رێڤەبەرێ نڤیسینێ
ئەو پرسیارێن خۆ دھاڤێژنە مەیدانێ، بۆچی دشیاندا نینە ئەو ژیوارێ گەنجێ كورد تێدا دژیت بھێتە گوھارتن ل ھەرێما كوردستانا عیراقێ ژ ساڵا (1991)ێ و تا ئەڤڕۆ؟ بۆچی ھەر ئەو دەستھەڵاتدارن تا نھۆ؟ بۆچی پارتێن دەستھەڵاتدار سیاسەتا ئاژاوە بكاردئینن و قەیرانان دروستدكەن؟ بۆچی مێشكێ كەسایەتیێن حزبیێن دەستھەڵاتدار ھشك بوویە و ناھێتە گوھارتن؟
یەكەمین تشت ل سەر تاكێ كورد ئەوە خەریبیا رابووری رابوەستینین، چونكو ھزرا گوھارتنێ و پێشكەفتنا زانستی و ڤێڕاگەھشتنا دەولەتێن پێشكەفتی لنك وی پەیدا نەبوویە. ھەروەسا رزگاربوون ژ بیرۆكەیێن خێلەكی یێن حزبێن كوردی رزگارنەبوویە ئەوێن تنێ بەحسێ رابووری دكەن و خۆ دیار دكەن ھۆشمەند و سەركردە و كەس ژ بلی وان نینە و ئەگەر ئەو نەبان ھیچ وەڵاتیێ كورد ل سەر نەخشەیێ جیھانێ نەدبوو.
دڤێت ئەو كەسایەتیێن حزبیێن دانعەمر بزانن دەمێ وان بسەرڤەچوو و یا پێتڤیە خانەنشین بن ژ كارێن سیاسی و حزبی. نھا رۆلێ گەنجێن كوردە كو وان دنیاسن و نەسەركەفتنا گوھارتن و پێشڤەچوونا زانستی و نەپێشكەفتن بەرەڤ پاشەرۆژێ سەدەم ھەبوونا وان دانعەمرانە دناڤ حزبێن دەستھەڵاتدار ئەوێن ھەوڵدەن كۆنترۆلێ ل سەر مێشكێ ھەڤوەڵاتیان بكەن دا پتریا مللەتی نەشێت ھزرا پاشەڕۆژێ بكەت و بتنێ رابووری و شۆرەش و خەباتا وان حزبان دووبارە بكەن د ھەر ھەلكەفتەكدا كو بكەنە قەنجی ل سەر مللەتی. ئەڤ چەندە ژی كارەساتەكا حزبیە ل ھەرێمێ دەرحەقێ ڤی مللەتی. ئەڤ كارەساتە ژی دووپاتكرنا كەسایەتیێن دانعەمرێن حزبی ب دووبارەكرنا گۆتارێن خۆ د ھەر ھەلكەفتەكێدا دا مللەت ھزرا پاشەڕۆژێ نەكەت و چ پاشەڕۆژێن باش بۆ نەوەیێن نوی نەھێلیت.
باشترین نموونە ل سەر ڤێ چەندێ، نھا ئەم لبەر دەرگەھێن ھەلبژارتنێن ئەنجوومەنا تەشریعیا عیراقێینە ل (10\10\2021)ێ ئەم دبینین وان دانعەمرێن حزبی ھەر ھزرا بەری (29) ساڵا دووبارە دكەن كو ئەوان كەسان دكەنە بەربژێرن حزبێن خۆ یێن بنەمایێن كارێ پەرلەمانتاریێ لنك پەیدا نەبن تنێ بۆ وان دانعەمرێن حزبێ كار بكەت و مللەتی ژبیر بكەت.
ئەو كەسایەتیێن مە بەحسكری یێن تووشی نەخۆشیا دەستنەبەردان ژ كورسیكا دەستھەڵاتداریێ بووین و نەشێن دەست ژێ بەردەن ب رێیێن دیموكراتی كو ل سەر پاشەڕۆژا گەنجان ژی ژناڤ ببەن كو وان رابووریەكێ جوان نەبوویە و بەحسێ پاشەڕۆژەكا باشتر دكەن. وەسا دیار دبیت كو دەستھەڵاتا حوكمدار ل ھەرێما كوردستانێ یا دانعەمربووی و گرنگیێ نادەتە پاشەڕۆژا گەنجان و بەڵگە ل سەر ڤێ چەندێ نەبوونا كاری بشێوەیەكێ گشتی و نەبوونا دامەزراندنێ بۆ دەرچوویێن زانكۆیان و كۆچكرنا گەنجان بۆ دەرڤەی وەڵاتی و بنپێكرنا قانوونێ، لێ دڤێت ئەڤ دانعەمرە بزانن ژ مافێ وان گەنجانە ھزر و ھیڤیا پاشەڕۆژێ بكەن. ھزر و بیرێن خێلەكی نەھێلن چونكو دگەل پێشكەفتنێ و پاشەڕۆژەكا باشتر نا گونجن.