ھندەك مللەت ھەنە شانازیێ دكەن ب دەستكەفتێن كاربەدەستێن سەرۆكێن خۆ بۆ ھەڤوەڵاتیان ب رێیا گەشەكرنا ئابووری و ئاڤەدانكرنێ و خۆشیێ كو ب شێوەیەكێ ئەرێنی كار ل سەر ژیانا وان یا رۆژانە دكەت كو بۆ وان پاشەرۆژەكا پێشكەفتی دابیندكەت و وان پشتراست دكەت ل سەر پاشەرۆژا زاڕۆكێن وان و باشترین نموونە بۆ ڤێ چەندێ دەولەتێن كەنداڤێ عەرەبی. ئەم دبینین ھەڤوەڵاتیێن وان ژ دل ڕێزێ ل وان دگرن، ئەو ژی ژبەر وێ گەرەنتیا ھاتیە دابینكرن بۆ وان. لێ ھندەك كەسێن دیتر ل ھندەك وەڵاتێن دیتر حەزدكەن خۆ شرین بكەن لنك بەرپرسێن خۆ ب رێیا بەلاڤكرنا نەراستیان وەك پارێزگارێ دھۆكێ ل ھەرێما كوردستانا عیراقێ دەمێ دداخویانیەكێدا دبێژیت (باژێرێ دھۆكێ ل ھەرێما كوردستانێ و دەولەتا عیراقێ) دھێتە ھژمارتن نموونەیەك بۆ پێكڤەژیانێ و بەرفرەھیا ئابووری و ئازادیا دەربڕینێ. ل ڤێرە من دڤێت بیرا بەرێز پارێزگاری بینم بەحسی كیژ نموونەیێ دكەت ل دەمێ ھەڤەوڵاتی دەردەسەریا داخازیا ساكارترین مافێن خۆ دكەت د خۆپێشاندانان (پارێزگاری خۆپێشان قوتكریە ل پارێزگەھێ) و دەربڕینا بیر و رایاندا دكەت و دترسیت ژ گرتنێ ئەوا بسەرێ یێن بەری وان ھاتی ژ رۆژنامەڤان و چالاكڤانێن دھۆكێ كو تا نوكە نەشێن بەحسێ كێمیا مووچەیێن خۆ بكەت یان بەحسێ باجێن ل سەر خۆ بكەت.
بەرێز پارێزگارێ دھۆك، تو بەحسێ چ نموونە دكەی و ئەم دبینین ھێزێن توركی یێن داگیركەر ھاتینە دناڤ ئەردێ پارێزگەھا دھۆكێدا و چەندین بنگەھێن خۆ ل سەر ئەردێ وێ داناینە ل دەڤەرا بامەرنێ، ھرۆرێ و …ھتد ل پێش چاڤێن ھەوە بكاردئینیت سیاسەتا ئەردێ سۆتی و ئاكنجیێن شارستانی و پێشمەگەھ كوشتینە و ئەرد و گوند و سامانێ كشتوكاڵی و گیانداری وێرانكرینە و دار بڕینە و بۆ توركی رەوانەكرینە بێی سنورەك ژلایێ ھەوەڤە بۆ بھێتە دانان و تورك ھزرا پێشیەكێ بۆ ھەوە ناكەت و دەڤەرێ ب ئاخا خۆ ھژمار دكەت. ئەرێ پارێزگارێ بەرێز تنێ ھەوە بەسكر ب داخویانیێن نەرازیبوونێ و تاوانان كو ئەڤە ژی نە پێشدئێخیت و نە پاشدئێخیت!
پارێزگارێ بەرێز، چ نموونەیە بەحس دكەی و خەلكێ پارێزگەھێ دەردەسەریێ دبینن ژ كێمیا بەردەواما كارەب، ئاڤ، خزمەتگۆزاریان و بەرزبوونا د نرخاندا ب تایبەت ئەم دبینین نرخێن ھندەك كەلوپەلان و خزمەتگۆزاریان ل دھۆكێ گرانترە ژ پارێزگەھێن دیتر ل ھەرێمێ ب تایبەت نرخا ئەمپێرێن كارەبا ماتۆران.
تو بەحسی چ نموونە دكەی پارێزگار، پارێزگەھا دھۆكێ ئێك وێزگەھا سۆتەمەنیا حكوومی نینە یان تۆرەكا تێلەفۆنێن حكوومی نینە یان كارگەھەكا وەرگرتنا بەرھەمێ جوتیاران نینە. لێ تا كو كەرتەكێ بازرگانیێ ھەڤپشك نینە رابیت بەرامبەر كەرتێ تایبەت راوەستیت. باوەربكە قوتابخانە و نەخۆشخانە وەك زیندانان لێھاتینە ژ ئەنجامێ فەرامۆشكرنا وان. پارێزگار ھەردەم دبێژی حكوومەت یا د قەیرانەكێدا دبووریت، لێ د ھەمان دەمدا ھندەك كەس و لایەن ھەنە بالەخانان ئاڤادكەن بێی زانینا ژێدەرێ ماڵێ وان كو ئەڤە ژی دچیتە د تاوانا شووشتنا ماڵیدا.
بەحسی چ نموونە دكەی پارێزگارێ بەرێز، دەڤەرا كواشێ ل پارێزگەھا دھۆكێ، دھۆك كرە نموونەیا پیساتیێ كو دھێتە ھژمارتن پیسترین دەڤەر ل ھەرێمێ و عیراقێ و رۆژھەلاتا ناڤین ژ ئەنجامێ دانانا پڕۆژەیێن پێشەسازی نەیێن قانوونی كو سەرپێچیا رێنمایێن ژینگەھێ دكەن.
ل دوماھیێ من دڤێت بێژمە تە پارێزگارێ بەرێز، تەنیر ب كوشان ناشاریێت. تێكدەر مللەتان ئاڤا ناكەن، چونكو ئەو تێكدەر تنێ خۆ ئاڤا دكەت و مللەتی تێكددەت و ھندی تۆ نەراستیان ژی بەلاڤە بكەی مللەت ژ تە باوەرناكەت.