رەنگە زۆر کورد هەتا نوکە هەمی هیڤی و ئۆمێدێن وان ئەو بن کە کوردستانا مەزن یەکبگریت و دەوڵەتەکا سەربەخۆ دروست بکەن. بەلێ یا راستی دیتنا من ئەڤە خەونەکە ب تایبەت ئەگەر خودانێ ڤێ عەقلیەتێ و ڤێ سیاسەتێ بین. گوهرینا ڤێ عەقلیەتێ رەنگە ئەویش هەر خەون بیت. هەر ژ کەڤندا ئەگەر لاپەرێن دیرۆکا کوردا هەڵبدەی دێ بینی ئەگەرێ سەرەکی کورد نەبن دەوڵەت، ناکوکیێن نافخۆیی بینە. ئەوجا ئەگەرێ دیکە وەڵاتێن بیانی رێگر بینە. جودا دێ نوکە بەحسێ رەوشا هەر پارچەیەک ژ وان کەین ب کورتی ب نموونێن زیندی. باشوورێ کوردستان نها باشوورێ کوردستان (٥) ملیۆن کەس دژین، بەلێ ئەڤ پارچە یەکگرتی نیە. جۆرەکێ ناکۆکیێن مەزن و ترسناک زۆر جار دەردکەڤن. تەنانەت پرسیارەکا مەزن سەر دیموکراسیەت دروست بیە. پشتی ژدەستدانا نیڤەکا ئەردێ باشوورێ کوردستان و دوو ئیدارەیی ژلایێ پارتی و یەکێتی ب باشی رەنگ ڤەدایە. گرتنا کادرێن هەڤدوو بێی دادگەه خەتەرەکا مەزنە، ژبەر کو هێزێن چەکدار نیشتیمانی نینە و چ گرەنتیەک نیە شەڕ رینەدەت رۆژئاڤایێ کوردستان ناکۆکیێن ئەنەکەسە تەڤدەم هەر دەستپێکا داعش دەرکەڤتن. ئەڤ ناکۆکییە ددەمەکێدا بوون کە دەرفەتەکا زێرین هاتیە پێش کە دووبارەبوونا ڤان دەرفەتان زحمەتە و رەنگە قرنەکێ دی نەزڤریت.
سەرەرای مەترسیەکا مەزن رۆژئاڤا هەبوو هێزێن سیاسی نەشیا ناکۆکیان بهێلن، سەدەهان کەسێن سیاسی ژ لایێ دەسەڵاتا کوردی هاتن گرتن و بارەگەهێن وان هاتن دائێخستن. ژلایەکێ دی پشترا رۆژ ب رۆژ باژێرێن رۆژئاڤایێ کوردستان ژ دەست ددان کە خوین دهاتن رزگارکرن. باکوور کوردستان چەند ساڵە باکوورێ کوردستانێ خەباتا چەکداری ژلایێ پەکەکێ دەستپێکریە. لێ سەرکەفتی نەبوە، لێ خەباتا مەدەنی و بەشداریکرنا پرۆسێسا هەلبژارتن ژلایێ هەدەپێ سەرکەفتنێن مەزن تۆمار کرن. دیسان ب هزارا سیاسیێن کورد دناڤا پارتا دەسەڵات شیایە جهێ خۆ بکەن و پێگەهێن مەزن هەنە. چەندین حزبێن کوردی دەست ب خەباتا مەدەنی کریە، هەرچەندە کێشەیێن ناڤخۆیی هەنە. بەس نە ئاستەکێ وەکی باشوور و رۆژئاڤایێ کوردستان. هەرچەندە هەر ژمارەک ناڤا پارتەکا جودا کاردکەن، بەلێ تڤیابا دگەل هەڤدوو هاریکار بن د بابەتێن نەتەوەییدا. دیسان چاکسازیکرن دهەمی کەرتاندا، کێشا باکوورێ کوردستان ئەوە هەر پارتەک خۆ دکەت خودانێ پرۆژێن نەتەوەی و هەر کەس دگەل سیاسەتا وان نەبیت چەند خەباتێ بکەت و چەند بەرهەم هەبیت، هەر لێ رازی نینە. رۆژهەڵاتێ کوردستان راستە کێمترین ناکۆکی هەنە، رەنگە ئەڤ بزڤریت بۆ هندێ کە ئەسلەن هێشتا خودانێ چ نینە هەتا کێشە سەر تشتەکێ رویبدەن. بەس گرنگە پێکڤە فشارێن بێخن سەر دەسەڵاتێ کە زیندانیێن سیاسی بهێن بەردان و رێکا خەباتا مەدەنی ڤەکەن. فشارێ بێخن سەر رێکخراوێن بیانی کە ڤی ددەمی دا بهێن پاراستن و دورپێچێن ئابوری ژلایێ ئەمریکا دهێن دانان.
