دەسەڵاتا مە خوە ب دیمۆکرات و پێشکەفتخاز دزانیت. لێ دراستیدا جوداهییەکا بەرچاڤ دناڤبەرا واندا هەیە. ل وەڵاتێن دیمۆکرات و پێشکەفتنخاز مرۆڤ سەنتەرە و گرنگترین گرنگییە. لێ ل وەڵاتێ مە تنێ د تەنگاڤیاندا هزرا مرۆڤی دهێتە کرن و گرنگیێ پێ دهێتە دان. بۆ نموونە درەوشێن شەڕ و هەلبژارتناندا. واتە وەکی قوربانی کو بەری سەربڕینێ دهێتە چاڤدان و ربیتەکرن. ل وەڵاتێن دیمۆکرات و پێشکەفتی دگەل ژدایکبوونا مرۆڤی، دەسەڵات پێنگاڤان دهاڤێن بۆ پاراستنا ژیانا وی و مسۆگەرکرنا پاشەرۆژا وی. ل وەڵاتێ مە مرۆڤ ژدایکدبن زیندانی و قەردار. زیندانیێن هندەك یاسایێن بەرژەوەندییا تایبەت. هەروەسا قەردارێن ناڤخوە و دەرڤە ژبەرکو سامانێ ڤی وەڵاتێ دەوڵەمەند هەلمە و دچیتە ژۆری.
واتە ئەم گونەهێ ل پەیڤا (پێشکەفتن) دکەین دەما دکەینە پاشناڤ بۆ وەڵاتی. ژبەرکو وەڵاتەك کو حکوومەت و تاکێن وی قەرداربن پاشکەفتییە و زەحمەتە پێشبکەڤیت. هەروەسا چەواشەکارییە ئەگەر دیمۆکراتیێ بکەینە پێناسە بۆ سیستەمێ دەسەڵاتداریێ. ژبەرکو سادەترین پرەنسیپێ دیمۆکراتیێ کو دەربڕینە ل ڤی وەڵاتی قەچاخە و خەلكێ قەردارێ ڤی نیشتیمانی مافێ گلەییکرن و زانینا چارەنڤیسێ سامانێ وەڵاتێ خوە نینە و دبیت ل سەر ڤێ بهێنە زیندانکرن. هەڵبەت ل وەڵاتێ مە یاسایێن باش هەنە. هەروەسا ل دەوڵەتێن جیهانێ و تەنانەت یێن دیکتاتۆری ژی. لێ گەندەڵی ژی هەیە، ژبەرکو یاسا ناهێنە جێبەجێکرن. چارەسەری ژی نەئەوە پرۆژەیێن چاکسازیێ بهێنە دانان، بەلکو هەبوونا سەرۆکەکێ زیرەك و وێرەكە کو هێزا یاسایان بکاربینیت بۆ پەیرەوکرنا دیمۆکراتیێ و پەیداکرنا پێشکەفتنێ.