ھەبوونا پەیوەندیێن باش دناڤبەرا وەلاتان دا فاکتەرێن پاراستنا بەرژەوەندێن ھەڤپشکە. وەلات و گەلێن بن دەست کو ھێشتا ب تمامیا مافێن خۆ شاد نەبووین، زێدەتر پێتڤی ب ھەبوونا پەیوەندیان ھەیە نەخاسمە دگەل وەلاتێن بھێز و خودان دەسھەلات و ھەول ددەن بۆ پشتەڤانیا سیاسی و ئابووری و کلتووری. ھەرچەندە ھەرێما کوردستانێ نیمچە ئازادی و قەوارێ خۆیێ رێڤەبرنێ ھەریە، لێ بەردەوام پێتڤی ب پەیوەندیێن خورت دگەل وەلاتێن خودان بریار و دەسھەلات ھەیە ل سەر ئاستێ جیھانێ ژبۆی پاراستن و پێشڤەبرنا ڤی قەوارەی. چونکی ھەتا ئازادی و رزگاریا ئێکجاری نەبیت مەترسی دێ ھەر ل سەر مینن، ھەر وەکی ل ڤان ساڵێن داویێ دیار بوو. لەوما ھەرێما کوردستانێ گرنگیەکا زۆر دایە پەیوەندیێن دگەل وەلاتان و ھەوڵ داینە بەرژەوەندێن وەڵاتان دگەل بەرژەوەندێن کوردستانێ تێکەل بکەن و بۆ بەرژەوەندێن سیاسی مفای ژ ڤان پەیوەندیان وەربگرن. کۆمارا فرەنسا ئێکە ژ پێنج وەلاتێن خودان مەزنترین بریارێن سیاسی ل سەر ئاستێ جیھانێ و ئەنداما ھەمیشەیی یا جڤاتا ئاسایشا نیڤ دەولەتی یە. ھەبوونا ڤان پەیوەندیێن خورت یێن دگەل وەلاتێ فرەنسا مفایەکێ زۆر گەھاندیە ھەرێما کوردستانێ ژلایێ سیاسی و ئابووری و جڤاکی و ئێمناھی. ئەڤەژی نیشانێ سەرکەفتنا سیاسەت و دبلۆماسیەتا ھەرێما کوردستانێ و حکومەتا ھەرێمێ یە. ل سەرھەلدانا پیرۆزا گەلێ کورد یا سالا ١٩٩١ فرەنسا ئێکەم وەلات بوو پێشنیارا دەڤەرا دژە فرین کری بۆ ھەرێما کوردستانێ و بریارا ٦٨٨ ل جڤاتا ئاسایشێ بۆ پاراستنا ھەرێما کوردستانێ دەرخستی. ئەڤ بریارە فاکتەرەکێ سەرەکیێ پاراستن و مانەڤا بەرھەمێ وێ سەرھەلدانا خەلکێ کوردستانێ بوو کو پەرلەمان و حکومەت و سازیێن خۆبرێڤەبرنێ بوون.
ھەر ل وی دەمی پەیوەندیێن ھەرێمێ دگەل فرەنسا گەشەکرن و گەھشتنە ئاستێ سەرەدانا سەرۆکێ ڤی وەلاتێ مەزن (فرەنسوا ئۆلاند) بۆ کوردستانێ ل ٢/١/٢٠١٧ کۆ ئێکەم سەرۆکێ وەلاتێن مەزنە بۆ سەرەدانا کوردستانێ بکەت. ئەڤەژی دەسکەفتەکێ مەزنە و حکومەتا ھەرێما کوردستانێ، ڤان پەیوەندیان وەکریە کو ئەڤ وەلاتێ مەزن پویتەکێ باش ب ھەرێما کوردستانێ بدەت و بەردەوام پشتەڤانیا ھەرێمێ بیت ژلایێ سیاسی و چارەسەرکرنا قەریران و ئاریشەیان. ئەڤەژی نیشانێ ھندێ یە کو رێزدار نێچیرڤان بارزانی چ وەکی سەرۆکێ حکومەتا ھەرێما کوردستانێ و پاشان وەکی سەرۆکێ ھەرێمێ ب رەنگەکێ زانستی و سەردەمیانە گرنگی ب ڤان پەیوەندیان دایە و دارشتینە. ڤان پەیوەندیا وەکر کو فرەنسا ئێکەم وەلات بیت بۆ دەسپێشخەریا چارەکرنا کێشەیێن پشتی شازدێ ئۆکتۆبەرێ. دیسان فرەنسا ئێکەم وەلات بوو ل وی دەمی نێچیرڤان بارزانی بانگھێشتا پاریسێ بکەت. ئەو پێشوازیکرنا گەرم و گورا ل نێچیرڤان بارزانی سەرۆکێ ھەرێمێ ژلایێ سەرۆکێ فرەنسا (ئیمانۆئێل ماکرۆن) ل رۆژا ١٠/٧/٢٠١٩ ھاتیە کرن، نیشانێ دانپێدانێ یە ب قەوارێ سیاسی و کارگێریێ ھەرێما کوردستانێ، چونکی پێشوازیەکا مینا سەرۆکێ ھەر وەلاتەکێ سەربەخۆ و خودان سەروەری بوو و کۆمبوونێن دگەل سەرۆک ماکرۆنی و مەزنە بەرپرسێن وان بەڵگەنە کو ل سەر دەستێ سەرۆک نێچیرڤان بارزانی ئەڤ پەیوەندیە گەھشتینە ئاستەکێ بلند و کەفتینە د خزمەتا پاراستنا بەرژەوەندێن ھەرێما کوردستانێ و بناغەکێ مۆکومێ پەیوەندیا ھاتیە دارشتن و ل قۆناغێن داھاتی ژی فرەنسا بەردەوام دێ پاڵپشت و ھاریکاریا کوردستانێ و رێخوشکرنە کو وەلاتێن دیتر ژی ب ڤی رەنگی بەرێ خۆ بدەنە کوردستانێ و ئەندازیارێ ڤان پەیوەندیێن سەردەمانە و بەرژەوەندپارێز سەرۆک نێچیرڤان بارزانی یە. دشێن وەسا ببینین ژبەر ڤان پەیوەندیا بەردەوام ئەم وەکی کورد ل فرەنساینە، چونکی فرەنسا ئەڤ وەلاتێ ھەری مەزن ل سەر ئاستێ جیھانێ بەردەوام د خەما کوردستانێ و خەلکێ وێ دایە. ل قوناغێن داھاتی ژی دێ ھەر پاڵپشت و ھاریکار بیت، ئەڤەژی دەرفەتە بۆ پێشڤەبرنا دۆزا سیاسی و کارگێریا کوردستانێ ل سەر دەستێ سەرۆک نێچیرڤان بارزانی.
(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)
