دەنگێ راگەھاندكار و چالاكڤان و خۆپێشاندەران نەراوەستیایە، ھەر ژ دەمێ حكوومەتا ھەرێمێ رابووی ب چێكرنا قەیرانان بۆ ژیارا ھەڤوەڵاتیان پشتی ساڵا (2015)ێ. هەروەسا دژی كاودانێن دژوارێن ژیارا ھەڤوەڵاتیان و گەندەڵیا بەربەڵاڤ دچومگەھێن ھەرێمێدا و ھزرا خێلەكی یا کو حكوومەتێ برێڤەدبەت ل ھەرێما كوردستانێ. دیسان دژی وان كەسێن ئیناین دا پایەیان پڕبكەن دحكوومەتێدا بێی کو ھیچ شیانەك ھەبیت بۆ خزمەتكرنا ھەڤوەڵاتیان و باشكرنا ژیانا وان و وەرگرتنا بڕیارێن دبەرژەوەندیا ھەڤوەڵاتیاندا بن. چونكو ئیرادە ژ ڤان كەسان ھاتیە ستاندن د پلەیێن حكوومەتێدا و ھیچ دەستھەڵاتەك بۆ خزمەتكرنا خەلكی نینە و دھێنە ھژمارتن وەك یاریا (بیكا باربی) كو بتنێ خزمەتا پارتێن خۆ دكەن.
ھەڤوەڵاتی داخوازیا چاكسازیان دكەن برێیا خۆپێشاندانان و راگەھاندنێ. لێ دەستھەڵات گوھنادەتە ڤێ چەندێ و وان چاكسازیان رەتدكەت و باشكرنا ژیارا خەلكی و پلەیەكا حكوومی پێگیر دكەت بیانۆیەكێ بینیت بۆ رەتكرنا ڤان چاكسازیان كو حكوومەت نە سەدەمێ وان قەیرانانە و سەدەمێ سەرەكی ئەوە كو نەپێگیریبوونا ھەڤوەڵاتیە ب كارئینانا مافێن خۆ. لڤێرە ئەم دبینین ژ دەستدانا مافێن مرۆڤایەتیێن ھەڤوەڵاتیان و دانانا ھەر كەسەكی دپلەیەكا حكوومیدا ب رەنگەكی كو ب زەحمەت پسیار ژێ بھێتەكرن پێخەمەت ئەو پسیار دژی دبەرژەوەندیا دەستھەڵاتێدا بیت.
دەستھەڵات ل ھەرێمێ كۆمەڵەكا سیاسییە ژ دوو پارتان پێكدھێت و ھەرێم دناڤبەرا خۆدا دابەشكریە و ھەر ھەوڵدانەك ژلایێ چاڵاكڤان و ھەڤوەڵاتی و راگەھانكاریڤە ژبۆ گوھارتنا وان و سیاسەتا وان، ب توندوتیژی دێ ھێتەگرتن. چونكو ئەو دەستھەڵات ھەرێمێ لدووڤ بەرژەوەندیێن خۆ برێڤەدبەن كو بدەستڤەئینانێن مێژوویینە و بنچینەیێن دیموكراتیێ ھاتنە دوورخسن. چونكو جێبەجێكرنا بنچینەیێن دیموكراتیێ دێ بنە سەدەمێ گوھۆرینا بەرژەوەندیێن وان و نەشێن خێراتێن ھەرێمێ وەرگرن.
ل دوماھیێ، دڤێت دەستھەڵات بزانیت کو دەنگێ وان یێ بەردەوامە؛ ھەڤوەڵاتی د خۆپێشانداناندا و راگەھاندكار د راگەھاندنێدا دبەردەوامن و دێ دەنگێ دیموكراتیێ و مافێن ھەڤوەڵاتیان بلندكەن بۆ برێڤەبرنا ھەرێمێ تاكو سەروەری بۆ ھەڤوەڵاتی بیت.
