راگەھاندنا كوردی یا فەرمی ل ھەرێما كوردستانا عیراقێ راستگوییا خۆ یا ژ دەستدای لنك ھەڤوەڵاتیێن ھەرێمێ. ھەر جارەكێ وەزیرەك دێ دەركەڤیت و داخویانیەكێ دەت و مەتحێن دەسكەفتێن وەزارەتا خۆ كەت. لێ ئەو چەند یا ژ راستیێ دوورە. بۆ نموونە وەزیرێ نەفتێ ئەڤە چەند جارە دەردكەفیت و دبێژیت: گازا سپی دێ ل سەر ھەموو تەخێن ھەڤوەڵاتیان ھێتە بەڵاڤكرن. لێ براستی ھۆسا دەرنەكەفت و چەندین بەڵێنیێن دیتر وەك پانزین و نەھێلانا گەندەلیێ ل وەزارەتا خۆ.
ھەروەسا وەزیرێ كەھرەبێ، د داخۆیانیەكێدا دگەل كەنالێ شەرقیە دبێژیت: وەزارەتا وی رۆژانە (18) دەمژێران كەھرەبا گشتی ددەتە ھەڤوەڵاتیان و نرخا ئەمپێرێ كەھرەبا موەلیدەیێن ئەھلی لناڤبەرا (3 تا 4) ھزار دینارانە ھەیڤانە. داخویانیا ڤی وەزیری رەنگە راست بیت، لێ بۆ چینەكا تایبەت دەمێ كەھرەبا گشتی دھێتە دان بۆ چینەكا بەرپرسان بۆ ماوەیێ (18) دەمژمێران رۆژانە. لێ ھەڤوەڵاتیێ ئاسایی رۆژانە (10 تا 12) دەمژمێران كەھرەبا گشتی دگەھیتێ و بەرامبەر ڤێ جێوازیێ كرییا موەلیدەیێن ئەھلی ددەت دووجاران ھندی وێ نرخا بەرێزێ وەزیر گۆتی.
دەربارەی وەزیرێ دارایی، دەمێ دبێژیت مووچە د دەمێ خۆدا دھێتە بەڵاڤكرن. ئەڤە ژی ھۆسا دەرنەكەفت و چاڤێ مووچەخۆران یێ ل تۆڕێن جڤاكی كانێ كەنگی دێ مووچە ھێنە بەڵاڤكرن. ئەڤێ چەندێ ژی زیانێن دەروونی گەھاندنا مووچەخۆران. ئەڤە ژی حالێ ھەموو وەزارەتانە كو ب وی رەنگێ دھێنە رێڤەبرن. ھەروەسا سەرۆكێ ڤان وەزیران گۆتبوو: كو حكوومەتا وی رابوویە ب زێدەكرنا داھاتێ ناڤخۆیی ل ھەرێمێ پا كانێ؟
ژ ڤێ چەندێ دیاردبیت، كو حكوومەتا ھەرێمێ راستگۆییا خۆ ژ دەستدایە لنك ھەڤوەڵاتیان كو ب ھیڤی بوون ئەڤ حكوومەتە گەلەك دەستكەفتان پێشكێشی وان بكەت و قورتال ببن ژ درەوا قەیرانا دارایی و ب بەرفرەھی و خۆشی بژین و پێشكەفتن دیار بیت.
ل دوماھیێ، بەرپرسیا ئەڤا من گۆتی دكەڤیتە سەر ملێ سەرۆكێ وان وەزیران كو یێ بێدەنگە بەرامبەر داخۆیانیێن وان. پڕسیارا گرنگ ل ڤێرێ، ئەرێ ھەتا كەنگی دێ ھەڤوەڵاتی دڤی بارودۆخیدا ژیت كو دبیت رۆژەك بھێت ئەڤ بارودۆخە ببیتە پاڵدەرێ ھەڤوەڵاتی سەرھڵدانێ ل سەر ڤێ حكوومەتێ بكەت كو حكوومەتەكا ڤاڵایە و دھێتە ب رێڤەبرن ژ لایێ چەندین كەسێن دوو بنەماڵێن ھەردوو حزبێن سەرەكی.