هندەك ژ کەسوکارێن شەهید، پێشمەرگە و قوربانیێن کوردستانێ پۆست وەرگرتینە، هندەك سوودمەندبوونە ژ پرۆژەیێن جودا، هندەك ژی بوونە خودان کۆمپانی و هندەك ژی … هتد. دبیت ئەگەر ئەم دیکۆمێنت و راپۆرتێن دارایی یێن پتری سیهـ ساڵان کۆنترۆڵ بکەین دێ بینین کو ب ملیاران دۆلار بۆ خزمەتکرنا ڤێ تەخا جڤاکی هاتینە خەرجکرن. لێ دبەرامبەردا ژی هندەك جاران مە گوهلێدبیت یان ئەم دخوینین و دبینین کەسوکارێن قوربانییان گازندەیێ ژ دەسەڵات، پارت و لایەنێن جودا دکەن و دبێژن قوربانیێن وان هاتینە ژبیرکرن و وەك پێویست خزمەتا وان نەهاتییە کرن! ئەڤ گازندە ژی دبیتە جهێ پرسیارێ؛ گەلۆ چاوا پارەیێن مەزن بۆ خزمەتکرنێ هاتینە خەرجکرن و خزمەت نەهاتییە کرن؟!
بەرسڤا ڤێ پرسیارێ ئەوە کو گەلەك ژ وان پارە، پۆست، پرۆژە و خزمەتگۆزارییان بۆ تاکان بووینە. بۆ نموونە؛ برایێ شەهیدەکی هەڤال ل جهێن بلند هەنە شیایە پۆستەکی بدەستخوەڤە بینیت، کورێ ئەنفالکرییەکی برادەرەك هەیە ل سەرۆکاتیێ پرۆژەیەکی ب ناڤێ ئەنفالکرییان وەرگرتییە، کچە پێشمەرگەیەکی ناسیارەك ل دارایی هەیە پارە وەرگرتییە و کۆمپانییەك دروستکرییە. یێن مایی ژی پتریا وان مووچەیەکێ کێم وەردگرن و تەنانەت هندەك کەسوکارێن قوربانییان مووچە ژی ب واستە و بەرتیل چێکرینە. واتە ب کورتی پلانەك نەبوویە دا کارەکێ رێکخستی بهێتە کرن. لەوما دادوەری ژی نەبوویە. هەڵبەت چارەسەری ئەوە پلانەك بهێتە دانان و پارە خەرجکرن بهێتە رێکخستن. لێ ئەزموونا دەربازبوویی دبێژیت؛ پلان نابیت و خەرجکرن ژی ناهێتە رێکخستن! دبیت ئەم دشاش بین!