ئالا رەمزا ناسینا مللەتایە و د هەر وەڵاتەکیدا جهێ رێزگرتنە. هەر کەس فەخرو شانازیێ ب ئالایێ خۆ دبەت. هەر چەندە جهێ ئەسەفە کو هێشتا هەر چار پارچەیێن کوردستانێ ل سەر ئالایەکێ رێک نەکەفتینە. ئەڤە د دەمەکێ دایە کو زۆر جار بەحسێ یەکگرتنا هەر چار پارچەیان دکەن. ب هەر حال وەڵاتان ژبۆی نیشاندانا ڤیانا نیشتیمانی و رێزگرتنا ئالایی ل هەمی دامودەزگەهێن حکومی و نەحکومی دهێتە هلدان. ئەڤە وەدکەت هەر تاکەک هەست ب بەرپرسیاریەتی بکەت و ئالایێ وەڵاتی بپارێزیت. چونکی بن سێبەرا وی خزمەت دهێت کرن، ئاشتی و ئازادی لێ پەیدادبیت.
یا من دڤێت بێژم ئەوە کو ل هەرێما کوردستانێ رۆژا ئالایێ کوردستانێ کو دکەڤیتە 17/12/2018 دهێتە ساخکرن. یا جهێ دلئێشان و سەرئێشانێ ئەوە ئەوێ خۆ کریە نوینەرێ ئالایی کەسانێن گەنی و ژەهرکرینە، بازرگانیێ ب هەر تشتی دکەن و ل پشت ئالایێ کوردستانێ خۆ ڤەشارتیە. کەسانەک هەتا دوهی چەتە، جاش و خاکفرۆش بوون. ڤان کەسان مللەت تویشی بێزاری کریە ب جۆرەکی کو هەستا نشتیمانی دەڤ تاکێ کورد رۆژ ب رۆژ لاواز دبیت. ئەڤ کەسە هەر ژ پێلاڤا وان بگرە هەتا کولاڤی هەمی ب دزی و گەندەڵی ئینایە و ل سەر حسابا خوینا شەهیدان بووینە ملیاردێر. ئەڤ جۆرە کەسە دێ رابن ڤی ئالایی دبەژنا خۆ ئالینن و نیشاندەن کو مە ئالا خۆش دڤێت. دێ ب ئاخفتنێن بریقەدار وەسف کەن کو مە نیشتیمان خۆش دڤێت. دناڤا راگەهاندنێدا دێ موزایدێ کەن و ب زمانەکێ درێژ بەحسێ بەرگریکرنا ژ ئالایی کەن. بەلێ دراستیدا ئەڤان جۆرە کەسان نیشتیمان هەتک کریە. نە ب تنێ ئالا بێ قیمەت کریە، بەلکی مرۆڤ یێ بێ قیمەت کری کو ل سەر ڤی ئەردی ژ هەر تشتەکی ب قیمەترە. ب تنێ بەرژەوەندیێن تاکی یان حزبی ساخ بن یا دی هەر نەخەمە. مێژوویا ڤان کەسان ب چەند لاپەرێن رەش تۆمارکریە. ئەڤە نەک رێزێ ل ئالایی ناگرن، بەلکی تا رادەکێ زۆر دژاتیا کوردستان و ئالایی ژی دکەن. بەلێ خۆ ب ئالای پێچایە و هەر گاڤا دبەرژەوەندیا واندا بیت دێ ئالای ب مرۆڤڤە فرۆشن و چ گرەنتیەک نییە. ئاها ئەڤەیە خزمەتا کەسانەکی کو ل سەردەمێ حزبا بەعس و عێراقێ دەمێ حکومدار بوون، ب تنێ ئالایێ حزبا بەعس و عێراقێ دهات دیتن و زۆرداری ل خەلکی دکر و هەمی کوردستانیان ئەڤە ب دوژمن دناسی.
لێ ئەڤرۆ سەردەمەکێ دیکەیە و وان کەسان ئالایێ کوردستان ل خۆ پێچایە و ب زمانێ کوردی دئاخڤیت. بەلێ رێبازەکا نەدروست پەیرەو دکەن و ب تنێ کەسێن نزیک خۆ دپارێزن و خزمەتێ بۆ دکەن. رێکێ نادەن بڕیارەک ژبلی بڕیارێن وان پێ باش دەرکەڤیت. هەردەما بەحسێ نەدادپەروەریا دەسەڵاتێ بکەی دێ رەوشا سوریا ئینن پێش چاڤێ مە. ئەڤ ئەخلاقە دویرە ژ وێ خەباتا سەرکردێن کورد بۆ دکری ژ وان (شێخ سەعیدێ پیران، شێخ مەحموودێ حەفید، پێشەوا قازی محەممەد و مەلا مستەفا بارزانی). دڤێت ئەم هەمی رێزێ ل ئالایێ کوردستانێ بگرین و ئەم هەمی ل بن سیبەرا ڤی ئالایی یەکسان بین د ئەرک و مافاندا ب هەمی جیاوازیێن خۆڤە. پێتڤیە کەسێن دەستپیس ل خۆ بزڤرن و لاپەرەکا سپی ڤەکەنەڤە، تەوبەکا دروست بکەن. ئەگەر نە دێ بەر غەزەبا خودێ و جەماوەری کەڤن. وەکی چەوا گەلەک کەس بەر غەزەبێ کەفتین و خلاس نەبووین.
· مامۆستا
(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)