خالەکا دی ناکۆکیێن هەر چار پارچان دگەل ئێک و دوو کە ژ هەمیان وێرانترە: مەزنترین کێشا کوردان ل سەر هندێ یە کا کێ دێ بیت برا مەزن و کێ دێ بیت برای کچکە. هەر پارچەیەک کوردستانێ کۆمەکا کێشەیان هەنە. ئیجا تۆ بیر بکە بێژین کوردستانا مەزن دێ چ کەرەسات رویدەن کە هەژمارا وان پتری 40 ملیۆن کەسن. سەدەهان هێزێن سیاسی هەنە هەر ئێک ژ وان چەکدارە. هێشتا هەمی هێزێن کوردی سەر ئالایەکێ رێک نەکەفتینە پا چەوا دێ سەر دەسەڵاتێ رێکەڤن. پەکەکێ دگەل پارتی ل سەر ناکۆکیا شەڕێن خویناوی رویدانە. هەر دیسان پەکەکێ دگەل حدکا، یەپەکێ دگەل پارتی، پارتی دگەل یەکێتی و یەکێتی دگەل ئەنەکەسە. یەکێتی دگەل پارتی جۆرەکێ ناکۆکی هەنە کە رەنگە دوو لایەنێن سیاسی نەبینی یەکگرتی بن خالەکا دیکە ژ بلی کورد خۆ دوژمنێ خۆیە. سەرەرای ڤێ وەڵاتێن دەوروبەر دوژمنن، وەکی چەوا باشوورێ کوردستان داخازا دەوڵەتێ دکر هەمیان یەکگرت و دوژمناتی کر. ئەڤە ددەمەکێ دا بوو هەتا دوهی تورکیا و ئێران دوژمنێن هەڤدوو بین، بەلێ سەر دژاتیا کیانەکێ سەربخۆیێ کوردا یەک هەڵویست بوون.
دیسان ئێران دگەل تورکیا، سوریا و عێراق رێککەفتن کە دژاتیا پەکەکێ بکەن. هەر دیسان ئەڤ وەڵاتە شریکن دژی رێڤەبەریەکا خۆسەر ل رۆژئاڤایێ کوردستان دراوستن. وەڵاتێن زلهێزێن جیهانێ وەکی پێتڤی هاریکار نەبوونە بۆ پشتەڤانیا مافێن کوردا. ئەڤە هەر ئەو وەڵات بین کوردستان دابەشکری. ب دیتنا من تاکە چارەسەر بۆ کوردستان ئەوە هەر پارچەک جودا کار بۆ خەباتا خۆ یا سەربەخۆیێ بکەت و چارەنڤیسێ خۆ دیار بکەت. مایتێکرنێ دپارچا دیکەدا نەکەت ب تنێ ئەگەر ب رازیبوونا وان هاریکاریێ بکەت، یان ئەگەر مەترسیەکا دەرەکی درووست بیت. ب راستی تاکێ کورد زۆر ماندی بوو، زۆر قوربانی دا ژلایێ دەسەڵاتدارێن ناڤخۆیی و بیانی. پشتی دەسەڵاتدارێن باشوور و رۆژئاڤا هاتن جەرباندن و سیاسەتا وان هات دیتن، نوکە ئەولەویەتا تاکێ کورد چاڤ ل ژیانەکێ یە کە تاما ژیانێ لێ بهێت دویر ژ دووبەرەکی و ململانێ. ژیانەک کە کەرامەتا مرۆڤی پاراستی بیت، ب چاکسازی و ئاڤەدانیێ دەست پێ بکەت.
- مامۆستا
(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)