هوون ب پیرۆزی و خۆشتڤیێن خوەکەنە دا ژ خەو رابین!
دلۆڤان حەسەن “رەزیکی”- ئامێدی
دەما ئاگر بەردببیتە رێلی نابێژیت ئەڤە داربەڕی، دارمازی، گۆهیشک یانژی کەزانە تەڕ و هشکان، دارێن بەری و نەیێن بەری هەر هەموویان ددەتە بەر. دەما گەمی کونبوو یێن دگەمیێ دا هەر هەموو بەرەف مرنێ نە. نەبەرعەقلە دەست بئێشیت و دل یێ ئارام بیت، دل ب ئێشیت و مێشک یێ تەنا بیت و…هتد! بینە پێش چاڤێن خوە خودێ نەکەت خۆشتڤیێەکێ تە تووشی نەخۆشییەک کوژەک بوویه و مانا وی د مەترسیێ دایە، ئەرێ بەرعەقلە تۆ یێ پێ دلشادبی؟! ئەم هەموو کوردین ئەڤجا (پارتی، ئێکەتی، پەکەکە، هەدەپە، هەسەدە، گۆڕان، پارتێن ئیسلامی… سۆران، بەهدینی، زازا، کاکەی، زەردەشتی، موسڵمان، ئێزدی، مەسیحی… هتد) مادەم کوردین ب تنێ ئەم یێن ئێکین، خوە ب ئاخەسۆر و دیتولان بشوین هەر کوردین، ناسنامەیێن خوە ب دڕینین و ناسنامەیێن دیلکێ دونیایێ بهەلینین شۆناسێ مە کوردبوون و پاشناڤێ مە کوردستانە. باپیرێ مە خوەدیێ شەرواڵێ کوردی و دایکا مە تەشیڕێس و بێریڤانە، سیبەرا مە داربەروی و پشتەڤانێن مە ژی چیانە. کوردین کورد، د فەرهەنگا نەتەوەیەکی دا ئەجنەینە، د فەرهەنگا نەتەوەیەکێ دیدا تورکێن چیایی نە، هندەک ژی مە ب جوهی ل قەلەمددەن و جارنا ژی کێلبێن خوە بۆ گیانێ مە تیژ دکەن و گۆشتێ مە ژ یێ بەرخان حەلالتر دادنن. کێ دیتییە دوژمنێ بابێ بوویە دۆستێ کوڕی و داگیرکەرێ (ئاخ، زمان، هونەر، ناسنامێ، …) بوویە هەڤال و پارێزەرێ مافان و ژیانێ بۆ مرۆڤی؟! چاردەورێن مە دوژمن بوووینە و جار ب ناڤێ ئاینی خاپاندینە و جارنا ژی مفا ژ نە ئێکڕێزی و دووبەرەکییا مە دیتییە و مینا “گیانەوەران” ئەم بەرداینە گیانێ ئێک. نە لەیلاقاسم سەرا بێنڤێژی و بێدینیێ هات سێدارەدان، نە شێخ عەبدولسەلام سەرا شاشییان هات سێدارەدان، نە ئەحمەد کایا ژبەر تێکدانێ هات زیندانکرن و ژ وارێ وی هاتە دووورکرن، نە یەڵماز گونەی سەرا فلمێن بێ ستارە هاتە دادگەهکرن، نە قازی سەرا دزیان هاتە ب دارڤەکرن، نە مالا بەدرخانییان سەرا پیچاتییان هاتن بژاڵەو دەربەدەرکرن، نە و نە و نە و… هەر هەموو سەرا چ تشتی نەبوو ژبلی کوردبوونێ.
