هەرچەندە بریارا جام رەش کرنا ترۆمبێلان تشتەکێ ئاساییە و ل زۆرینەیا وەلاتێن جیهانێ ب ئاسایی دبینن. لێ بۆ ماوێ چەندین سالانە ل هەرێما کوردستانێ قەدەغەبوو. ئەڤە ژی بۆ وێ چەندێ ڤەدگەریت کو دڤان سالێن بووریدا دەڤەر ب گشتی دناڤ سەقایەکێ ئالۆزدا بوویە و هەرەشا تیرۆرێ و کارێن تیرۆرستی بوویە. بۆ ڤێ چەندێ ژی خۆشبەختانە دەزگایێن ئەمنی بۆ رێگریگرتن و پاراستنا دەڤەرێ ب تایبەت ل هەرێما کوردستانێ بریارا قەدەغەکرنا ترۆمبێلێن جامرەش دەرکر و بۆ وی دەمی بریارەکا دجهێ خۆدا بوویە. وەکو دیار نوکە ل هەرێما کوردستانێ بریارا ئاساییکرنا ترۆمبێلێن جامرەش هاتیە دەرکرن، بەلێ چاوا و ب چ رێک، کی سوودمەندە و کی زەرەرمەندە؟ چ پێ نەڤێت برێکا یاسایی هەر کەس دشێت ترۆمبێلا خو جامرەش بکەت، ئەوا مایی حکومەتێ نەگۆتی “رێڤەبەریا هاتنوچونێ بۆ جامرەشکرنا ترۆمبێلان ببهایەکێ گونجایی” ژبەرکو ئەڤ بریارە ب تنێ بۆ وێ ئێکێیە کو پارە بۆ خزینا حکوومەتێ بزڤریت. ئانکو بازرگانیە دگەل هاولاتی دهێتە کرن، دێ بێژین ئەو ژی باشە داکو ئابووریا هەرێما کوردستانێ بهێزتر بکەڤیت و حکوومەت بشێت مووچێ فەرمانبەران ب دروستی بدەت. چونکی بهایێن جامرەشکرنا ترۆمبێلان دڤی بارودۆخێ ئابووریدا نە دگونجایینە و دبیت کارتێکرنەکا دەروونی ل سەر هەڤوەلاتی پەیدا ببیت.
ژلایێ ئەمنیڤە ژی وەکی ئەم ل دەزگەهێن راگەهاندنێ دبینین و گوهلێ دبین هێشتا مەترسیا داعشێ ل سەر دەڤەرێ هەیە، ژلایەکی دیڤە ئەڤ بریارە دبیتە رێخۆشکەرەک بۆ ئەنجامدانا کارێن دەستدرێژی و ئینان و برنا کەل و پەلێن نە یاسایی وەک چەک و دەرمان و ڤەگوهاستنا چەندین کەل و پەلێن دیێن قەدەغە کری. ژبەر ڤێ چەندێ ژی دبێژم پێتڤی بوو ئەڤ بریارە ب تنێ ل سەر ترۆمبێلێن حکوومی و دەزگەهێن ئەمنی هاتبا رێ پێدان. ژمفایێن گشتی بۆ جامرەشکرنا ترۆمبێلان ب تنێ ئەوە کو جوانیەکا تایبەت ددەتە ترۆمبێلان.
(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)