ئەو خۆپێشاندانێن ل عیراقێ رابووین ل بەروارا (1\10\2019) ژبلی ھەرێما كوردستانێ، ئەنجامێ گەلەك گرفتان بوو ئەوێن رووداین دكردەیا سیاسیدا دماوەیێ (16) ساڵێن بووریدا كو بوونە گرانیەك ل سەر ملێن ھەڤوەڵاتیێ عیراقی و ھیچ بۆ نەھاتەكرن. ژ وان گرفتان ژ دەستدانا گەشەیا كۆمەلایەتی و مرۆڤی و نەبوونا چاكسازیا سیاسی و گەشەكرنا گەندەڵیا ئابووری و گرنگی نەدان ب كادر و شیانێن عیراقیان و زێدەبوونا رێژەیا بێكاریێ و ھندابوونا ھزرا زانستی و پێشكەفتنێ ل عیراقێ و نەبوونا نیازا پرۆژەیێن گەشەیی و نەپێگیریكرنا حكومەتێ ب سۆز و ئەركێن خۆ بەرامبەر ھەڤوەڵاتیان. ئەڤە بوونە ئەگەرێ لاوازبوونا بەرنامەیێ حكومەتێ ئەوێ ھاتیە راگەھاندن. ئەڤە ھەموو بوونە ئەگەرێ خۆپێشاندانێن ئاشتیانە ئەوێن رووداین ل عیراقێ، لێ بەر سنگێن وان ب ستەم و زۆرداری ھاتنەگرتن ژ ئالیێ حكومەتا عیراقێڤە ئەوا چەك و ئاڤاكەل و گازا رۆندكرێژ بكارئینای دژی خۆپێشاندەران كو بوونە ئەگەرێ كەفتنا پتر ژ سەد شەھیدان و پتر ژ شەش ھزار برینداران.
نابیت ھۆسا سەرەدەری دگەل ڤی مللەتی بھێتەكرن، چونكو داخازیا ژیانەكا سەربلند دكەن و قێریێن ھەڤوەڵاتیان بۆ چاكسازیێ ب برینداركرن و كوشتنا وی ناھێتە بێدەنكرن. ئەڤ خۆپێشاندانە پێشاندانێن پاكێن مللەتی بوون و ھیچ دەستەكێ دەرەكی دگەلدا نەبوون. ئەڤ خۆپێشاندانە كارتەكا زەرە بۆ حكومەتا ھەرێما كوردستانێ بەری كارتا سور بۆ بھێتە بلندكرن ژ لایێ مللەتیڤە، چونكو مللەتێ كورد ھەمان دەردەسەریا مللەتێ عیراقێ ھەیە ل ماوەیێ (28) ساڵان و ھەر ئەڤ مللەتە یێ وێ دەردەسەریێ دبینیت كو بسەرڤە ئابوورینە، لێ ب راستی ئەو دەردەسەری ناكۆكیێن كوورێن سیاسی و قەیرانێن ناڤخۆیێ ب خۆڤە ھەلدكرن كو مللەت دابەشكریە د ناڤبەرا دەستھەڵاتا ماڵا تەلەبانی ل پارێزگەھا سلێمانیێ و دەستھەڵاتا ماڵا بارزان ل ھەردوو پارپزگەھان دھۆك و ھەولێرێ. وان ناكۆكیان كارتێكرنێن نەرێنی ل سەر ھەڤوەڵاتیان كرینە كو وەكریە ژ ژیانەكا سەرفەراز بێبارببن. ھەروەسا ھەڤوەڵاتیێ كورد نیازا درەوا وان پارتان (پارتی و ئێكەتی) دزانیت و ژ سۆزێن وان باوەرناكەن. دڤێت ئەڤ ھەردوو پارتە و حكومەتا ھەرێمێ ڤان خۆپێشاندانێن عیراقێ ڤەخوینن و مفای ژێ وەربگرن دەربارێ چاوانیا سەرەدەریكرنێ دگەل بەرژەوەندیێن خزمەتا مللەتێ كورد دكەن د پاشەرۆژێدا، ئەگەر نە ئەوا ل عیراقێ روودای دێ گەھیتە ھەرێما كوردستانێ دپاشەرۆژێدا.