دەمەکی تنێ بچویك پێتڤی ب پەروەردێ بوون. لێ نوکە بچویك و مەزن پێدڤی ب پەروەردێنە. ل هەمی دەم و جهان دهاتە گۆتن هەوە ئاگەهـ ژ پەروەردەیا جیلێ بهێت هەبیت. لێ ئەڤە هەمی ژ قەستا بوو و هەمی بێ مفابوو و بتنێ گۆتن بوو بێ کریار. چونکی ئەم یی پەروەردەیا جیلێ نوی دبینن کا چەند پەروەردەیەکا ساخلەمە! ئەم بەحس ل گشتی ناکەین، لێ ئەم بەحس ل بەهرا پتر دکەین. نوکە ل تیکتۆکی کور ژ کچان جوانتر سەمایێ دکەن و کچ ژ کوری پتر حەژ شەڕ و ئاریشان دکەت. ما تۆ دبێژی کورەك کو ل بەر چاڤێن کۆمەکا مرۆڤان سەمایێ بکەت ل داهاتووی شۆرەشان بگێرت؟ یان ئەو کچا کارێ وێ ڤەکرنا لایڤان و خرڤەکرنا خەلکی ل دۆر خۆ ئەو دێ شێت هندەك زارۆکێن باش پەروەردە کت؟ دڤێت ژێدەرێ زارۆکان، ئانکو مەزن پەروەردێ وەربگرن، پاشی زارۆکان پەروەردە بکەن. دڤێت ئەو ژێدەرە بهێتە پەروەردە کرن یێ زارۆکێ خۆ ژ شیرەتان ئازاد کری. ئەو بهێتە پەروەردە کرن یێ پەروەردەکرنا زارۆکێ خۆ هێلایە ب هیڤیا سۆشیال میدیایێڤە. بلا ئەو بهێتە پەروەردەکرن یێ کو وەسا تێگەهشتی ناڤداربوون هەمی تشتە گرنگ نینە ب چ رێک بیت.
دڤێت شانازی ب وی زارۆکی نەبت ئەو زارۆکێ ڤالا دهێتە مەزن کرن. نوکە هێشتا زارۆك د تەمەنەکێ بچویك دا دایك و باب باشترین مۆبایل یان ئایپاد ددەنە دەستی. هندەك ئەکاونتان ژی بۆ دروست دکەن، دێ بێژن بتنێ دا ژ مە ڤەبیت و پێڤە مژویل ببیت. ئەرێ تۆ دزانی ئەو ئەکاونتە چ پەروەردە نیشا زارۆکێ تە ددەت پشتی ئەو زارۆك مەزن دبیت و بگەهیتە تەمەنەکی کو گوهداریا دەیك و بابان نەکەتن، دێ دایك و باب دەست ب لۆمەکرنا زارۆکێ خۆ کن و دێ بێژن مانێ ژ من ناترست و گوهداریا من ناکەت. بێگومان گوهداریا تە ناکت، چونکو تە ئەو فێر نەکریە گوهداریا تە بکەت. ئێدی دڤێت تێبگەهین ئەگەر مە بڤێت زارۆکەکی پەروەردە بکەین، دڤێت ل دەسپێکێ کەسانێن ژ وی مەزنتر و دەوروبەرێ وی ئانکو ژێدەرێ پەروەردەیا وی پەروەردە بیت. ژبەرکو زارۆك ژی چاڤ ل مەزنان دکەت. زارۆك پەروەردەیا دەستێ مەزنایە.
- (گۆتار دەربڕینا بۆچوونا نڤیسکارانە، نەیا سایت و گۆتارنامەیا رۆژئارتیکڵ)