شینی (تازی) ل جەم مە بووینە رووخسارەك ژ رووخسارێن مەزنیێ و خۆ مەزنكرنێ. رووخسارێن مەزاختنێ ل ھەلكەفتێن شینی و تازیان گەھشتینە گۆپیتكا مەزاختنێ و تازی و شینی كریە جھەك كو ھندەك كەس خۆ دیار كەن دەولەمەند و دەستفرەھ د بوارێ بەرفرەھیا خوارنان بەرھەڤدكەن ژ ھەموو جۆران. ئەڤ كەسە ژی كەسوكارێن وینە یێ چوویە بەر دلۆڤانیا خودێ. ئەڤ مەزاختنە دخوارنێدا گەھشتینە ھندێ كو كەسوكارێن مری بەھیداران ببەنە خوارنگەھان ل ھەردوو دانێن خوارنێ فراڤین و شیڤان و دبیت ئەڤ پارێ دھێتە مەزاختن ژ بەریكێن كەسوكارێن مری بن. ئەڤ رەوشتە د تازی و شینیاندا رەوشتەكێ خەلەتە و دڤێت بھێتە ھێلان و، رێكا راست و دروست دشینی و تازیاندا ئەڤەیە كو ئەو كەسێن دھێنە تازیێ خوارنا بەرھەڤ دگەل خۆ بینن بۆ فراڤین و شیڤان یان خوارنەكا نەبەرھەڤكری وەك ھندەك ئاھێن خوارنێ بۆ نموونە: برنج، ساڤار، ئار، شەكر…..ھتد و، كەسوكارێن مری دێ رابن ب لێنانا ڤان ئاھێن خوارنێ و پێشكێشی تازیداران كەن.
ھەروەسا ھندەك بەھیدار ھەنە كوژمەكێ پارەی دگەل خۆ دئینن بۆ ماڵا مری، ئەڤە ھەموو یا رەوایە چونكو ئەڤ بەھیدارە مێڤانن ل جەم كەسوكارێن مری، ئەڤجا دڤێن كەسوكارێن مری قەدرێ مێڤانێن خۆ بگرن، لێ نەیا رەوایە كەسوكارێن مری ژ بەریكا خۆ یان ژ پارێ مری بمەزێخن بۆ بەرھەڤكرنا خوارنا بەھیداران و ئەڤەژی بەرۆڤاژی شەریعەتێ ئیسلامێیە و ناگونجیت دگەل بنەمایێن قانوونان و رەوشتێن نھۆ ھەین. چونكو ئەڤ چەندە بارەكێ گران دئێختە سەر ملێن كەسوكارێن مری و ئەڤەژی نەیا رەوایە ل دووڤ ئەحكامێن ئایینی، ژبەر ھندێ دڤێت بارودۆخێن دەروونی و دارایی یێن سەختێن كەسوكارێن مری بەرچاڤ بھێنە وەرگرتن و خۆ دوور بێخن ژ خوارنا خوارنگەھان و پێگیریێ ب وان بنەمایان بكەن ئەوێن بەرێ ھەین.