دیرۆکا مرۆڤایەتیێ یا پڕە ژ شەڕان دناڤبەرا لایەنێن جودا، ل دەم و جهێن جودا و ژبەر هۆکارێن جودا کو دشێین بێژین ئارمانجا پترییا وان کۆنترۆڵکرنە. هەڵبەت دهەمی شەڕاندا سەرکەفتی و دۆڕاندی هەنە، لێ پتریا جاران زیانێن لایەنێ سەرکەفتی ژی گەلەك کێمتر نینن ژ زیانێن لایەنێ کو شەڕ دۆڕاندی. لەوما دبێژن کەس د شەڕاندا سەرکەفتی نینە. لێ دیسان ژی شەڕ د بەردەوامن. گەلێ کورد ژی ب درێژییا دیرۆکا خوە دناڤ شەڕاندایە و تا رۆژا مە یا ئەڤرۆ ژی ژێ رزگار نەبوویە و زیانێ ژێ دبینیت و قوربانیێ ددەت. زیانا هەرە مەزن ژی ژ شەڕێن براکوژیێ یێن دناڤبەرا هۆز، میرنشین، گرۆپ، لایەن و پارتێن جودادا هاتینە و دهێنە کرن.
ئەڤرۆ پتریا گەلێن جیهانێ دەما نیشانێن پەیدابوونا شەڕەکی دبینن یان هەست ب نێزیکبوونا شەرەکی دکەن، ب کار و چالاکیێن جودا هەلویستان وەردگرن دژی شەڕی. لێ دهەمان دەمدا جڤینان سازدکەن بۆ دروستکرنا هەڤپەیمانییەکا مەزن یا نێڤدەولەتی بۆ ئەنجامدانا شەڕەکی، کو ئەوژی شەڕێ دژی تیرۆرێ یە. بۆ سەرکەفتنا د ڤی شەڕیدا دەولەتێن جیهانێ هەماهەنگی و هەڤکارییا هەڤدوو دکەن ب رێکا پێکگوهارتنا زانیاریێن هەواڵگیری، راهێنان و مەشقێن سەربازی، پڕچەککرنێ، پێکڤەکارکرن و دانانا یاسایان بۆ پێناسەکرن و دیارکرنا کارێن تیرۆری و تیرۆرستان. ئەڤجا ژبەرکو گەلێ مە ژی قوربانیێ دەستێ تیرۆرێ یە، پێویستە قەت دووری ڤێ هەڤپەیمانیێ نەبین و پێکڤە بێژین بەلێ بۆ شەڕی ل دژی تیرۆر و داگیرکاریێ ب ئارمانجا چەسپاندنا یاسایێ ل سەرانسەری وەڵاتی.