لقا ئێك یا پارتی دیموکراتی کوردستان، ژ ناڤی دیارە کو یەکەمین تایێ (پارتی)یە هاتییە ڤەکرن. هەتا نیڤا ساڵێن نۆتان ژ سەدساڵا دەربازبووی سنوورێ چالاکیێن وێ پارێزگەهێن دهۆك و نەینەوا بوون. لێ نوکە تنێ قەزایێن دهۆك و سێمێلن. هەڵبەت سەرباری تەسکبوونا سنوورێن وێ، لێ وەك لقەکا “دایك” دهێتە دیتن و کارتێکرنەکا کارا ل سەر لقێن دەوروبەر هەیە. هەروەسا بڕیاربدەستەکا دیارە دحکوومەتا لۆکاڵدا. واتە خودان سەنگ و گرنگییەك تایبەتە. نەك تنێ ژبەرکو ژمارەیا وێ یەکە، لێ ژبەرکو دهەژمارا لایەنگرێن کارایێن پارتیدا ژی “یەکەم”ە. هەروەسا خودانا پشکەکا مەزنا شانازیێن دیرۆك و خەباتا (پارتی)یە. ژبلی کو دهەلبژارتن و ململانەیاندا هەڤکێشەیان دگوهڕیت. لەوما هندەك جاران ب (بانکا پارتی) دهێتە بناڤکرن.
ڤێ لقێ دساڵێن دەربازبووییدا هندەك تایبەتمەندی ژدەستدان. بۆ نموونە ساڵا 2018 دهەردوو هەلبژارتنێن پەرلەمانێ عیراقێ و یێن پەرلەمانێ کوردستانێدا، بۆ یەکەمین جار نێزیکی 50٪ دەنگدەرێن دهۆك و سێمێلێ کو سنوورێ لقا ئێكن “پارتینە”، بایکۆت کرن! دیسان ژبەر پشتگوهخستنا رەوشێ، دهەلبژارتنێن ساڵا 2021 یێن پەرلەمانێ عیراقێدا بۆ یەکەمین جار ل سنوورێ ڤێ لقێ، کاندیدەکێ رکابەرێ پارتی، بوو سەرکەفتیێ یەکەم ل هەمی عیراقێ و دەنگێن وی بەرامبەری دەنگێن سێ کاندیدێن پارتی بوون. ئەڤرۆ ژی کادرەکێ “رەسەنێ” پارتی ئەڤ لقە وەرگرتییەڤە، ب هیڤیا ڤەگەراندنا رەوشا بەرێ و نەهێلانا شوونەوارێن “ئەردهەژا” ساڵێن دەربازبوویی. ئەڤە ژی کارەکێ گرانە، ژبەرکو پێویستە بلەز و دیەك دەمدا دلنەواییا کەسوکارێن قوربانییان بدەت، زیندییان رزگار بکەت و ئاڤاهیێن پەیوەندییان ژی نۆژەنکەتەڤە!
- خودان و سەرنڤیسکارێ (رۆژئارتیکڵ)