دادگەھا ھەولێرێ ل ھەرێما كوردستانا عیراقێ ل بەرواری (20\7\2023) بڕیارەك دەركر بۆ رۆژنامەڤان (شێروان شێروانی) ب زیندانكرنا وی بۆ ماوەیێ چار ساڵێن دیتر لدووڤ مادەیێن قانوونی (280\298) ژ دەستوورێ عیراقێ. دەستھەڵاتا حزبی و ھۆزەكی یا ھەرێما كوردستانێ نەڤێت دەستوورەك ھەبیت بەڕەڤانیێ ژ ماف و ئازادیێن وەڵاتیان بكەت دەمێ دەربڕینێ ژ ماف و ئازادیێن وان یێن قانوونی و مرۆڤایەتی، سەرەڕایی كو ددەستوورێ عیراقێدا قانوونێن عیراقێ ھەنە بەرگریێ ژ ماف و ئازادیێن وەڵاتیان دكەن. لێ دەستھەڵاتا حكوومەتا عیراقێ ل ھەرێما كوردستانێ نینە، ڤێجا حكوومەتا ھۆزەكی ب عەقلەكێ پۆلیسیێ ھشك دان ب ماف و ئازادیێن وەڵاتیان ناكەت و رادبیت قانوونێن عیراقی بكاردئینیت ب شێوەیەكێ پارچەكری و نەتەمام ل دووڤ ھزر و بۆچوونێن وی كەسێ حكوومەتێ برێڤەدبەت.
دەستھەڵاتا پۆلیسی، قانوونێ ل ھەرێمێ بكاردئینیت ژبۆ بەرگریێ ژ گڤاشتنێن حزبی بكەت و وان فەرمانان دەربئێخیت كو بگونجن دگەل بەرژەوەندیا دەستھەڵاتداریێ. ڤێجا حوكمكرنا رۆژنامەڤان (شیروان شیروانی) بڕیارەكا نە قانوونییە. ئانكو بڕیارا ھۆزەكا حزبی و سیاسی و پۆلیسییە. لدووڤ ڤان جۆرە بڕیاران چێدبیت ھەر رۆژنامەڤانەك یان چالاكڤانەك بھێتە حوكمكرن بێی قانوون. چونكو ھندەك دەزگا ھەنە كاردكەن بۆ بەرژەوەندیا كەسێ پۆلیسی بۆ دەستەسەركرنا ھەر كەسەكێ دەربڕینێ ژ بۆچوونا خۆ بكەت. وەك روودای بۆ چالاكڤان (ئۆمید بەرۆشكی) ئەوێ داخویانییەك دای ل رۆژا حوكمێ رۆژنامەڤان (شیراوان شیروانی) دەرچووی كو ھاتبوو گرتن ژلایێ ھندەك دەزگەیانڤە و پاش ھاتە بەردان. ئەڤ چەندە ژی ھندێ دگەھینیت كو رۆژنامەڤان دھێنە گرتن و قوتان و بەردان لدووڤ بڕیارا كەسی.
بڕیارێن ھۆزەكا پۆلیسیا دەستھەڵاتدار، رۆژنامەڤان و چالاكڤانان بێدەنگ ناكەن. چونكو ئەو یێن داخازا ئازادیێ و یەكسانیێ دكەن.
ل دوماھیێ، داخازێ ژ جڤاكێ نیڤدەولەتی و رێكخراوێن مرۆڤایەتی دكەم ئازادیا دەربڕینێ بپارێزن ل ھەرێما كوردستانێ.
- رێڤەبەرێ نڤیسینێ