کوردبوون یا ب زەحمەتە لێ نیعمەتە و خوەدێ ب مە دایە و ب تنێ ئەو دشێت ژ مە بستینیت. ئەم هەموو مینا دەستەکێ تزبیانین و پێکڤە سەدوئێکێ پێکدئینین و دڤێت د دەست کوردپەروەرەک کورد دابین نەک بەندکێ مە ل بەر دەڤێ مەقەسێن وەڵاتێن دونیایێ دا بیت و ب بوهانەیێن جودا جودا مە ژ ئێک ڤەقەتینن. ل باشوورێ وەڵاتی هاتە ئەنفالکرن، سۆتن کاڤلکرن و ێرانکرن ب هزارەها کچ، ژن، گەنج، پیر، زارۆ بوونە قوربان. درێژترین ماوەیێ ئارامیێ ل ڤێ پارچێ ژ (۲۰۰٥ـ۲۰۱۳) بوو. رۆژهەڵاتێ وەڵاتی رۆژ نینە گەنجەک دوویەک نەهێنە ب دارڤەکرن. ل باکوورێ وەڵاتی هونەر، زمان، ئاخ، شینوار، هەتا ناڤ و ناسناڤ ژی هاتنە داگیرکرن و تالانکرن. رۆژئاڤا ژی ئەو رۆژا خوەدێ بۆ ئافراندی و کوردان دلێن خوە کرینە پەرژانێ وێ ها وەختە لێ بهێتە تاریکرن و تا ئەبەد رۆژ لێ بمینیت ئاڤا. وەرن دا ڤێجارێ دەست ژ بەهانەیان بەردەین و چ بەهانەیێن دی پێش دوژمێنن خوەڤە نەگرین، وەرن دا ڤێجارێ ل شوونا سەنگەرگرتنا جڤین و ئێک و دوو شکاندن و تۆمەتبارکرنێ دەستێ ئێک ب بگرین.هوون و خوەدێ ئەگەر وە باوەری ب خوەدێ ژی نییە. هوون ب هەمی پیرۆزی و خۆشتڤیێن خوە کەنە بلا ئەڤجارە کوردبوونێ ل پێشییا پارتایەتی، هۆزگەری، ناڤچەگەری بەرژەوەندخازیێ دابنین. چ مفایێ مە تێدایە بێژین بلا فلان رۆژئاڤا بپارێزیت، و دەما ل مە د قەومیت یێن رۆژئاڤا ببێژن بلا فیسار باشوور بپارێزیت و مە مای تێناچیت، چ مفا د وێ ئێکێ دایە ببین بەبەغایێن دوژمنی و دەما دوژمن من ب تیرۆرست ل قەلمبدەت تۆ ژی بێژییە من تیرۆرست و دەما تە ب تێکدەر، خاین ل قەلمبدەت ئەز ژی بێژمە تە تێکدەر، خاین، هوون و خوەدێ مە چەند مفا ژ ئێک و دوو شکاندنێ دیت. هوون ب هەموو پیرۆزیان کەنە دەستێ خوە دانن سەر وژدانا خوە و بەرسڤ بدەن ئەڤا دهێتە سەرێ مە نە سەرا کوردبوون و مافێن مەیە؟! ل بەندێ نەبن هەڤوەڵاتیێن تورک خوەنیشاندانان بکەن و داخازێ ژ سەردەستێن خوە بکەن کو ئاگرێ ل سەر رۆژئاڤا رابوەستینن. چ جا د وێ باوەرێ دا نینم بناڤ وەڵاتێن ئیسلامی بێژنە ئەردۆغان و هەڤهزرێن وی ژ سنۆرێن خوە دەرنەکەڤە کورد ژی مرۆڤن بهێلە ئەو ژی بژین.
خوە ناهێتە سەر هزرا من ژی کو ئەو وەڵاتێن ب ناڤێ چارنامەیا مافێ مرۆڤی و دیمۆکراسییەتێ دخۆڕن دبەرهەڤبن سەرا خین و گیانێ کوردان ل تورکان دوژمن دەربکەڤن! نابیت دلێ خوە ب گۆتنێن هندەک سیناتۆر و سیاسەتمەدارێن بێی پلە و پۆست و خانەنشینکری خۆش بکەین، نابیت ل هیڤییا “فەرەنسا، روسیا، ئنگلتەرا و…هتد” بین بهێن درندەیا تورکان ل سەر گەلێ مە رابوەستینن. ژبەرکو هەر ئەون بەختێ مە رەشکری و نها ژی رێکێ ل ئازادییا مە دگرن. وەرن دا جادەیان ب هەژینین ئەگەر پێدڤی بکەت ئەو ئاگرێ ب مەفە ببەینە ناڤا ئەستەنبۆڵ و ئەنقەرەیان. کەس باس ل زارۆ و بێی گونەهێن وێرێ نەکەن یێ سەرا گونەهێ نەرازیبوونا خوە دیارنەکەت ئەو ژی گونەهکارە، ئەرێ بۆ ئەو بێی گونەهـ و کوترێن سپی یێن هندەک ژ م ژێ دبێژن ئەنقەرەیێ ناهەژینن و بێژنە ئەردۆغانی راوەستە ئەگەر دێ تە راوەستینین؟! بابەت کوردبوونە کوردبوون. بانگا مە بۆ خویشک و برایێن مە ل هەولێر، ئامەد، قامشلۆ، مەهاباد و ئەوروپا و هەر قۆلاجا دونیایێ کو دەستهەلینن و دەست ب خوەنیشاندانان بکەن و وەرن دەست ل ناڤ دەست هەموو دونیایێ ژ خەو راکەین ئەگەر ژ خەو رانەبوو ئەو ئاگرێ ب کوردبوونێ ڤە بەردەینە گیانێ ڤێ جیهانێ و هەر هەموو تاکێن ڤێ جیهانی جەگەرسۆتی و مالوێران بکەین. دا د دەردێ مە بگەهن و هەست ب ئازارێن تەنێبوونا مە بکەن.