“کابینە”یا نەهێ یا حکوومەتا کوردستانێ دچەند هەلکەفتاندا ل سەر زارێ سەرۆك، وەزیر، گۆتەبێژ و نڤیسکارێن نێزیکی خوە، ب شێوەیەکێ راستەوخوە یان نەراستەوخوە “ئاماژە” ب وێ یەکێ ددەت کو وێ هەموو مووچە داینە و ئەو مووچەیێن نەهاتینە دان یێن کابینەیا پێشن! هندەك جاران ژی گەلەك ب ئاشکرا دیاردکەت کو هیچ پەیوەندییەکا ڤێ کابینەیێ ب ڤێ مەسەلەیێڤە نینە. ئەڤە ژی رەفتارەکا نەدروستە. ژبەرکو ٢٨ ساڵن هەمان حزب، هەمان سەرکردایەتی، هەمان هەڤپەیمان، هەمان سیاسەت، هەمان پەیرەو و تەنانەت هندەك ژ وەزیر و رێڤەبەران ژی هەمانێن کابینەیێن بەرێنە. واتە ڤێ کابینەیا نوکە پەیوەندییەکا رۆحی و جەستەیی ب هەموو کابینەیێن پێشیڤە هەیە و تەمامکەر و بەردەوامییەکا سروشتی یە بۆ وان کابینەیان.
ژخوە ئەگەر تەماشەی وێنەیێ مەزن یێ پێکهاتە و ناڤەرۆکا حکوومەتێ بکەین، وەسا دهێتە پێش چاڤان کو ژ ١٩٩٢وەرە یەك کابینە هاتییە دروستکرن و ئەڤا نوکە قۆناخا وێ یا نەهێ یە. هەروەسا ب باوەرییا مە و ل گۆر گەلەك پیڤەران ئەڤ حکوومەتە میراتگرا قۆناخێن بەری خوەیە و دڤێت خوە لێ بکەتە خودان. بەردەوامیێ بدەتە باشییان و شاشییان ژی چارەسەربکەت. ژبەرکو ئەڤ حکوومەتا کو ب وێرەکی و ئاشکرا دیاردکەت قەرزدارە و هیچ ددەستاندا نینە، ب “تۆمەتبارکرنا” کابینەیا بەرێ (خوە تۆمەتبارکرنێ) و خوەڤەدزینا ژ هەلگرتنا وی بارێ بەرپرسیاریێ، مووچەخۆران بێهیڤی دکەت ژ وەرگرتنا مووچەیێن گیروبوویی و پاشەکەفتکری و دوور نینە پشتەڤانیا لایەنێ خوە یێ سیاسی ژی ژدەست بدەت. بەرهەمێ ڤێ ژی کوردستانەکا بهێز نابیت.