سپێدەکێ دگەل خزمەکی چووین مارکێتا وی ڤەکەین. کابرایەكێ سەرخوەش ل بەر دەرگەهی راوەستیابوو. گازندە کرن و گۆتی هوون (15) خوولەکان گیروبوون “وە نڤیسییە بازار دەمژمێر (09:00- 23:00) ڤەکرییە. یان نڤیسینێ بگوهڕن یان پێگیربن یانژی دێ تەلەفۆنا پۆلیسان کەم!”. خزمی ژی داخازا لێبوورینێ کر و سۆزدا گیرونەبیتەڤە. هەمان ساڵ خزمەکی ئۆتۆمبێلەك ژ کۆمپانیایەکێ کرێکر و دەما زڤراندی، گۆتنێ تۆ چەند خوولەکان گیروبووی و دڤێت بوهایێ وێژی بدەی. خزمۆ ژی مستا خوە بلندکرە ناڤچاڤێن کارمەندی و ب تۆڕەییڤە گۆتێ: “ئەم گیرونەبووینە، وە ئەم ڤەهێلاین دا پارێ زێدەتر وەربگرن.” پاشی گۆتی “ئاخ چ ل یاسایێ بکەم؟!”. کارمەندی ژی دگۆتێ کەرەمکە دربێ خوە بوەشینە دا تەلەفۆنا پۆلیسان بکەین!
ئەڤ هەردوو بوویەرێن وەڵاتەکێ پێشکەفتی بوون کو گەلەك تشت ددەستێن کەرتێ تایبەتدا نە. لێ ژبەرکو یاسا سەروەر و بهێزترینە، لەوما کابرایێ سەرخوەش (خەلك) و کارمەندێ کۆمپانیێ (کەرتێ تایبەت) پشتگەرمێن پۆلیسان (جێبەجێکەرێ یاسایێ) بوون بۆ پاراستنا مافان. واتە حکوومەت ل هنداڤە، چاڤدێریا چالاکیێن هاوڵاتیێ هەژار و دەوڵەمەندترین کۆمپانیا ژی دکەت. ل وەڵاتێ مە ژی کو یاسا لاوازترینە، دخازن کەرتێ گشتی بکەنە تایبەت. ئەڤە ژی مەترسیدارترینە و تالانکرنا ملکێ گشتییە. ژبەرکو هندەك کەس و کۆمپانی ژ یاسایێ بهێزترن و ب ئاشکرا دزیێن حکوومەت و خەلکی دکەن. دەرئەنجام ژی قەرزێن حکوومەتێ زێدەدبن کو ئەڤرۆ سەرۆکوەزیران ژی ئاماژە دایێ. لەوما پێویستە گەل دژی تایبەتیکرنێ راوەستیت، تا وێ رۆژا یاسا دبیتە بهێزترین و (ب راستی) سەروەربیت.