ئەردهەژا مەڕەشێ و ئەنفالا هەولێرێ

رۆژا دووشەمبا دەربازبوویی بیڤەلەرزەكێ ب هێزا نێزیکی هەشت پلەیان ل گۆر پیڤەرێ (ریختەر)، ل مەڕەشا باکوورێ کوردستانێ دا. دئەنجامدا ب دەهان هزاران کەسان ل وی باژێری، دەوروبەران و ل دووری سەدان کیلۆمتران ژی ل باکوور و رۆژئاڤا کوردستانێ، تورکیا و سووریا ژیانا خوە ژ دەست دان. هژمارا برینداران ژی دەهقات مەزنترە. ئەڤە ژبلی دەربەدەربوونا ب سەدان هزاران کەسێن دی و بەردەوام هژمارا قوربانیان بلندتر ژی دبیت. جهێ سەرفەرازیێیە کو حکوومەتا کوردستانێ ژ حکوومەتێن پێشین بوو دهاوارا خەلکێ لێقەومی چووی و ب سەدان کارمەند و ئامیر هنارتینە دەڤەرێن ئەردهەژێ بۆ رزگارکرنا مرۆڤان. ل سەر ئاستێ جەماوەری ژی خەلکێ باشوور کەمپینەکا مەزن بۆ کۆمکرنا هاریکارییان دەسپێکرییە.

چەند دەمژمێران بەری ئەردهەژێ، ل هەولێرا پایتەختا باشوورێ کوردستانێ پرۆگرامەکێ تەلەڤزیۆنی ل سەر کوالیتەیا کەرەستەیێن خارنێ دهات پێشکێشکرن. مێڤانێن پسپۆر ئاشکراکرن کو “پتریا” کەرەستەیێن هاوردەکری نەخوەشیێن وەك پەنجەشێری چێدکەن. مێڤانەکی دیارکر کو “ئەڤە ئەنفال (جینۆساید)ەکا هێدی یە.” یەکی دیژی گۆت “هاوردەکرنا ڤان کەرەستەیان وەسایە هەر وەك پاسپۆرتەکێ بدەینە تیرۆرستەکی دا ب ساناهی تیرۆرێ بکەت.” ب راستی جهێ شەرمزاریێیە کو دەسەڵاتێ ئەرکێ خوە ب دروستی جێبەجێنەکریە. ژبەرکو پێویستبوو وەك چاوا بلەز دهاوارا لێقەومیێن ئەردهەژێ چوو، پێشیێ دهاوارا خەلکێ باشوور هاتبا. هەرچەندە هێشتا دەرفەتا ڤی کاری و راوەستاندنا کۆمکوژیێ مایە. لێ پێویستە خەلك ژی کەمپینەکێ دەسپێبکەت وەك کەمپینا پشتەڤانییا ئەردهەژێ، بۆ کۆمکرنا پشەڤانیێ بۆ خوە و راگرتنا ڤان کەرەستەیێن “تیرۆرست” و “ئەنفالا هێدی”.

  • خودان و سەرنڤیسکارێ (رۆژئارتیکڵ)

Leave a Comment

پۆستی ئەلیکترۆنییەکەت بڵاوناکرێتەوە. خانە پێویستەکان دەستنیشانکراون بە *

Scroll to Top