سەرۆکێ هەرێما کوردستانێ ل چوار سالێن ماوێ سەرۆکاتیێ ب دیتنا من دڤێت ب هەمى ئاواهیان هەڤسەنگیەکا گونجیایى یا پەیوەندیێن موکم هەبن د نێڤبەرا ئیرانێ و ئەمریکا و ژبلى تورکیا و پێکهات و سەرانێن سیاسیێن عیراقێ. چما ئەڤ چەندە بهێتەگوتن؟ دیارە ئەمریکا هەرچ بخوازیت ژ عیراقێ دکاریت ئەنجام بدەت ل ماوەیەکێ هەرى کێم و تەنانەت بێ کو لێڤەگەریانێ بکەت ژبۆ سەرانێن عیراقێ. هەڤدەم نە د پێشبینیا عیراقیاندایە ژى ئەو گاڤێن ئەمریکا ل عیراقێ بۆ بەرژەوەندیێن خۆ بکارتینیت و دگەلدا و کمێتر ل ڤێ چەندێ کارگەریا رژێما ئیرانێ یە ل سەر عیراقێ ژبەرکو گاڤێن ئیرانێ ل دەڤەرێ تا رادەیەکى ئاشکرا و دخویانە و نە دوى ئاستى دانە مینا ئەمریکا. وەکو خویا باشترین میناک ئەگەر ئاماژێ بەردەینە سەر ل ماوێ رابورى ئیرانێ کو ل ئیراقێ ئەنجام دایى دامەزراندنا حەشد الشعبى و کۆمەکا میلشیایان ل عیراقێ بۆ کو ب رەنگەکێ فەرمى هاتنە دامەزراندن و حکومەتا ناڤەندى یا عیراقێ ژى ب یاسا رێکخستن و ب هێزێن ئەولەهیا عیراقێ ناساندن و بودجەکێ خەیالى یێ عیراقێ بۆ ڤێ هێزێ تێتە مەزاختن و هەژمارەکا هەرە زۆرا ڤان کەسان ژى رەنگە ب رەگەز ئیرانى بن و ئاشکرایە هەر ئەڤ هێزە بۆ ئەگەرێ داگیرکرنا پارێزگەها کەرکووکێ و شەرێ پێشمەرگەیى و دەڤەرێن کوردستانى یێن دەرڤەیى هەرێما کوردستانێ بکەن و ئەڤ کێشە نوى و قۆلترکر. ژلایەک دیتر ب سیاسەتا رەگەزپەرێسانە نها ب رەنگەکێ هەرى دیار ئەرەبێن هاوردە مولک و ئەرد و پاوان و زەڤى و ئاڤاهیێن کوردان داگیردکەن و ب رەنگەکێ هەرى ئاشکرا و زق گەنم و بەرهەمێ جوتیارێن کوردان دهێنە سوتن.
ئاشکرایە ئێکەم سەرەدانا سەرۆکێ هەرێما کوردستانێ ل رێکەڤتى 20/6/2019 بۆ بەغدا بوو نەخاسم ژبۆ موکمکرن و چارەسەرکرنا گیروگرفتێن دناڤبەرا هەرێمێ و بەغدا دا بوویە و هاتە دیتن کو سێ کۆمبوونێن گرنگ ئەنجام دان دگەل هەر ئێک ژ سەرۆک کۆمارێ عیراقێ و سەرۆک وەزیرێن عیراقێ و سەرۆکێ جڤاتا نوێنەرێن عیراقا فیدرال مەرەما کۆمبوونان ژى ژبۆ پرسێن ستراتیژیێن کوردستانێ بوونە دگەل حکومەتا ناڤەندى. هەڤدەم موکمکرنا پەیوەندیان بوویە کو ژڤى ئالى خۆشبەختانە پەیوەندیێن نێچیرڤان بارزانى سەرۆکێ هەرێما کوردستانێ ل بەرێ و دنهادا ژى دئاستەک هەرى باش دایە، لەورا گرنگە کار ل سەر ڤەگەراندنا ئاخ و سنوورێ راستەقینەیێ هەرێما کوردستانێ ب رێیەکا ئاشتیانە و ب رێیا مادێ (140) یێ دەستوورێ عیراقێ کو پێکهاتییە ژ نەهێلانا شوونوارێن تەعریبکرنێ و ڤەگوهاستنا ب زۆرى کو ل تەڤ دەڤەرێن کوردستانى یێن ژ دەرڤەى دەسهەلاتا هەرێمێ ب باژێرێ کەرکووکێ ڤە هاتیەکرن. دەربارێ پەیوەنیێن سەرۆکێ هەرێمێ دگەل هەر ئێک ژ وەلاتێن تورکیا و ئیرانێ، ئەڤ پەیوەندییە دئاستەکێ باش دانە و تەنانەت ل دەمێن بورى ل زۆر کاودانێن بەرتەنگ کێم تا زۆر ئەڤ وەلاتە هەماهەنگ و هەڤکاربووینە دگەل هەرێما کوردستانێ تەنانەت ل دەمێ سویند خواندنا سەرۆکێ هەرێمێ کو وەزیرێ دەرڤەیێ تورکیا ل رێورسمان بەرهەڤببوو. ئەڤ چەند گرۆڤێ لێکنزیکیا ڤان هەردوو ئالیانە. هۆکار ژى ژبۆ پەیوەندیێن باش یێن دیبلۆماسى و ئابوورى و… هتد .. دزڤرینم. ژلایێ دى دێ مینیت پەیوەندیێن هەرێمێ دگەل ئێک ژ وەلاتێن زلهێزێن جیهانێ ئەو ژى ئەمریکایە ل ڤى ماوەیى وەکو ئاشکرا ل رێکەڤتى 24/6/2019 سەرۆکێ هەرێما کوردستانێ دگەل شاندەکێ وەزارەتا دەرڤەیا ئەمریکا کۆمبوو ڤى شاندى دلخۆشییا خوە ب تایبەت ب بزاڤێن چارەسەرکرنا کێشێن هەولێر و بەغدا نیشان دا، کو بێگومان چارەسەرێ کێشەیێن ناڤبەرا هەولێر و بەغدا خودى نێچیرڤان بارزانى سەرۆکێ هەرێما کوردستانێ بوویە. دیارە ژى دگەل ڤى شاندى یاداشتەکا لێکتێگەهشتنێ دناڤبەرا هەرێما کوردستانێ و ئەمریکا دا هاتە ئیمزاکرن کو درێورسمێن ئیمزاکرنێ دا سەرۆکێ هەرێمێ راگەهاند هیڤیدارم ئیمزاکرنا ڤێ لێکتێگەهشتنێ خێرا هەرێما کوردستانێ و عیراقێ و ئەمریکا تێدا بیت و خویا کر کو پەیوەندیێن مە دگەل ئەمریکا ددیرۆکینە و هەردەم رۆلەکێ مەزن دپاراستنا هەرێما کوردستانێ دا گێرایە. ئەز باوەرم چوارسالێن داهاتى بۆ وێ هەڤسەنگیێ دێ فاکتەرێن کاریگەربن بۆ پتر وەرارو پێشدابرنێ بەر ب بونیاتنانا کوردستانەکا بهێز و هەڤسەنگ دهەمى هاڤلى و تێکەلیێن خۆدا.
(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)