مێژوويا كوردى يا پره ژ خيانه‌ت و نه يه‌كگرتنێ و به‌ريا سه‌دان سالان شاعرێ مه‌زنێ كورد ئه‌حمه‌دێ خانى داخوازا ئێكگرتنێ ژ مه‌زنێن كوردان كريه ده‌ما دبێژت (گه‌ردى هه‌بوايه مه ئيتيفاقه‌ك، ڤێكرا بكرا مه ئينقياده‌ك …) و دايه دياركرن کو بێى ئێكگرتن بنياتێ وه‌لاتى نائێت دانان. پشتی وى شاعرێ مه‌زن چه‌ندێن دى ئه‌و داخوازه دووباره و ده‌هباره كريه، لێ مخابن به‌رژه‌وه‌نديێن سه‌ركرده و پارتێن كوردستانى يێن تاكه‌كه‌سى وه‌ناكن ببن ئێك و ل سه‌ر ئێك مێزا دانوستاندنان روينن و ب ئێك ده‌ست و گووتن و بڕيار بچن و ل هه‌مبه‌رى دوژمنان ب راوستن. هه‌رده‌ما سه‌ركرده‌ك يان پارته‌ك ده‌ست ب هيڤیيه‌كا مه‌زن بكت ژبۆ ڤى ملله‌تێ ئێك ژ مه‌زنترين نه‌ته‌وێن بێ ناسنامه و وه‌لات، دهه‌مان ده‌مدا دێ كه‌سه‌ك يان چه‌ند كه‌س يان پارته‌كا دى ئێت و ده‌ستان كته دناڤ ده‌ستێن دوژمنى دا و ب هه‌مى هێزا خوه ل هه‌مبه‌ر وێ هيڤيێ راوستت و هينگى رادوه‌ستت هه‌تا ژناڤ دبت يان گه‌له‌ك لاواز بكت كو ئێدى شيانێن رابينا سه‌ر پيان نه‌بن. دێ بێژى وان يا سويند خوارى كو ب تنێ شه‌ڕى ل دژى ئێك و دوو بكن و دوژمنى ژبيربكن. دوژمن ژى بێى ره‌نج و كه‌ده‌كا بزه‌حمه‌ت ته‌قسيريێ ناكت و ب هه‌مى ره‌نگێن سزادانێ و درندايه‌تيێ مه شه‌هيد دكن و نموونێن ديرۆكى دزۆرن، هه‌تا دگه‌هته 16 ى ئۆكتۆبه‌رێ.
گه‌له‌ك جاران پارت و سه‌ركردێن كوردستانى نێزيكى رێكه‌فتنان دبن. لێ ل داويێ ب تنێ ل سه‌ر خێر و خێرات و پله و پۆستان رێك دكه‌ڤن. به‌رژه‌وه‌ندى و هيڤيێن مه‌زنێن ڤى وه‌لاتى و وه‌لاتيان ژبيردكن و قه‌بێ ئێك و دوو دخوازن بۆ شه‌ڕێ براكوژى و پارچه‌پارچه‌كرنا كوردستانێ! ناكۆكى و نه‌رێكه‌فتنا پارتیێن كوردستانى وه‌لات وێرانكريه و وه‌لاتى بساناهى كرينه نێچيرا دوژمنان. حه‌له‌بچه، ئه‌نفالێن ره‌ش و جينۆسايد هه‌مى ديده‌ڤانن و هه‌تا دگه‌هته شنگال و كه‌ركووكێ! ئه‌گه‌ر دوهى دوژمنى كورد شه‌هيدكربن و بزاڤا ژناڤبرنا وان كربت، ئه‌ڤرۆ پشتى وێ بزاڤێ يێ وان دووباره ل سه‌ر ملك و مالێن وان ده‌ردئێخن و ته‌عريبه‌كا دى په‌يره‌و دكن دا جێبجيكرنا ماده‌يا 140 ژ دستوورێ عيراقا فيدرال پتر ئالۆز و گيرو كن. ئه‌ڤ ته‌عدايا ئه‌ڤرۆ ل كوردان دئێته كرن بزاڤه‌كه بۆ گهورينا ديمۆگرافيا ده‌ڤه‌رێن كوردستانى يێن ژ ده‌رڤه‌ى هه‌رێما كوردستانێ و ده‌رێخستن و كۆچكرنا خه‌لكێ وێ يێ ره‌سه‌ن ژ جهێ بابا و باپيران و ئينانا عه‌ره‌بان و نيشته‌جێكرنا وان. سۆتنا ده‌خل و دانێ كه‌ركووكى يێن ژێرده‌ست و داگيركرى ئاماژه‌يه‌كا مه‌زنه بۆ ئه‌نفاله‌كا ئابوورى ل دژى كوردان. هه‌ر چه‌ندى هه‌ڤدژه ل گه‌ل وان بنه‌مايێن مافێن مرۆڤى و به‌هايێن هه‌ڤبه‌شى يێن مرۆڤايه‌تيێ و ئه‌و بانگه‌شه‌يا ديموكراسيه‌تێ و پێكڤه‌ژيانێ يا عيراق دكت پاش رۆخاندنا حزبا به‌عسا گۆڕبه‌گۆڕ. لێ ئه‌گه‌ر پارتێن مه د كۆك بان د گه‌ل ئێك ئه‌ڤا دوهى ل حه‌له‌بچه و ئه‌نفالێ و ئه‌ڤرۆ ل شنگال و كۆبانێ و عه‌فرين و كه‌ركووكا دلێ كوردستانێ بسه‌رێ مه كوردان هاتى و به‌رده‌وام دهێت نه دهات. هه‌تا نوكه پارتێن كوردستانى نه‌شياينه حكومه‌تا نوى يا هه‌رێمێ پێكبينن، سه‌ره‌راى ده‌ربازبوونا پتر ژ 200 رۆژان ل سه‌ر هه‌لبژارتنان. پله و پۆست ناهێلن بگه‌هن رێكه‌فتنه‌كێ ل سه‌ر دانانا پارێزگاره‌كى بۆ كه‌ركووكێ و ئه‌و ئه‌نفالا ئابوورى يا ب سه‌رێ كه‌ركووكى و ده‌ڤه‌رێن دى دئێت، پارتێن كوردستانى ژێ به‌رپرسن و هه‌ر پارته‌ك ل گۆره‌ى بێ خه‌مى و قه‌باره‌يێ كاريگه‌ريا خوه يا سياسى ل وێرێ.
