چیرۆکێن قەهرەمانی یێن سیارێن کورد، خۆشمێریا جڤاکا کوردی، نەبەردی و تۆڵهەڵدانا گەلێ مە ژ مێژەیە د ناڤا ڕۆپەلان دا هاتینە تۆمارکرن، لێ د پاڵ ڤان هەمی قەهرەمانیان دا نەبوونا ئێکگرتنێ و خیانەتێ و خۆفروشیێ و دۆراندنا ل سەر مێزا دانوستاندنان ئەوێ ژی ژ مێژەیە قەیدا خۆ ل دیرۆکێ دایە. دگەل بهارا ئازادیێ دەلیڤین باش هاتن پێش دا گاڤێن مەزن بەرەڤ ئارمانجا ژ مێژە بوویە ئامانج بهاڤێژین و خەیالا ب سەدان ساڵی ببیتە ڕاستی. لێ دگەل خالێن لاوازێن مە کو خۆ د نەبوونا سەرکرداتیەکا هشیار دا دبینیت ل هەمبەری جیهانا ڤی سەردەمی و کاودانێن هەرێمی و جیهانی و هەبوونا تۆڤێ خۆ فرۆشیێ و سڤکدیتنا کوردی ل هەمبەر هەڤسویان ئەم لاواز کرینە. گەر دەوڵەت ئارمانجا مە با، دڤێت ل دەستپێکێ مە تاک هشیارکربا و دۆزا کوردی د کڤانێ عەشیر و هۆز و خێلەک و دەڤەران دا دەرباز کربا و تاک وەک کورد مە دابا ئاڤاکرن. لێ د پاڵ ڤان دا دەسهەڵاتا مە هزرا ئۆلی یا توند ژی ل سەر مە سەپاند و هەمی ڕێک ل بەر گەلی هاتن گرتن. د ناڤەندێن جیهانی یێن ڤەکۆلینێ و هند جهێن بریارێ دۆزا کوردی ل سەر مێزێن دانوستاندنێ بوو و ل ژێر ڤەکۆلینا شارەزایێن سیاسی و دیرۆکی و جوگرافی و ئابووری دا، هەڵسەنگاندن بۆ دهاتنە کرن. لێ دابەشبوونا کوردی یا باشوور ل سەر ڕەنگ و دەڤەر و هزرا ڤەمای یا هۆز و عەشیران و دووبەرەکیا سەرکرداتیا کوردی و ئێکنەگرتنا هێزێن لەشکری و سازیێن حکومی هەمی پێنگاڤ کرنە خەونەکا دڕێژ یا کو بەرهەمێ وێ ب تنێ خرشبوونە.
ئەڤڕۆ هەرێما کوردستانێ ئەوا ب ناڤێ هەرێما ئێک نەگرتیا کوردی دەنگ ڤەدای ل ژێر گەفێن هەرفین و ژ ناڤچوونێ یە و بەرپرسێن وێ مژویلی تاڵانکرنێ نە و گەل ب گشتی یێ د خەوا گران دا. لەورا یا فەرە هێشتا دەم یێ لبەر دەست، ب هێزا هشیاریا خەلکی سەرکردە ل سەر مێزێن دانوستاندنا کوردی کوردی رویننخار و ئێکگرتنا هەرێمێ بهێتە ڕاگەهاندن و دۆزا مە ژ چارچۆڤێ حزبایەتیێ ببیتە دۆزا نەتەوەیەکێ و قەیرانێن سیاسی یێن دەستکرد ژ ناڤ بچن دا بەلکی د ڕۆژەکا نەدیار دا بگەهینە ئارمانجا خۆ.
- (گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)
