بەری دەهـ ساڵان هندەك پەرلەمانتەر، کەسایەتیێن کورد و دۆستێن کوردان ل وەڵاتەکێ مەزنێ جیهانێ کو “دۆستێ کوردان”ە شیان وەزیرێ دەرڤە یێ وی وەڵاتی رازی بکەن بۆ چەند خوولەکان سەرکردەیەکێ کورد ببینیت. وەك بزاڤەك بۆ دروستکرنا پەیوەندییان. لێ دیەکەم سوحبەتدا وەزیری گازندە ژ سەرکردەیێ کورد کرن و دلگرانییا خوە نیشاندا ژبەر نەبوونا ئازادییا دەربڕینێ و کوشتنا رۆژنامەڤانان ل کوردستانێ. دهەمان ساڵاندا رۆژنامەڤانەکێ کورد بۆ میدیایەکا ئەورۆپی پێشنیارکر هەڤپەیڤینەکێ دگەل سەرۆکوەزیرێن کوردستانێ بەڕێز نێچیرڤان بارزانی سازبکەت. لێ سازیێ دیارکر کو ئەڤە نەیێ ناسکرییە و باشترە دگەل سەرۆك مەسعوود بارزانی سازبکەت. لێ دەما رۆژنامەڤانی گۆتی کو سەرۆکوەزیرێن کوردستانێ بانگا ئازادییان و پێکڤەژیانێ دکەت، سازی رازیبوو و هەڤپەیڤین سازکرن.
مخابن دڤان رۆژێن دەربازبووییدا پەرلەمانێ کوردستانێ دخاست ب یاسایەکێ رەواییێ بدەتە نەهێلانا ڤێ رێژەیا ئازادیێ و سازیێن ئەمنی ژی ئەڤ هەوڵە ددان. دەرئەنجام ژی نەتەوەیێن یەکگرتی، سازیێن راگەهاندنێ و رێکخراوێن مافێ مرۆڤی یێن نێڤدەولەتی رەخنەیێ ل دەسەڵاتا کوردستانێ دگرن. یا دروست ئەوە ئەم چاڤ ل دەولەتێن وەکی تورکیا و ئیرانێ نەکەین. ژبەرکو دەولەتێن مەزنن، پەیوەندی و بەرژەوەندیێن دێرین دگەل جیهانێ و دەولەتێن زلهێز هەنە. تەنانەت عیراقێ ژی سەنگەك هەیە، ژبەرکو ب کورتی دەولەتە. ل ڤێرە مە دڤێت بێژین کو مە دەولەت، ئابوورەکێ قایم و پەیوەندیێن بهێز نینن. تاکە وەریسێ کو نوکە ددەستێن مەدا یە و ئەم دشێین ب رێکا وی سەرکەڤینە جیهانا پێشکەفتی، مەسەلەیێن ئازادییان و مافێن مرۆڤینە. لەوما دڤێت نەبزدینین.