زانستێ سەربازی و ناڤەرۆکا پتریا وانە و بابەتێن تیۆری و مەشق و راهێنانێن پراکتیکی یێن ئەکادیمییا سەربازی دبێژنە مە؛ هەبوونا سووپایەکێ رێکخستی، مەشقدای و خودان سیستەم و دسپلینەکا لەشکری یا توند. دگەل بەردەستبوونا چەك و ئامیرێن سەردەمی و پێشکەفتی یێن سەربازی و هەبوونا هژمارا زۆرا سەربازان. زێدەباری پشتەڤانییا ماددی یا مەزن، مسۆگەر و بەردەوام بۆ سووپای، هۆکارێن سەرەکینە بۆ تۆمارکرنا سەرکەفتنان د بەرەیێن بەرەڤانیکرن، هێڕشبرن و شەڕاندا. لێ دیرۆکا نێزیك یا شۆرەشێن کوردی و ب تایبەتی یێن نیڤا دوویێ ژ سەدسالا دەربازبوویی و ب تایبەتیتر شۆڕەشا ئەیلوولێ و داستانێن پێشمەرگەی ب سەرکردایەتیا بابێ رۆحیێ نەتەوا کورد، بارزانیێ نەمر هندەك راستیێن دی ئاشکەرا دکەن. گەلەك جاران ژی ڤان تیۆریێن سەربازی بەرەڤاژی دکەن. ژبەرکو پێشمەرگەی ب هژمارا خوە یا کێم و ب بێ مەشق و راهێنان و ب چەکێ سڤك و رێکخستنا سادە و نەبوون یان کێمبوونا پشتەڤانیا دارایی شیایە سەرکەفتنێن مەزن و یەکلاکەر تۆماربکەت. لێ مخابن گەلەك ژ پێشمەرگە و ئەفسەرێن گەنجێن ئەڤرۆ، ڤان زانیاریێن گەشێن باب و باپیرێن خۆ یێن پێشمەرگە نزانن. یانژی تشتێن کێم ل سەر دزانن و ئاگەهداری وردەکاریێن وان نینن.
ل ڤێرە ئەم دبینین کو گرنگە ئەڤ چالاکییە ب شێوەیەکێ زانستی دپەرتووكاندا بهێنە کۆمڤەکرن و ببنە بابەت و وانەیێن سەرەکیێن خاندنێ ل ئەکادیمیێن سەربازی یێن کوردستانێ. تێدا دیارببیت کا چاوا پێشمەرگە ب سادەییا خوە دشیا بۆ ساڵێن درێژ بەرگریێ بکەت. هەروەسا دگەلەك رەوشاندا هێڕشان ژی ئەنجامبدەت و شکەستنێن مەزن بگەهینیتە ئێك ژ مەزنترین و بهێزترین سووپایێن پڕچەکێن رۆژهەلاتا ناڤین. ئانکو بۆ نموونە دشێن ئاماژە بدەنە رویدانێن داستانەکا وەکی (زاویتە) کو ل ئێکەم ساڵا شۆرەشا ئەیلوولێ چێببوو و هینگێ پێشمەرگەی ب دروستی رێزێن خۆ رێکنەخستبوون. ژبلی کو ژمارەیا وانژی گەلەك یا کێم بوو، بەراورد دگەل سووپایێ دوژمنی. ب ڤی شێوەی قوتابیێن ئەکادیمی و ئەفسەرێن سووپایێ کوردستانێ دئێك دەمدا دێ ئاشنابن ل سەر ڤان چالاکییان و شرۆڤەکرنا وان ب شێوەیێن ئەکادیمی. هەروەسا دێ سوودێ بینن ژ شێوەیێ پلاندانان و ئامادەکاریێن پێشمەرگەی د رەوش و دەلیڤەیێن بەرتەنگ و ئالۆزدا. یا ژ ڤێ هەمیێ ژی گرنگتر ئەوە کو ئەفسەرێ گەنج ژبلی فێربوونا زانستێن سەربازی، هەروەسا دێ هزرا خوەگۆریکرنێ و باوەرییا ب سەرکەفتنێ ژی ل دەف وی خورتتر بیت، کو بنەمایێن سەرەکیێن رێبازا بارزانینە.
- ئەفسەرا هێزا پێشمەرگەیێ کوردستانێ.