پشتى هاتنا رێکخراوا تیرۆریستى یا ب ناڤێ (دەولەتا ئیسلامى ل عیراق و شامێ). ئەوا بەرناس ب داعش بۆ دەڤەرێ، و بڕینا بودجێ کوردستانێ ژ لایێ رێڤەبەرێن بەغدا. هەرێما کوردستانێ روى ب روى قەیرانەکا زێدە مەزن یا ئابورى بوویە. دگەل کو ئابوورا سەربخۆ ژى باندۆرا خۆ ل سەر ڤێ رەوشێ گەلەک ب زەلالى هەیە و یا بەرچاڤە ژى. ئەڤ قەیران دگەهیتە ئاستەکى کو ئێدى حکومەتا هەرێما کوردستانێ شیانا دابینکرنا مووچەیێت فەرمانبەرێت خۆ ژى نامینیت و ژ نەچارى کار ل سەر پاشکەفتکرنا پشکەکا مووچە دکەت. بڕینا بودجە، ئابوورا سەربخۆ، نەبوونا شەفافیەت و زەلالیێ د داهاتێ نافخۆ یێ وەلاتى دا و گەندەلیا زێدە د کەرتێ لەشکەرى دا. دوو ئیدارەیى، نەبوونا باوەریێ د ناڤبەرا هەر دوو کەرتێن کوردستانێ دا، کار گەهاندیە وى ئاستى کو بێهیڤیبوون د ئاستێ نەهێلانا بێکاریێ دا پەیدا کریە. هەروەسا ژ بلى ئەوا ل سەرى مە گووتى. خالا ژ هەمیان ب هێزتر کو بوویە ئەگەرێ پەیدابوونا بێکاریێ ل کوردستانێ، نەبوونا سکتەرەکێ بهێزێ تایبەتە کو مل ب ملێ سکتەرێ گشتى کارى ل کوردستانێ بکەت. نەبوونا ڤى سکتەرى ژى چەندین خال و ئەگەر ل پشت هەنە کو یا ژ هەمیان دیارتر دەست ب سەر داگرتنا زەلامێن دەولەتێ یە ل سەر ڤى کەرتى.
ئەڤرۆ ل کوردستانێ تەخەکا دەولەمەند و تەخەکا هەژار یێت پەیدا بووین. تەخا ناڤین ژی ئێدى ترسا ژ ناڤچوونێ یا ل سەر. دگەل نەمانا وێ تەخێ دێ ئابوور رویبروى مەترسیا هنگافتنێ بیت. لەورا یا فەرە کو حکومەتا کوردستانێ ژ بلى کارکرنا بەردەوام ل سەر بلۆکێت نەفت و گازێ و گرنگى دا ب کەرتێ چاندنێ و پیشەسازیێ و تۆریزمێ و …هتد، کار ل سەر بهێزکرنا کەرتێ تایبەت بکەت و بازارى دووبارە ڤەژینێ بدەتێ و ژ متا و کەلوپەلێت بیانى خالى بکەت و رێکێ بۆ کارێ ناڤخۆیى بەرفرەهـ بکەت. لەورا دێ بێژین، داعش هەتا کۆڤید-19 گەلەک بەرچاڤرونى دانە مللەتى و دڤێت حکومەت ب پلان بیت و کار بکەت بۆ نەهێلانا بێکاریێ و زەلالیا داهاتى.
(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)