پەرلەمانتارەکى پۆستەک ل تۆرا جڤاکى یا فێسبۆکى پارڤەکر و تێدا گۆتبوو “ژخەو رابن، ئەڤرۆ دێ قانوونا چاکسازیێ ژدایک بت!”، پەرلەمانتارەکا دى ل هۆلا پەرلەمانى دکرە هەوار و دگۆت چەند ئەوەندەى مووچەى شەهید هۆجامە کە سەر بردرا، بە دە مندالەوە بە 500 هزار خانەنشینکراوە؟، دایکا شەهیدەکى بەر ب گۆڕستانێ چوو کو مزگینیێ بگەهینتە کورێ خوە و بدلەک سۆتى دگۆت، کوردستان دێ بلا من دەهـ کور هەبان و هەر دەهـ درێکا ئازادیا تەدا شەهید کربان!، شەهیدەکى د گۆڕى دا سەرێ خوە هند بلندکر هەتا ب سەر کێلیا شەدایێ و گۆپیتکا هەلگۆردى و ئالایێ ل سەر ئاڤاهیێ پەرلەمانى کەتى!، پێشمەرگەیەکى ل بەرەیێن جەنگى دناڤ لەهى و هەریێ دا تبلا وى ل سەر لیلیا تڤەنگێ و سینگا دوژمنى کربوو ئارمانج و نەخشێ وەلاتى دکێشا!، زیندانیەکێ سیاسى هەمى ئەو رۆژێن سەختێن د زیندانێڤە بووراندین کرنە چیرۆک و رادەستى دەرهێنەرەکى کرن!، دەرهێنەرەکى رۆمان و چیرۆکێن هەڵەبجەیا شەهید و ئەنفالێن رەش خرڤەدکرن و خوە ژبۆ تۆمارکرنا زنجیرە فلمان ئامادەدکر!، مامۆستایەکى تاقیکرن ب قوتابیان دکر و د پرسیارێن خوەدا پێناسەیێن ڤیانا وەلاتى، چاکسازى، پاشکەفت و پلە بلندکرن ئینابوون و د پرسەکا دى دا داخوازا دەستنیشانکرنا ئاڤاهیێ پەرلەمانى ل سەر نەخشەى کربوو!، دادوەرەکى ب دەهان تلفۆنێن چینا بلند رەفس کرن ژبۆ دانا حوکمەکێ دادوەرانە!، پارێزەرەکى کەیسا گرانیا بهایێ ئەمپێرێ کارەبا موەلیدەى و ب دەهان کەیسێن دى بۆ دادگەهێ بلندکربوون!، ئەندازیارەکى نەخشەیێ بەنداڤەکا مودرێن و سەردەمیانە دکێشا!، بەلێندەرەکى ژ ترسێن نەئێسخستنا سەرێکزێدەکرنێ بۆ وى خوە ژێ ڤەکێشا!، نۆشدارەکى ئەو هەمى رێکەفتنێن د گەل دەرمانخانەیان و کۆگەهێن وان و کۆمپانیێن سەختەکار ڤەکێشا و بانگا ئەوى نەساخى کر بۆ ژورا نەشتەرگەریێ ئەوێ گۆتیێ ئێڤارى وەرە ل محەلى دێ ل وێرێ نەشتەرگەریا تە تایبەت کم!، دەرمانسازەکى ئەو هەمى دەرمانێن سەختە ژ یێن قانوونى جوودا کرن بۆ ژناڤبرنێ و بزاڤا رەشکرنا ناڤ و هەژمارەیێن تێلەفۆنێن بازرگانێن خوینمێژ ل دەف خوە دکر!.
بازرگانەکى بزاڤا خوە شویشتنێ دکر و هزر ل هاوردەکرنا بەرهەمێن رەسەن ل وەلاتێن هەرى پێشکەفتى دکر!، سەختەکارەکى پێنگاڤەک پاژڤە هاڤێت و ل سەر سەختەکاریەکێ پۆشمان ب بوو و هزرێن چوونا بەرێ بەیتێ و تەوبەکرنێ مێشکێ وى داگیرکربوو!، دوکاندارەک کەتبوو پاقژکرنا کەلوپەلێن خوە و ڤاڤارتنا وان و هەر تشتێ ل سەر شووستەى بۆ ژوور ڤەگەراندن!، پەککەفتیەکى زارۆیێن خوە خرڤەکربوون و سۆزا دەینکرنا کۆژمەکێ پارەى دانێ و برنا وان بۆ مۆلێ و گەشتا بەفرێ!، گرێبەستەکى گوهێن خوە ب بلندگۆیا تێلەڤزیۆنێ ڤەنان و چاڤێن خوە ل بەر دەنگ و باسەکێ خێرێ زل کرن!، دەرچوویەکى باوەرنامەیا خوە ژ تۆزێ پاقژ دکر!، هەڤژینەکا بارێ سەختێ ئابوورى هێلینا وێ ژناڤ برى ب چاڤێن گرى و لێبوورینڤە ل هەڤژین و زارۆیێن خوە ڤەگەریا و روویێ هەڤژینێ خوە ب لێبوورین ڤە ماچى کر!، هەژارەکێ کاڤلە خانیکێ وى ب نیڤەرۆ ماى ب بازدان بەر ب بەنکێ چوو بۆ پرسیارکرنێ ل پیشینەیا خانوبەران!، گەنجەکێ ژیێ هەڤژینیێ تێپەراندى پرسا پیشینەیا هەڤژینیێ و سندوقا پالپشتیا پرۆژێن بچوویک دکر!، بێکارەکى مەیدانکا پالان کرە دوو پێنگاڤ!، جووتیارەک ب گەهشتنا بەرهەمێ خوە یێ برۆکلى شاد ببوو و دخواست ل وێ مەهێ هاتنا یێ بیانى بێتە راگرتن!، هاولاتیەکى برمیلا خوە یا گازێ یا ژەنگى و کون بر لەحیم کر!، کوردپەروەرەکى ژ هەمى دلى و ب هێزا دەنگێ خوە سروودا ئەى رەقیب “هەر ماوە قەمى کورد زمان نایشکێنێ دانەیى تۆپى زەمان، کەس نەلێ کورد مردووە کورد زیندووە …” خەلک ژ خەوێ هشیار دکرن!، مەلا ل مزگەفتێ و قەشە ل دێرێ و شێخ ل پەرستگەهێ و ڤى مللەتى تەڤان لاڤایێن ژ دایکبوونەکا بێ کێشە و ئاسان و سرووشتى بۆ دکرن!
لێ ل دەما پرۆژێ چاکسازیێ بۆ پرکرنا مەشکێن پلە بلندان ژ دایک بووى، هیڤى هەمى مرن و هەر کەس بۆ خالا سفرێ و پێشتر ڤەگەریا، بێ ئۆمێدیێ شاپەرێن خوە ب سەر وەلاتى دا شۆرکرن، تەڤ گرین و عنرین و پلە بالایان ژى قاسەیێن نوى کڕین!، پەرلەمانتاران هەردوو تبلێن خوە ب ئاماژەیا سەرکەفتنێ بلندکرن و ب رۆژەکا دیرۆکى ل قەلەم دا!!
- مافپەروەر