جەنابێ سەرۆك.. وەك هوون ژی دزانن بەعسی هەتا راددەیەکی شیابوون خاک و خەلکێ شنگالێ ژ کوردستانێ ڤەقەتینن. ئەو ژی ب گەلەک رێکان کو یەك ژ وان گۆهرینا ناسنامەیا کوردی یا ٨٠٪ ژ خەلکێ ئێزیدیێ وێ دەڤەرێ و کرینە عەرەب! ئەڤە ل سەر ئاستێ نەتەوی گۆرزەك بوو ب خەلکێ وێ و کوردستانێ کەتی. لێ ل سەر ئاستێ تاكی دبیت “عەرەببوونێ” سوود گەهاندبیتە هندەكان. ژبەرکو ل عیراقێ هاونیشتیمانیێ عەرەب پتر ماف هەبوون ژ هاونیشتیمانیێ کورد. بۆ نموونە مافێ خاندنێ ل هەموو کۆلیژ و زانکۆیان، دامەزراندنا دهەموو پۆستاندا، تاپۆکرنا مولکی و گەلەک مافێن دی کو کورد ژێ هاتبوونە بێبارکرن ب تایبەت ل سنوورێ پارێزگەها مووسڵ (نەینەوا) کو شنگال ژی گرێدای وێ یە. هەڵبەت پشتی کەتنا سەدامێ دکتاتۆر خاكا شنگالێ زڤری باوەشا کوردستانێ، لێ ب نەرینا من پتریا خەلکێ وێ نەزڤری و هەستا ئینتیمایێ بۆ نەتەوەیا کوردی وەکو پەقیشکەکا سابوونێ بوو ل ئەسمانێ شنگالێ و دگەل هاتنا داعش ب ئەردی کەت و بژاڵەبوو!؟
جەنابێ سەرۆك.. من ل ساڵا ٢٠١١ سەرەدانا شنگالێ و چیایێ وێ کر. ئەز چەند رۆژان لێ مام و دگەل خەلکی ژیام، من بەرپرسێن یەکەمێن حزبێن دەستهەڵات و ئۆپۆزسیۆنێ دیتن، ئێزدیێن “کورد” و یێن “نەکورد”، سەرۆکێ جڤاتێ، رێڤەبەرێن میری، فەرماندەیێن پێشمەرگەی، ئۆلدار، پەرلەمانتەر، بەرپرسێن ئەمنی، رەوشەنبیر، هونەرمەند، ژن، مختارێن گوندان، جۆتیار، بێکار، مامۆستا، قوتابی و خویندکار و خەلکێ سادە ژی دیتن. هەروەها دماوەیێ چار ساڵێن دەربازبووییدا من دیدار و دانوستاندن دگەل ب سەدان ئاوارەیێن شنگالێ کرن و بەردەوامم. پتریا جاران ب شێوەیەکێ ڤەشارتی یان ئاشکرا ئاماژە ب وێ یەکێ دهێتە دان کو دەستهەڵاتدارێن کورد ب دەستەکێ “ئاسنین” رەفتار دگەل خەلکی دکرن! ڤێ یەکێ ژی پتریا ئێزیدیێن شنگالێ تووشی شۆکێ کربوون. ژبەرکو وان هزردکرن کو پشتی ٢٠٠٣ ژبلی ناسنامەیا وان، دێ مافێن وان ژی پتر و باشتر بن. لێ وەکو گەلەک ژ وان دهەلکەفتێن جودادا دیاردکەن کو رەوش بەرەڤاژی وێ هزرکرنا وان بوو!
بۆ نموونە مافێ دامەزراندنێ ل هەموو دەزگەهان نەما، بەرپرسێن کورد وەکی یێن عەرەب سەرەدانا مالێن وان نەدکرن، ب چاڤەکێ کێم ل ئۆل و باوەریێن وان دنەری، نانێ وان نەدخار، ب ئاخفتنێن زڤر و توند موخاتەبا بچووک، مەزن و ماقوولان دکرن، گەلەک ژ وان کەسێن ل سەردەمێ بەعس ژبەر کوردبوونێ هاتینە ئازاردان، رەوشا وان خرابتر لێهات. شنگال ب گشتی وەکو خانەکا چاڤدێریا جڤاکی بوو و دەستهەڵاتداران هند نان ددایێ کو دان بۆ دانی بژین و قەت هزرا کار و پرۆژەیەکێ جدی بۆ نەدکرن و…هتد.
جەنابێ سەرۆك.. ب کورتی من دڤێت بێژم کو لێگەریانێن من یێن ڤان ساڵان ئەز گەهاندمە وێ باوەرێ کو سەدەمێ سەرەکی یێ دوورکەتنا ئێزیدییان (ب تایبەتی یێن شنگالێ) ژ کوردان و ئینکارکرنا ناسنامەیا کوردی نە ژبەر “شکەستنا” هێزێن کوردی بوو ل شنگالێ، بەلکو کار و رەفتارێن هندەك دەستهەڵاتدارێن کورد زەمینە بۆ ڤێ چەندێ خوەشکربوو و هاتنا داعش تنێ دەرفەتەك بوو بۆ دەرکرنا وان کولێن کەلەکەبوویی. هەرچەندە ل دوو ساڵێن بەری هاتنا داعش رەفتارا دەستهەڵاتداران نەرمتربوو، لێ هندە نەڤەکێشا کو خەلک توندییا بەرێ ژبیربکەت. کارڤەدانا ڤێ ژی ئەوە کو نوکە هژمارەکا زێدە یا ئێزیدییان خوە ب کورد نزانن و تەنانەت هندەك کادرێن پێشکەفتی یێن بەرێ یێن پارتی ل شنگالێ سەرکێشییا ڤی رەوتی دکەن!
جەنابێ سەرۆك.. تشتێ ئەز پاڵدایم بۆ نڤیسینا ڤێ نامەیێ ئەوە کو ئەز هەست دکەم ئەزموونا تاڵ یا شنگالێ نوکە یا ل دەستپێکا دووبارەبوونێ ل دەڤەرا مە و، ب باوەرییا من ڤێ جارێ دێ بیتە سەدەما دوورکەتنا خەلکی ژ (بارزانی). ئەڤجا ژبۆکو دهۆك یان هەر دەڤەرەکا دی یا کوردستانێ ب دەردێ شنگال و خەلکێ وێ نەچیت، پێویستە هوون رێکێ نەدەن “زڤری” و “توندی” ببیتە پەیرەوێ کارێ نوونەرێن وە (بەرپرسێن پارتی ل دەڤەران). ژبەرکو جەنابێ وە ب ئاخفتنا ماقوول و خوەش ناسکرینە و خەلكەکێ زێدە ب تایبەتی ل بەهدینان ژبەر وێ ئاخفتنێ ب وەڤە هاتییە گرێدان. لەوما پێویستە نوونەرێن وە ژی هەلگرێن هەمان خاسلەتێن وە بن یانژی ب کێمی بەرەڤاژی نەبن.
سڵاڤ و گولاڤ