هەروەکى دیار ماوەیەکە باژێرێ دهۆکێ د ناڤا کۆمەکا قەیرانێن خزمەتگۆزاریدا دنالیت، مینا کریزا پیڤەرێن ئاڤێ کو بوویە بابەتێ رۆژێ و ل سەر زارێ گشت هاولاتیان دهێتە باسکرن، کو ئەڤ پیڤەرە نە دادیەکا بەرچاڤ و ئاشکەرا دەرحەقا هاولاتیێن پارێزگەها دهۆکێ دا دکەتن. ژبەرکو کرێیا هەیڤانە ب ملیۆنەهان دینارێن عیراقى دخوینیت، کو دەمەکى دا کرێ یا هەر هەیڤەکێ ژ دوازدە تا سێزدە هزاران دهات. لەورا باندۆرەکا مەزن ل دویڤ خوە هێلایە و بوویە جهێ نەرزایبوون و دلگرانیا گشت هاوەلاتیێن پارێزگەها دهۆکێ. دیسان کریزا کێمبوونا کارەبا نیشتیمانى ل پارێزگەها دهۆکێ تایبەتى د وەرزێ هاڤینێ دا کو د نوکە دا پلێن گەرماتیێ د ئاستەکێ بلند دانە. بەلێ رێژەیا دابینکرنا کارەبا نیشتیمانى بۆ پارێزگەها دهۆکێ کو بەراورد د گەل پارێزگەهێن دیتر یێن هەرێما کوردستانێ د ئاستەکێ خراب دایە. ئەڤ چەندە بوویە ئەگەر بوهایێ کارەبا موەلیدان گران ببیت بەراورد دگەل پارێزگەهێن دیتر. کارەب و ئاڤ بووینە جهێ گەنگەشێ و بابەتێ هەمى جهان، دلگرانیەگا مەزن هاولاتیێن پارێزگەها دهۆکێ گرتینە ژ کاربدەستێن کارگێرى یێن باژێرێ دهۆکێ.
د سەردەمێ نوکە دا ئالاڤێن راگەهاندنێ باشترین ئاراستەیە ژ بۆ گەهاندنا پەیاما گەلى ژ بۆ دەستهەلاتێ. لەورا دەربڕینا دلگرانى و نەخوەشییێن هاولاتیێن پارێزگەها دهۆکێ ب رێکا سۆشیال میدیایێ مینا (فەیسبۆک – تویتەر – ئینستگرام ) بوونە هۆکارێ گەهاندنا بلەزا پەیاما هاولاتیان بۆ بەرپرسێن بلندێن هەرێما کوردستانێ، کو ب راستى ژى خەلکى دهۆکێ ژ هەژى ئەڤى بارودۆخێ هەنوکەیێ پارێزگەها دهۆکێ نینن، کو پێدڤیە باشترین خزمەت بۆ خەلکێ ئەڤێ دەڤەرێ بهێتەکرن، پاش هایداریا فراکسیۆنا پارتى دیموکراتى کوردستان ل پەرلەمانێ کوردستانێ ل 3-7-2019 راگەهاندنەک ل دور دۆخێ پارێزگەها دهۆکێ راگەهاندى کو دیارکریە نامەک ئاراستەى سەرۆکێ هەرێما کوردستانێ (نێچیرڤان بارزانى) کریە ل دور چارەسەرکرنا کێشەیێن دهۆکێ، و دنوکە دا دگەل لایەنێن پەیوەندیدار د چارەسەرکرنا کریزێن پارێزگەها دهۆکێ دا نە. لەورا مە خەلکێ دهۆکێ هیڤى و ئۆمێدەکا مەزن ب رۆلێ سەرۆکێ هەرێمێ کوردستانێ هەیە کو دەمەکێ نێزیک دا دێ ئەڤ کریزە چارەسەربن.
(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)