یا زانایە قانوون دەردكەڤن دبەرژەوەندیا جڤاكیدا بێ جوداھی و ھندەك جاران بڕیار دەردكەڤن د بەرژەوەندیا تەخا ھەژاردا. لێ دەمێ ئەم دبینین ئەڤ قانوون و بڕیارە دبەرژەوەندیا ھندەك دەستھەڵاتدارایە و دوور ژ بەرژەوەندیا گشتی یا خەلكی و ل سەر حسابا خوارنا وان یا رۆژانە. ئەڤە دێ بیتە كارەساتەكا مەزن ب تایبەت ئەگەر ئەو قانوون و بڕیار دەركەفتبن ژ كەسەكێ قانوونی (یاساناس) كو ئەو ژی وەزیرێ دادە.
پشتی مامەلە و بریكاریێن دەركەفتی ژ فەرمانبەریا نڤێسەرێ داد دھێنە رێكخستن ژ ئالیێ خودانێن سكالاناماڤە (عەریزچی) بەرانبەر كۆژمەكێ كێمێ پارەی، وەزیرێ داد ل ھەرێما كوردستانا عیراقێ بڕیارا ھژمارە (1242) دەركرد كو چێدبیت وەزارەتا وی گرێبەستا دگەل كۆمپانیان گرێدەت بۆ دەركرنا نموونەیێن ڤان بریكاریان و مامەلا بەرامبەر ھندەك كۆژمەیێن دووجاران ھندی بەری نھا، كو ئەڤەژی گەلەكە بۆ ھەڤوەڵاتیێ ئاسایی.
ل ڤێرە ئەڤی وەزیری سەرپێچیا قانوونێ كرییە؟ یان زێدە ژ دەستھەڵاتا خۆ بكارئینایە بۆ بەرژەوەندیا ھندەك كەسێن كێم دجڤاكیدا و بەرژەوەندیا ھندەك كەسان بسەر بەرژەوەندیا گشتیا مللەتی ئێخستیە. ئەڤە ژی دبیتە سەدەم كو نەیێ گونجایە بۆ پلەیا خۆ ب تایبەت ئەگەر مە زانی كو دادگەھا كارگێری ل ھەولێرێ بڕیارا خۆ ھژمارە (64/ك/2019) ل (23/12/19) دەركریە كو داواكراو (المدعی علیە) كو وەزیرێ دادە ب ھەڤوەشاندنا بڕیارا ل سەری (1242) كو گرێبەستا حكوومەتێ وەزیری پێگیر بكەت ڤێ بڕیارێ ھەلوەشینیت و لێپرسین دگەل بھێتەكرن دەربارێ بڕیارا (1242) كو سەرپێچیا قانوونێ دكەت و شوینگری بھێتە دان بۆ وان كەسێن كو كوژمێن مەزن داین بۆ رێكخستنا بریكاریان و مامەلان.
ھەژی گۆتنێیە، بڕیارا ھژمارە (64/ك/2019) دەركەفتیە ب پشتبەستن ب مادەیێن (13/14/17/18) ژ قانوونا شورا ل ھەرێمێ و مادەیێن (88/154/155/156/159/161/162/166) ژ قانوونا دادگەریا شارستانی (قانون المرافعات المدنیە). ئەڤە ھەموو و سەرۆكێ ھەرێمێ و سەرۆكێ حكوومەتێ پێزانین ل سەر نینن و پارێزگارێ دھۆكێ دناڤ ھەڤوەڵاتیان دھێت و چیت و سەرا خێزانێن ھەژار ددەت و ڤان بڕیاران نزانیت و د ھۆیێن راگەھاندنێدا دەردكەڤیت و ب قانوونێ دگەل ھەڤوەڵاتیان دئاخڤیت. ل ڤێرە ئاشكرا دبیت، پشتگوھھاڤێتنا قانوونێ و نە جێبەجێكرنا ئەحكامێن دادگەھێ خۆ بخۆ گەندەڵیە.