دگەل نووبوونا هەر ساڵەکێ هیڤیێن مرۆڤان ژی ل وەڵاتێن جیهانێ نوو دبن. ژبەرکو مرۆڤێ زیندی ئەوە یێ هیڤی هەبن. لەوما دبینین ل هەژارترین وەڵاتێن جیهانێ و ل وان کوژیێن کو گوهرینێن سەقای دربا خوە لێدای، کەسان هیڤیێن نوو هەنە. هەرچەندە دبیت پتریا جاران ئەو هیڤی ژ چارچۆڤەیێ بدەستڤەئینانا نانەکێ ترسی یان ئاڤەکا پاقژ بۆ ڤەخارنێ دەربازنەبن ژی. دبەرامبەردا ل وەڵاتێن خوەشحال ژی هیڤیێن مرۆڤان نوو دبن و دبدەستڤەئینانا دەستکەفتێن نوو و کەلەکەکرنا مولکێن پتردا دهێنە وێناکرن. ژخوە ل وەڵاتێن هەرە پێشکەفتی ئێدی هیڤیێن هندەك کەسان سنوورێن ڤێ جیهانا مە یا پان و بەرین دبەزینن و بەر ب کەوکەبێن دی و بۆشاییا ئاسمانی دچن.
هەڵبەت ل وەڵاتێ مە ژی ساڵ نوو دبن، لێ هیڤی هەر دکەڤنن. هێشتا هیڤییا وەڵاتییانە بەرمیلا گازێ یا پێرار وەربگرن. هێشتا هیڤییا فەرمانبەرانە مووچە ددەمێ خوەدا و شایستەیێن دارایی یێن گیروبوویی بهێنە دان. هێشتا هیڤییا پێشمەرگەیانە پلەبەرزکرن ددەمێ پلانکریدا بهێت. هێشتا هیڤییا رۆژنامەڤانانە ئازادییا دەربڕینێ و بدەستخستنا زانیارییان ئازادیێ ببینیت. هێشتا هیڤییا دەرچوویێن یەکەمێن زانکۆیانە دامەزراندنا بەری چەند ساڵان ببینن. هێشتا روحێن شەهیدان ل هیڤیا گەهشتنا ئارمانجا دەولەتبوونێنە. هێشتا هیڤییا هەڤچەپەرێن وانێن زیندی ژی خوەشیێن ژیانێ یە. تەنانەت هێشتا هیڤییا دەسەڵاتێ ژی هەر یا پار و پێرارە کو باجێن نوو دابهینیت و پارەیێ زێدەتر ژ وەڵاتیان وەربگریت.
بۆ گوهڕینا ڤێ رەوشێ ژی ئیرادە و کار پێویستن. ژبەرکو “هیڤیا دەرا خوەلیا سەرا”یە!