بۆچی دەما یەك حالەتێ كۆرۆنایێ ل كوردستانێ نەیی، دەرگەھێن زانینگەھان ھاتنە داخستن و نوكە ب ھزاران فێرخاز یێن تووشی كۆرۆنایێ دبن و دەرگەھـ دڤەكرینە؟! د (10) ھەیڤێن جیھان ژبەر ڤایرۆسێ كۆرۆنایێ دمەترسیێدا و ژبۆ خوەپاراستنی ژڤی ڤایرۆسی، ب ھەمی شێوازان ل جیھانێ رێكێن خوەپاراستنێ و رۆژانە رێنمایێ بۆ ھاوڵاتیان دھاتنە دەركرن، كو كێمترین رێژا تووشبوونێ و مرنێ دناڤ خەلكیدا ھەبیت، دا ژیانا خەلكی یا پاراستی بیت.
بتنێ ل كوردستانێ پارسال ل ھەیڤا دوو و بێی كو ئێك كەس ژی ب كۆرۆنایێ ھاتبیتە تۆماركرن، ل سەرانسەری كوردستانێ حكوومەتێ و وەزارەتا تەندروستی و ژوورا ئۆپەراسیۆنا دژی كۆرۆنایێ، رێنمایێن توند دەرێخستن و خەلك بۆ ماوێ پتری سێ ھەیڤان دمالێن وانڤە زیندانكرن. قەدەغەیا ھاتن و چوونێ و بێ مووچەیی و خەلك د قەیرانا تەندروستی و برسێ دا ل مال ھێلان، دەرگەھێن قوتابخانە و زانكۆ و پەیمانگەھان ھاتنە داخستن و قەیرانا سالانە یا زانینێ ژی راگەھاندن و زانینگەھـ و زانكۆیێن تایبەت ب سالەكێ ھاتنە ھژمارتن بێی خواندن و دەوام! ئەڤە ھەمی ژی بێی كو ھیچ حالەتەكێ كۆرۆنایێ ھاتبیتە تۆماركرن.
دڤان سێ ھەیڤاندا و ب پلانەكا بێ سیستەم و نەیاسایی، حكوومەتێ كۆرۆنا ب مەرەم ئینا ناڤا ھەرێمێ و قوناغا بازرگانیكرنا ب گیانێ ھاولاتیان دەسپێكر. رۆژانە ب سەدان كەس ب كۆرۆنایێ تووش دبن. مە دیت چاوان ھۆل ھاتنە ڤەكرن، بازار ھاتنە ڤەكرن، مزگەفت، زانینگەھ، جھێت كاری، رێنمایا قەدەغەیا ھاتن و چوونێ بھیچ رەنگەكی نەما! ژمارا مرییان ب كۆرۆنایێ ژ دوو ھزار كەسان دەربازكر و رۆژانە زێدەتری 3 ھزار پشكنینێن كۆرۆنایێ دھێنە كرنێ و ب بھایێن زۆر گران و زۆر جاران تاقیكرن نەراست دەردكەڤن یان ئەنجام خەلەت دھێنە دەستێ ھاولاتیان تا دھێتە زانین. ئەڤجا كا قەرەبوویا ھاولاتیان؟
بھایێ پشكنینا ڤایرۆسێ كۆرۆنایێ ژ جیھانێ ھەمیێ زێدەترە. بھایێ دەرمانان بۆ كۆرۆنایێ كو چارەسەریا كۆرۆنایێ نەھاتیە دیتن، ب بھایێن سەرسۆرھێنەر دھێنە فرۆتن، بێ حكوومەتێ و وەزارەتا تەندروستی لێدوانەك ھەبیت. پشتێ ڤەكرنا دەوامێن حكوومی و كەرتێ تایبەت و خواندنگەھان، رۆژانە ب سەدان حالەت دھێنە تۆماركرن و نەخۆشخانە پر بووینە ژ نەخۆشان و كۆرۆنا دناڤ مالێن ھەمی ھاولاتیان دایە. ئەرێ ھوین چاڤەرێی مرنا چەند ژ وان دلسۆزانە یێن ھوین برینە سەر وان كورسیان، دا بڕیاران دەرکەن و دەرگەهێن جهێن خرڤەبوونان بگرن؟ ھیڤیدارین بلا بازرگانیكرن ب گیانێ ھاولاتیان بەس بیت.
- (گۆتار دەربڕینا بۆچوونا نڤیسکارانە، نەیا سایت و گۆتارنامەیا رۆژئارتیکڵ)
