تشتەكێ زۆر جوان و مەزنە پەرلەمانتارێن پەرلەمانێ ھەرێما كوردستانا عیراقێ ئامانجەكا پیرۆز دانایە بەر چاڤێن خۆ كو ئەوژی خۆزیا وەڵاتیانە و، ھەموو ھێز و شیانێن خۆ بێخنە كار لپێناڤ گەھشتن و بدەستڤەئینانا ڤێ ئامانجێ. ب ڤی رەنگی پەرلەمان دێ بیتە لاپەڕەكێ رۆناكدار ژ لاپەڕێن خۆگۆریكرن و خەباتێ لپێناڤ بدەستڤەئینانا پاشەرۆژەكا باشتر بۆ وەڵاتیان و ھنگی دێ وەڵاتی بەھایێ ژیانێ زانیت و دێ تامكەت خۆشیێ و دێ ھەست ب خۆشیا سەركەفتنێ و پێشكەفتنێ كەت. لێ ئەوا ئەم دڤی پەرلەمانیدا دبینین ھەر ژ دامەزراندنا وێ و ھەتا ئەڤرۆ بەرۆڤاژی وێیە یا ھەی، پڕانیا پەرلەمانتاران نە ل ئاستێ قانوونی و زمانزانی و رەوشەنبیریا پەرلەمانینە، چونكو ھەموو شیانێن دپەرلەمانیدا بكار دئینن لپێناڤ بدەستڤەئینانا ئامانج و بەرژەوەندیێن خۆ یێن كەسایەتی بێی بەرچاڤ وەرگرتنا بەرژەوەندیا وەڵاتیان، چونكو ئەوا روودای دپەرلەمانیدا ل روونشتنا بەروار (14\1\2020) كێمكرنە بۆ ماف و ئامانجێن وەڵاتی و، شەڕ پەیدابوو د ناڤبەرا پەرلەمانتارێن حزبا پارتی و حزبا ئێكەتی ژ لایەكیڤە دگەل پەرلەمانتارێن نەوەی نوێ ژلایەكێ دیڤە سەبارەت بابەتێ خانەنشینكرنا پەرلەمانتارێن نەگەھشتینە تەمەنێ خانەنشینێ كو دبیتە سەرپێچی ل سەر وان قانوونێن خانەنشینكرنێ ئەوێن پەرلەمانتارێن نەوەی نوێ دەستنیشان كرین.
ئەڤەژی بۆ جھێ نەرازیبوونا پەرلەمانتارێن ھەردوو حزبان پارتی و ئێكەتی، ئەڤەژی ھندێ دگەھینیت كو ئەو شەڕێ ھاتیە روودان لپێناڤ بەرژەوەندیێن وانە نە یێن وەڵاتیان. ئەڤا ل پەرلەمانی چێبووی بەرھەمێ وێ چەندێیە ئەوا وان حزبان كری ھەر ژ ساڵا (1992)و ھەتا ئەڤڕۆ ژ سنوورداركرنا ئازادیێ و دیموكراتیێ و ژیانا باشیا وەڵاتیان. ھەر حزبەك بەرژەوەندیا خۆ بتنێ دبینت كو بگەھیتە حوكمی و درەوان ل وەڵاتیان دكەن ب رێیا بەربژێرێن نەخودان شیان و، دەمێ بەربژێر دبیتە پەرلەمانتار كاردكەت بۆ بدەستڤەئینانا بەرژەوەندیێن حزبا خۆ و دێ درەوان دگەل وەڵاتیان كەت و پاشی دێ چاڤێ وی ل بەرژەوەندیێن وی یێن كەسایەتی بیت وەكی مووچەیێ خانەنشینیێ ل پەرلەمانی و بێ گەھشتنا وی بۆ تەمەنێ قانوونی یێ خانەنشینیێ. سەرەڕای ڤێ ھەموویێ وەڵاتی یێ نڤستی و برسیە دماوەیێ (28) ساڵاندا. ئەڤ وەڵاتیە ھێشتا یێ دەردەسەریا ئابووری و فێركرن و تەندروستی و نە باشیا خزمەتگوزاریان و زێدەكرنا باجان دبینیت، نێ ئەڤە رێیا چاكسازیینە و ئەڤە بھێنە بناڤكرن چاكسازی دپەرلەمانیدا بۆ نەھێلانا گەندەڵیێ.
ل دوماھیێ من دڤێت بێژم، ئەركێ پەرلەمانتاران پاراستنا پەرلەمانییە و ئاراستەكرنا وێیە بەرەڤ باشیێ و نە بەرەڤ نەباشیێ ل دووڤ ئارەزوویێن كەسۆكیێن پەرلەمانتاران و حزبان و دڤێت مافێن وەڵاتیان نەھێنە بن پێكرن.