ئەگەر ئەم چەند بکەین و بێژین دەربارێ مێژوویا هاتی رویدان، ب تایبەت دەربارێ وێ مێژوویا ب لاپەرێن رەش هاتی تۆمارکرن، ب دیماهیک ناهێت و نازڤریتەڤە. ئازراندنا برینێن بریندار نابیتە چارەسەر، بەلکی زۆر جار رەنگە ئەو برین هێشتا کوورتر و مەزنتر ببیت. ئەڤە دێ کاریگەریەکا نیگەتیڤ ل دەوروبەر دروست کەت و بەڕدەوام دێ وەکەت دورماندورێ بازنەکێ بچیک بمینین. یا گرنگ ئەوە ئەم ل هەڤدوو ببورین، وانەکێ ژ وان لاپەرێن رەش وەربگرین و رێکێ نەدەین زێدەتر لاپەرێن رەش بکەڤن سەر یەک. یا ژ هەمیێ گرنگتر وانەکێ ژ کارێن باش ببینین و دووبارە بکەین و پەرە پێ بدەین. زۆر جار کێشە ڤێرە دروست دبیت. چونکی دێ بینی کەسەک یان لایەنەک دێ ل بەرامبەری خۆ بوریتن. لێ کەسێ بەرامبەر بێ ویژدانە، وازێ ل ڤێ رەفتارێن نەشرین و نەمرۆڤانە نائینت. هەر دێ بەردەوامی دەتێ و ئامادەیی تێدا نینە لاپەرەکا سپی و ل خۆ زڤرین تۆماربکەت. ژ بەر هندێ ئەڤە دێ بەر نەفرەتێن مێژووێ کەڤن.
ل ڤێرە پێتڤیە یاسایەک هەبیت ڤی کەسی راوستینت دا کەسەکێ دی چاڤ ل وی نەکەتن. سەر ئاستێ تاکە کەسی زۆرا گرنگە هەڤدوو ببورین ب تایبەت دەمێ زۆر جار تاوانەکا نەژدل، ئانکو (بێ دەستی) ریددەت. ڤێجا چ هاتن و چوونا ترۆمبێلێ بیت یان چەکی بیت یان هەر تشتەکێ دی بیت. زۆر جارا کەسێ تاوانبار کەسەکێ بێ دەسەڵات و لاوازە ، کەسێ بەرامبەر کەسەکێ بهێزە. ل ڤێرە کەسێ بهێز ب ساناهی دشێت تۆڵێ ل ڤی کەسی بکەتەڤە، لێ دلۆڤانی یان توڵڤەکرنا خۆ دێ سەلمینت. ل دیماهیکێ زۆرا گرنکە کو روحا لێبورینێ دەربێخیت و ل ئەڤی کەسی ببورن. لێبورین ئێکە ژ وان هەڵویستێن هەرە جامێرانە کو مرۆڤ ئەنجام ددەت. تاکێ کورد ب گشتی و ب تایبەت سەرکردێن مە یێن نها ئامادەنە کەسێن بیانی ببورن. بەلێ زۆر کێم ئەو ئامادەیی تێدا نینە کو هەڤدوو ببورن. تایبەت دەمێ کێشەکا سیاسی ریددەت. ئەڤە کێشەکا مەزنە ناڤا کۆمەلگەهێ مەدا و ڤێ وەکریە کو پارچە پارچه ببین و یەکگرتی نەبین.
هەر ڤێ پارچە پارچەبوونێ وەکریە دوژمن زەفەر ل مە ببەت و زۆر دەسکەفتیان ژ دەست بدەین. نوکە حالێ حازر هێزێن مە یێن سیاسی زۆر پێتڤی لێبورینێینە. پێتڤیە پێکڤە برینا دەست نیشان بکەین و ل دەرمانێ چارەسەری بگەرێین. دڤێت واز ل دوژمنداری و رەق و کینێ بهێنن، چونکی ئەم پێتڤی هەڤدووینە. بێ هەڤدوو ئەم نەشێین شەرێ مافێن خۆ بکەین، بێ لێبورین و نیەت پاکژی نەشێین ل بەغدا شەرێ مافێن دەستووری و یاسایێ یێن خەلکێ خۆ بکەین، نەشێین دەڤەرێن کوردستانی کو هاتینە داگیرکرن رزگار بکەین، ب زەحمەت بشێین چ پێنگاڤەکێ بەرەڤ پێش بهاڤێرین. زۆرا گرنگە لاپەرەکا سپی دگەل هەڤدوو هەلبدەینەڤە ب تایبەت سەرکردەکان، وازئینان ژ دووبەرەکی و ململانێن بەرتەسک و دەرمانکرنا برینان دێ هاوڵاتی خێر و خوشی تێدا بینت. ژبەر کو زۆربەیا ناکۆکیان هەر هاوڵاتی قوربانیێن یەکێنە.
- مامۆستا
(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)