بەری دوو ساڵان ئەگەر کەسەك ب شەڤ ژ زاخۆ تا سەر زێیێ مەزن چووبا، دا چەند رۆناهیێن کێم ل سنووران بینیت. نوکە رۆناهی وەکی زنجیرەیەکا پێکڤە گرێدایینە. هەمی خالێن سەربازیێن تورکینە ل سەر سنووری هاتینە زێدەکرن. ئەڤ هێڕشا تازە یا تورکی ژی بۆ سەر باشوورێ کوردستانێ نەتشتەکێ ژنشکاڤەیە. بەلکو پلانە و قۆناخ ب قۆناخ جێبەجێدکەت. ژخوە تورکیا بەردەوام بەحس دکەت کو ویلایەتا مووسڵ (باشوورێ کوردستانێ) ملکێ وێیە و دێ زڤرینیت. نوکە ژی دەرفەتا گونجایە کو پێنگاڤەکا دی باڤێژیت؛ عیراقێ حکوومەتەکا دەمکی و ئاریشەیێن بەردەوام هەنە، ئەمریکا کەمپینا هەلبژارتنایە و حکوومەت وەك کاربرێکەرە و تورکیا دترسیت ترەمپێ دۆستێ وان دهەلبژارتناندا دەرنەکەڤیت و دەرفەت ژ دەستی بچیت.
لێ یەك گرنگترین پاڵدەرێن تورکیا رەوشا خرابا ئابوورییە، کو بۆ خوە ل ژێدەرێن داهاتی دگەریت. کوردستان ژی ژێدەرەکێ دەوڵەمەند، گرنگ، ساناهی و نێزیکە و دبیت ژبەر ئالۆزیێن ناڤخوەیا کوردستانێ خەلکەك دژی تورکیایێ نەبیت. ژخوە ل گۆر گەلەك ڤەکۆلینێن زانستی، عیراق یەکە ژ دەهـ دەوڵەمەندترین دەولەتێن جیهانێ ب سامانێن سرووشتی. ژبلی نەفت و گازێ، ب دەهان سامانێن دی هەنە وەك زێر، زیڤ، ئاسن، سفر، کبریت، رساس، زنك، رەژی و… . دەوڵەمەندترین هەرێم ژی کوردستان و ئەنبارن. ئەڤا داوی کانزا لێ دهێنە بەرهەمئینان. لێ ژبلی بەرهەمئینانەکا سنووردار یا نەفتێ، کوردستان نەهاتییە دەستڤەدان. یەك ژ دەولەمەندترین دەڤەران ژی زاخۆیە کو نوکە تورکیا شەڕەکێ دژوار لێ دکەت. گەلۆ کورد بێ ئاگەهن یانژی پشکدارن دگەل تورکیا؟!