ئەنفال ئەو پەیڤا ناخێ مرۆڤایەتیێ هەژاندی و رویێن ئەنجامدەرێن وێ و جیهانا ئەرەبی و ئیسلامی و بیانی و رێکخراوێن مافێن مرۆڤی رەشکرین ل سەر بێدەنگی یا وان ژ جینۆسایدەکا هندە یا مەزن کو د هەر هەشت قۆناغێن وێ دا نێزیکی 182000 کورد هاتن شەهیدکرن و پتری 4500 گوندان هاتین کاڤل و وێرانکرن! 32 سال ب سەر ئەنفالا بەهدینان ڤە بۆرین، هەر سال د بیرەوەریا وێ دا چەند چالاکیەکێن نە ژ هەژی دهاتن ئەنجامدان و بەیاننامە دهاتن خواندن و داخوازیێن کەس و کارێن شەهیدێن ئەنفالان بێی ئامادەبوونا رێژەیکا مەزن ژ کەس و کارێن ئەنفالبوویان بۆ حوکمەتێن هەرێمێ و مەرکەزی دهاتن خواندن و بلندکرن ل گۆرەپانەکێ کو فەرشێن سۆر بۆ مێهڤانان دهاتن رائێخستن و قەنەپە بۆ دهاتن دانان و کەس و کارێن ئەنفالبوویان و ب تایبەت دایکێن شەهیدان یێن دانعەمر دناڤ تۆز و ل پاشیێ د رونشتن و چاڤێن خوە ب روندکان سۆر دکرن و برینێن وان دووبارە دهاتن کویر کرن و چیرۆکێن دەردەسەری و قوتان و ئێشاندانا زارۆیێن وان و بێهەناسەمان و شەهیدکرنا کەس و کاران و بێسەروشوین کرنا یێن ماین و ئێش و ئازارێن پاش مانا بێ زەلام و چەوانیا ب خودانکرنا زارۆیێن ئێتیم و پەیداکرنا پاریێ ژیانێ و درەو و سۆزێن بەرپرسان هەمی وەک فلمەکی دناخی دا دهاتن و دچوون و دەهبارە دهاتن سزادان!
هەتا نوکە هەر سال ئەم یێ وان داخوازیان وەک باباغای دووبارە دکن و ئێک ژی نەهاتە بجهئینان! نە رۆفاتێن پیرۆزێن شەهیدان بۆ باوەشا وەلاتی هاتن ڤەگەراندن، نە مووچەیێ شەهیدێن وێ وەک یێن دی شایستە بوو، نەژی ڤەگوهاستنە سەر ب بەغدا ڤە و نەک یاسایا (ماف و ئیمتیازاتێن کەس و کارێن شەهیدان و ئەنفالکریان) هاتە هەموارکرن، نە پێکۆلا دانەنیاسینا کەیسا ئەنفالان وەک (جبنوساید) ل کۆمەلگەها ناڤدەولەتی و ناڤەندێن جیهانی ڤە هاتە کرن، نەک (بریارێن دادگەها بلندا تاوانێن ئیڕاقێ) هاتە بجهئینان ژ وانا قەرەبوویا قوربانیێن ئەنفالان!، نەژی کۆمپانیێن بیانی ئەوێن هاریکار و پشتەڤان بۆ رژێما بەعس یا گۆر ب گۆر کرین و نە جاش و موستەشار هاتن سزادان!، نە ئەنفالبوویێن هاتین زیندانکرن د کەلهێن (نزارکێ، سەلامیێ) ب زیندانیێن سیاسی هاتن هەژمارتن و نە پارچە زەڤیێن وان ل بەحرکێ بۆ هاتن ڤەگەراندن! نە کەلها نزارکێ بۆ مۆزەخانە بۆ نیشاندانا دەردەسەری و ئێش و ئازارێن ئەنفالبوویان کێشاین و نەژی مۆنۆمێنتا شەهیدێن ئەنفالا بەهدینان ل دهۆکێ هاتە چێکرن!!
سوبەهی ئێک ژ دەرڤەی وەلاتی قەستا دهۆکێ و دەڤەرا بەهدینان بکت دێ چەوا ئەڤان هەمی قوربانیدانا پێ دنە باوەرکرن؟ دەیکەک کو هەڤژینا شەهیدی و دەیکا پێنج شەهیدان هەتا نوکە ل ئێک رێورەسمی نەهاتییە رێزلێنان نە ژ ئالیێ چ بەرپرسێن حوکومی و حزبی و نە وەزارەتا شەهیدان و ئەنفالکریان و نە رێڤەبەریا شەهیدان و ئەنفالکریان ل دهۆکێ و نە سەنتەرێ ئەنفال و نە رێکخراوا 88 و خوە ژ ئالیێ ئێکەتیا ئافرەتێن کوردستانێ ژی وەک بچویکترین پاداشت ل هەمبەری وێ زەحمەتکێشان و قوربانیدانا ڤێ ژنێ ل پێخەمەت وەلاتی! و چەندین دایکێن دی نموونێن زیندی یێن ڤێ پشگوهخستنێ نە!.
ل ڤێ دوماهیێ داخوازیێن مە ب تنێ ئێکگرتنا پارتێن کوردستانی بوو بۆ ئاڤاکرنا وەلاتەکێ سەربخوە و شادبوون ب دەولەتێ پێخەمەت بهەدەرنەچوونا خوینا شەهیدێن مە، لێ حەیف کو نەشیان وێ ژی بۆ مە بکن. بۆ دووبارە نەبوونا ڤان درەو و خاپاندنان ژ ئالیێ جهێن پەیوەندیدار و وێ رۆتینا هەر سال و کێشانا ئازاران، ئێدی مە ئەنفالبوویان چ نەڤێت و بلا سال رۆژا ئەنفالان ژی نەهێتە بیرئینان!
- پارێز
- (گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)