وەك ئەم دزانین دەولەتێن جیهانێ پلانان دادنن، کاردکەن، داخازدکەن، پەرۆش و هاریکارن کو پارە ژ دەرڤەی سنووران بهێتە ناڤخوەیا وەڵاتی بۆ وەبەرهێنان و گەشەپێدانێ. بۆ ڤێ مەبەستێ ژی یاسایێن گونجای و رێخوەشکەر دادرێژن. حکوومەت ژی ئاسانکارییان دکەن بۆ جێبەجێبوونا ڤان کاران دا دلساری بۆ خودانێن سەرمایە و پرۆژەیان چێنەبیت. ژبەرکو ئەو پارەیێ ژ دەرڤە دهێت، چەندێ کێم ژی بیت بارێ دەسەڵاتێ سڤکدکەت و هیچ نەبیت دەرفەتێن کاری بۆ چەند کەسان پەیدادکەت و رێژەیا بێکاریێ و دئەنجامدانا یا هەژاریێ (ئەگەر ب پۆینتان ژی بیت) کێمدکەت. ئاشکرایە کو حکوومەتا کوردستانێ ژی دگەلەك هەلکەفتاندا گۆتیە و دبێژیت ئەو حەزدکەت کۆمپانی و رێکخراو بهێنە کوردستانێ کار و وەبەرهێنانێ بکەن.
لێ دپراکتیکێدا پارە ژ کوردستانێ دچیتە دەرڤە و دبەرامبەردا هندەك بەربەست هەنە بۆ ئینانا پارەی بۆ ناڤخوە. ئەڤە ژی گۆمانێ ل سەر رژدبوونا دەسەڵاتێ چێدکەت! نوکە رێکخراوەکا ئەورۆپی پرۆژەیەك هەیە کو هەیڤانە دێ هزاران دۆلاران ژ دەرڤە ئینیتە کوردستانێ، دەرفەتێن کاری بۆ کەسان پەیداکەت، ئاڤاهی، ئۆتۆمبێل، کەلوپەل و گەلەك خەرجیێن دی کرێکەت و کڕیت. هەروەسا دێ گەنجان فێری کار، کولتور و پێشەیێن جودا کەت. لێ مخابن ئەڤە چەند هەیڤە چاڤەڕێی وەرگرتنا مۆلەتا کارییە ژ حکوومەتێ و نادەت!. هەڵبەت بەری نوکە بۆ پرۆژەیێن هاوشێوە پارەیێ کوردستانێ چوویە دەرڤە و ب ئاڤێدا چوویە. ئەڤجا نزانین بەڕێز سەرۆکێ حکوومەتا کوردستانێ دزانیت کو دڤێ قەیرانا دارایی دا هندەك فەرمانبەرێن وی ناهێلن پارە بهێتە ناڤخوەیا کوردستانێ؟!
