ئەنوەرێ خێرنەدیتی ل رۆژا 3/8 سالا 2014 رێکخراوا تیرۆرستی یا داعش هێرش کرە سەر باژارێ شنگال و گوند و کۆمەلگەهێن دەردۆر ب تایبەتێ کۆمەلگەها گرزەرک و سیبا شێخدر کو دکەڤنە باشوورێ چیایێ شنگالێ. ل هەردوو کۆمەلگەهان خەلکێ بەرەڤانی ژ خۆ و خێزانێن خۆ کرن و بۆ ماوەی چار دەمژمێران ب چەکێ خۆ یێ سڤک ل بەر دوژمنی راوەستیان و سەنگەرێن شەڕی چۆل نەکرن. ل وێ دەمێ بابێ ئەنوەری دوماهیک کەس بوو کو د سەنگەرێن شەڕی دا مای و قەت پاشڤە نەزڤری هەتا کو وان دڕندەیان ل چەپەری دا شەهید کری. هەڤالێن وی یێن بەری وی ژ سەنگەری دەرکەفتین دگۆتن مە گەلەک جاران داخواز ژ وی کر کو دگەل مە بهێت، لێ هەردەم رەت دکر و دگۆت جانێ من بلا ب قوربانی ئاخ و ئۆلا من بێت. خدر عەلۆ دوازدە زارۆک ل پشت خۆ هێلان کو ئەنوەر ژ هەمیان مەزنتر بوو و بەربرسیارەتیا خێزانا وی کەفتبوو سەر ملێن وی. پشتی ئاوەرەبوونا خەلکێ شنگال بۆ کەمپێن هەرێما کوردستانێ ئەنوەر بەردوامی دا خواندنا خۆ و هەروەسان کارێ وێنەکێشیێ دکر بۆ خودانکرنا خێزانا خۆ. پشتی کو مامێن وی ئەو بجهـ هێلایی و چووینە وەلاتێن غەریبیێ بارێ ل سەر ملێن ئەنوەری گەلەک گران بوو و ئەوی برایەکی خۆ بەر ب وەلاتێن غەریبیێ رێکر داکو ئەو و خێزانا خۆ ژی ب رێکا وی برایی بگەهنە وەلاتان.
لێ ریکخراوێن مافێ مرۆڤی داخواز ژێ کربوون کو برایێ وان بزڤرێت ژ ئەلمانیا داکو وی دگەل خێزانا وی ببەنە کەندا. لێ پشتی برایێ وی زڤری کەسەکی خۆ لێ نەکر خودان و رێکخراوان ژی پشتا خۆ دان وی و خێزانا وی. پشتی هنگێ ئەنوەر خواندنێ ب جهـ دهێلێت داکو کار بکەت، لێ وەک پێدڤی بۆ وی و خێزانا وی چ کار ژی بدەست نەکەفتن و شەهیدکرنا بابێ وی ژی ژلایێ هەموو سازی و بەربرسانڤە هاتبوو پشتگۆههاڤێتن و هەتا نەهاتبوو نڤیسین ل وزارەتا شەهیدان وەک شەهید. ئەڤ هەموو ژلایەکی و ژلایەکی دیڤە ئێشێن دەروونی و ژیانا خراب دناڤ خیڤەتاندا کو کارتێکرن ل سەر دەروونێ ئەنوەری کربوون هەتا گەهشتە وی رادەی دەستان ژ ژیانێ بەردەت و خۆ بخەندقینێت و نامەیەکێ ل پشت خۆ بهێلێت کو تێدا نڤیسیە “من چ جاران حەز ژ ژیانا خۆ نەکریە و هەردەم من خۆ ددانا کەسەکێ زێدە ل ڤێ ژیانێ. بۆ باب و مامێن من یێن ئەز هێلایم ب تنێ ل ڤێ ژیانێ، بۆ دایکا من ‘هیڤی دکم نەکی گری دایێ هیڤی دکم.’ ب خاترا وە و ب خاترا ڤێ ژیانێ کو من خێر ژێ نەدیتی’.”
(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)
