بەری ١٥ ساڵان سەرۆك مەسعوود بارزانی سەردانا زانکۆیا دهۆك کر. مامۆستایەکێ پێشنیازکر دکتۆرایا شانازیێ بدەنێ. لێ جەنابێ وی رەتکر و گۆت ڤان کاران نەکەن، ژبەرکو دێ بنە هۆکارێ دروستکرنا دکتاتۆران. لێ ئەڤرۆ حکوومەتا کوردستانێ کو پارتییا وی و نێزیکترین کەسێن وی سەرکێشیێ دکەن، هندەك پێنگاڤان دهاڤێژیت کو بەرەف وێ ئاراستەیێ دچیت یا وی رەتکری و هۆشداری ل سەر دای. دیەکەمین پێنگاڤدا کەسانێن “ئەمنی” ئینانە پێش، ددەمەکیدا کێشە و ئاریشەیێن مەزن، سەرەکی و بنگەهین یێن خەلك و خاکا کوردستانێ ئابوورینە و پێویستە کەسانێن ئابوورناس بیننە پێش دا خزمەتا دروشم و پرۆژەیێ “چاکسازیێ” بکەن کو گەلەك بەحس ل سەر دهاتە کرن و هەیامەکە کز بوویە.
هەروەسا ددەم، هەلکەفت و ل سەر بابەتێن جودا یەك ب یەك مافێن مرۆڤی یێن سەرەکی ژ تاکێ کورد دهێنە “ستاندن”. بۆ نموونە دگەل دەرکەتنا کۆرۆناڤایرۆس و تا نوکە ب شێوەیەکێ رێژەیی مافێ ئازادییا هاتوچۆیێ ژ خەلکی هاتییە وەرگرتن، پاشی ژبەر بابەتێ پاراستنا ئارامیێ مافێ خرڤەبوونێن ئاشتیانە ل هاوڵاتییان هاتە قەدەخەکرن، ددووڤدا ژبەر “رێکخستنا کاری” دروستکرنا کۆمەڵە و رێکخراوان هاتیە گیروکرن، نوکە ژی ب “بەهانەیا” رێکخستنا میدیایا ئەلەکترۆنی دخازن مافێ دەربڕینێ ژ رۆژنامەڤان، چالاکڤان و تەنانەت مرۆڤێن ئاسایی ژی بستینن. ئەڤە ژ مافێن مرۆڤان یێن سەرەکینە و هەر دەسەڵاتا ڤان مافان ژ خەلکی بستینیت، بەرەف دکتاتۆرییەتێ دچیت. ئەڤجا نزانین سەرۆك مەسعوود بارزانی های ژ رەوشێ هەیە یان دەست ژ بۆچوونێن کەڤن بەردایە؟!