دێ ته چ هيڤى ب ڤان پارتان هه‌بن هه‌تا بگه‌هته وى راده‌ى ئه‌ڤرۆ ب پێلاڤێن لاستيكى ل گه‌ل ئێك و دو باخڤن؟! چه‌ند شه‌رمه‌كا مه‌زنه بۆ وى كه‌سێ خوه ب سه‌ركرده بزانت و عويرێ وى تژى نه‌فتا كه‌ركووكێ بت و زارۆكێن كه‌ركووكى يان پێلاڤێن لاستيكى دپيان بن! ئه‌رێ چه‌وا كه‌ركووك ئارامه و پرانيا وان ده‌ربه‌ده‌ربين و رۆژانه دلێ چه‌ندين جوتياران مينا گه‌نمێ وان دسۆژت و دبته ته‌نى و مينا رويێن وه ره‌ش دبت؟ چه‌ند سال بوو كه‌ركووك ل ژير ده‌ستهه‌لاتا وه و سه‌رۆك كۆمار و چه‌ندين پله‌يێن مه‌زنێن دى ل عيراقێ د ده‌ستێن وه دابين و ماده‌يا 140 هه‌ر ما هه‌لاويستى. خه‌ما وه‌ژى چه‌وانیيا تژيكرنا زكێ خوه بى ژ دۆلار و نه‌فتێ! هوين ب چ روى به‌حسێ زارۆكێن كه‌ركووكى يان دكن، وه ئه‌و ل بن ره‌حما پۆستا‌ل و بابێن وان ل ژێر زنجيرێن ده‌بابێن حه‌شدا شه‌عبى يا عيراقى و پاسدارێن ئيرانى هێلان و هوين ره‌ڤين؟ چه‌وا هوين داخوازا پله‌و پايه‌يان دكن و خه‌وا وه دهێت و وژدانا وه يا ئارامه و دلێ كوردستانێ يێ داگيركرى بت؟ ما گريا وان پيره‌مێرێن جوتيار و هه‌وارێن وان دايكێن شه‌هيدان و بێخودانى و پاشه‌رۆژا تارى يا وان زارۆكان وژدانا وه يا مرى نالڤينت؟ ملله‌ت نه‌فره‌تان ل وه دبارينت ئه‌ڤێن وه ب زرته‌كى خوه ل سه‌ر ده‌ستهه‌لاتێ گرتى و كورسيك ب خوه‌ڤه سیكۆتين كرى. ئه‌ڤ ملله‌تێ هه‌ژار و زولملێكرى چه‌ندين ساله يێ باجا خه‌له‌تى و ناكۆكيێن وه د دت و هوين جاره‌كا دى ب بێ شه‌رمى خوه ل سه‌ر كورسيكێ دبادن و به‌حسا كه‌ركووكێ و ده‌روله‌تبوونێ و مافێن وان دكن! ئه‌گه‌ر وه شه‌رم كربا ئه‌و دانپێدانا وه‌كرى كو زاروكێن كه‌ركووكى يێن خودانێن مه‌زنترين بيرێن نه‌فتێ ل كوردستان و عيراقێ، پێلاڤێن لاستيكى دپيان بن به‌س بى كو ببته بچويكترين به‌لگه ژ وان به‌لگه‌يێن مه‌زنێن ته‌مه‌ت چيايێ سه‌فينى ل سه‌ر خيانه‌تا وه. به‌سه ئێدى ببن يه‌ك يان هوين دێ چن يه‌ك ب يه‌ك! و دێ مه‌ژى دگه‌ل خوه بن هه‌روه‌كى وه ئه‌م و وه‌لات ژى برين!
· مافپه‌روه‌ر
(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)