دانانا پڕۆژێ قانوونا رێكخستنا راگەھاندنا ئەلكترۆنی بۆ ناڤ كارێ حكوومەتا ھەرێما كوردستانا عیراقێ تیرۆركرنا دیموكراتیەتێ و دەربڕینێیە. ئەڤەژی ئاماژی ددەت كو سیستەمێ دیموكراتی یێ د سەكەراتێدا، چونكو پشتی دامەزراندنا سیستەمێ دیموكراتی ل ھەرێمێ ساڵا (1992)ێ سەرنەكەفت بۆ بدەستڤەئینانا یەكسانیێ دناڤبەرا ھەڤوەڵاتیاندا. بەڵگە ل سەر ڤێ چەندێ دەركەفتنا خۆپێشاندانان و دەستەسەركرنا راگەھانكاران و روژنامەڤان و چالاكڤانان. ئازادیا دەربڕینێ ل ھەرێمێ نەمایە، لێ بتنێ ل جھەكی مایە و حكوومەت پێكۆڵێ دكەت وی جھی ژی نەھێلیت ب رێیا پڕۆژێ قانوونا رێكخستنا ئەلكترونی. ئەڤ جھەژی ئەنترنێتە كو دیموكراتیەت و ئازادیا دەربڕینێ لێ ھەیە و یەكسانیێ د ناڤبەرا ھەڤوەڵاتیاندا دروست دكەت ب تایبەت جھێن پێكڤەگەھاندنا كۆمەڵایەتی (تۆرێن كۆمەڵایەتی). وەك فیسبۆك و تۆیتر و ئنستگرام و… ھتد) چونكو دەمێ ھەڤوەڵاتی دچیتە دناڤ ئەنترنێتێدا ئەو وەكی ھەر كەسەكی دییە دەمێ دچیتە دناڤ ئەنترنێتێدا ژ سەرۆكێن دەولەتان و ھەرێمان و وەزیران و ھەر بەپڕسەكێ دی، دڤێ دۆخێدا ئەم ھەموو مافان یەكسان د بینین د ناڤبەرا ھەموو ھەڤوەڵاتیێن دچنە دناڤ ئەنترنێتێدا ب ھەموو جھێن خۆڤە. چونكو ئەنترنێتێ نێڕینەكا نوو سەبارەت گەنجان یا ئافراندی (لدووڤ زانایێن جیھانی ئەو گەنج دھێنە بناڤكرن ب ھەڤوەڵاتیێن ژمارەیی).
نھۆ نەتەویێن ئێكگرتی ئامارەكێ برێڤە دبەن كو ئەو ھەڤوەڵاتیێن بووین ژمارەیی پیڤەرێ پێشكەفتن و گەشەكرنێنە د دەولەتێن جیھانێدا. دەستھەڵاتا حكوومەتا ھەرێمێ ڤێ چەندێ دزانیت، ژبەر ھندێ ھەوڵدان ژلایێ وێ ھەنە بۆ دەركرنا ھندەك قانوونان دیموكراتیەتێ و ئازادیا دەربڕینێ پێ تیرۆر بكەت دا مللەت نەزان بمینیت و مافێن خۆ نەزانیت و بێ دەنگ بمینیت دەربارێ ھەر تشتەكی چێبیت. چونكو ئەوێن ئەنترنێتێ بكاردئینێن داخازیا مافێن خۆ یێن ئاسایی دكەن لدووڤ دەستوورێن جیھانێ نموونەیێن دیموكراتی ئافراندینە. ئەوژی ئازادیا دەربڕینێ و یەكسانیێ د ماف و ئەركاندا دكەن. ئەڤ چەندە ژی ئارمانجێن دەستھەڵاتا حكوومەتا ھەرێمی بدەستڤە نائینیت.
ل دوماھیێ، داخاز دكەم ژ حكوومەتێ ئەو رۆژنامەڤان و راگەھانكارێن و چالاكڤان مامۆستایێن دەستەسەركری بھێنە ئازادكرن و ژ نەتەوەیێن ئێكگرتی داخاز دكەم پەناگەھەكا ئارام (مأوى آمن) بۆ روژنامەڤان و راگەھانكار و چالاكڤانان (ھەڤوەڵاتیێن ژمارەیی) پەیدا بكەت و بێخیتە لژێر چاڤدێریا رێكخراوێن خۆڤە.
