچەندە ئایین دبێژیت بلا خێرا تە دناڤ بەرا تە و خودێ دا بیت.
هەڵبەت هندەك کەس هەنە کارێن خوە یێن خێرخازی بەلاڤ دکەن دا هندەکێن دی چاڤ لێ بکەن. ئەڤان ئنیەتا وان یا درستە و ددیارن و ئەو کەسێن بۆ خوەدەرێخستن و مەلاقیێ ژی ڤان کاران دکەن ئەو ژی د دیار و ئاشکرانە. هندەك کەس ژی ریکلامێ بۆ کافێ و چایخانێن خوە دکەت بۆ شەڤێن رەمەزانێ و د ژوورڤە دەمێ خوە ب قۆمارێ ڤە دبوورینن. ئەڤە ژی ڤێ هەیڤێ ب دەلیڤە دزانن، ئەگەرنە دشیان بەری رەمەزانێ ریکلامێ بۆ خوە بکەن! ژلایەکی دیڤە هندەك “ستێرێن” سۆشیال میدیایێ ژی هەتا بەری فتارێ ستۆریێن وان هەمی ب دەرسووکێ نە و پشتی فتارێ دەرسووکێ د ئێخن. دیارە ئەڤە ژی هزردکەن کو پشتی فتارێ رەمەزان خلاس دبیت و نزانن کو رەمەزان هەیڤان خوەپاقژکرنێ یە نەیا خوەدەرێخستنێ یە.
- (گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)
