هوین نەزێرن و خەلک زیڤە، ئەڤ دیتنا بلند ئەوا هوین خۆ پێ دبینن و خەلکى نزم پێ دبینن ژبیربکەن. چونکو دیتنەکا ل ئاست نینە. هەر لایەنەک بیت دێ بێژیت، ئەگەر ئەم نەباین نوکە هەرێما کوردستانێ و کورد نەبوون. دەمێ کەسێن ئازاد و بێ لایەن بێژن دیتنا مە بۆ هەرێما کوردستانێ جێوازە لگەل دیتنا هەوە، هوین دێ بێژنە وان جاش یان کەڤنە بەعسى یان تیرۆرست یان هەر تشتەکێ نەباش و هوین تنێ دباشن. نزانم ئەو لایەن بۆچى خۆ د دانن خودان ئاقل و روشەنبیر و تێگەهشى کو هزر دکەن ئەو کەسێن دگەل وان نەبن بێ ئاقلن و تێناگەهن و نە هەژى وێ چەندێنە مافێ دەربڕینێ هەبیت. باوەربکە هەر هەوە دەستێن خۆ یێن کرینە د دەستێن ئیرانێ و تورکى و سعودیێدا و خەلکى ب جاشاتى ددەنە نیاسین. نێ هەر وى خەلکى ل ساڵا (1991) سەرهلدان ل سەر رژێما بەعس کریە و دگەل هەبوونا هێزێن ئەمریکى ل عیراقێ ئەڤڕۆ هوین برینە سەر حوکمى ژبۆ پاشەرۆژەکا گەش. ب مخابنیڤە بەروڤاژى وێ چەندێ دروست بوو.
د مێژوویا عیراقێدا کوردستان بێ هێزو و قەردار نەبوویە. لێ ڵاوازیا هەوە د حکوومەتێدا و ل سەر دەستێن هەوە کوردستان نیزیکێ (30) ملیار دۆلاران قەردار بوویە و سەدەم و نیشانێن وێ قەردایێ دیار نینن و بوویە سەدەمێ تێکدانا ژیارا خەلکى! سەرەراى ڤێ چەندێ هوین خەلکى ب نەزانین د دەنە نیاسین دەمێ داخازا شایستەیێن خۆ دکەت و هوین زانانە؟ ژ سەدەمێ هەوە خەلک یێ د رەڤیت بەرڤ وەڵاتێن بیانى دچیت. چونکو هوین وان بێ ئاست و بوها د دانن. دڤێت هەموو لایەنێن حوکمدار تێبگەهن، کوردستان یا هەوە ب تنێ نینە هوین حوکمى ل سەر بکاردئینن و تنێ خەلک یێ تێدا دژیت. ئەو دەمێ حکوومەت هزرا باش بۆ خەلکى بکەت وى دەمى ئازادیە. لێ بەروڤاژى ڤێ چەندێ دکتاتۆریەتە. هەروەسا دڤێت خەلک ژى نەهێتە خاپاندن ب درۆشمێن نەتەوەیى یێن وان لایەنان. چونکو ئەو لایەن دگەل هەڤدوو ب درۆشمەکى د ئاخڤن و دگەل خەلکى ب درۆشمەکێ دیتر. ئەڤجا بزانن ئەڤ خەلکە بناغەیا حوکمێ هەوەیە و ئەگەر ئەڤ بناغەیە نەما واتە هوین نامینن.