ئەڤرۆ یادا (٣٠) ساڵییا سەرهلدانا باژێرێ دهۆکێ یە. وێ رۆژێ خەلکێ هەژارێ سەرهلدای ب گەرموگوڕی دژی رژێما بەعس راپەرین و دەڤەر ژ دەسەڵاتا دکتاتۆری پاقژکرن. گەلەکان ژی گیانێ خوە کرە قوربان و شەهیدبوون. ژلایەکێ دیڤە ژی ب دلخوەشی پێشوازی ل شۆرەشگێرێن کورد کرن. خەلکێ سادە و گەلپەروەر هزردکرن و ب باوەربوون کو دێ دوماهی ب هەمی نەخوەشیێن وان هێت و یێن زیان گەهاندینە خەلکی، ژنێن کورد فرۆتین، زارۆك و پیر ب ساخی بنئاخکرین و وەڵات وێران و تالانکرین دێ هێنە سزادان. ئانکو وەڵات دێ بیتە بەهەشت و ئێدی هەر کەس دێ یێ ئازاد و ئارام بیت ددەربڕین، ئاخفتن، کارکرن، رەفتار، ژیان، رابوون و روونشتنێن خوە دا.
خەلکی نەدزانی نەخوەشیێن وان ب دوماهی ناهێن بەلکو دێ هێنە گوهڕین؛ خاین دێ هێنە خەلاتکرن و بنە ریهسپی، رەفیق دێ بنە کاك، فایلدار دێ بنە بەرپرس و دهەلکەفتاندا سەرەدانا کەسوکارێن شەهیدان کەن و ب چەند هزار دیناران خێران پێ کەن، ئازادییا دەربڕینێ دێ بۆ پەسندانێ بیت، کارکرن دێ بەرەف نەمانێ چیت، خوەشگۆزەرانی دێ بۆ تەخەکا تایبەت بیت، ئەڤ پارێزگەها دەوڵەمەند دێ بیتە هەژارترینا هەرێمێ، ئەڤ پارچەیا وەڵاتی دێ پارچەپارچە بیت، یەکرێزیا ناڤخوەیی دێ بیتە خەون. دەسەڵات ژی ل شوونا دانانا پلانان بۆ راستڤەکرنا رەوشێ، پتریا جاران دێ وەك زۆربەیا دەسەڵاتێن رۆژهەڵاتا ناڤین مژوولی ئاڤاکرنا ڤیللە و تاوەران بیت بۆ خوە. ئەڤە ژی نە ئارمانجێن خەلکێ سەرهلدای و نە ژی نیشانێن گەشبینیێنە!
