سۆزا بەرەف کوردستانەکا بهێز د بوارێ بجهئینانێ دایە

ل دەمێ بانگەشەیا هەلبژاردنان پڕانییا پارت و لایەنان ل دویڤ حەزا خوە و دویر ژ کارێن خوە یێن بەرێ و بۆ بدەستڤەئینانا دەنگێ هەڤوەڵاتیان سۆزێن مەزن و قەبە د دان. لێ درویشمێ پارتی د دووماهیک هەلبژاردندا بلند کری “بەرەف کوردستانەکا بهێز” بوو. هەر چەندە ل پێشتر ژی پارتی سەلماندییە هەر دەمێ پارتی یا بهێز بیت کوردستان یا بهێز بوویە. لێ پشتی کوردستان تووشی قەیران و ئابلۆقەیێن جۆرا و جۆر بووی کوردستانی د نەئارامی، دلتەنگی و دەستکورتییەکا مەزندا بوون. دیسان سەرکردایەتیا پارتی خەلکێ کوردستانێ ل نیڤا رێ نەهێلان و سینگێ خوە دا بەر هەمی پلان و پیلانێن نەحەزان و ئاستەنگێن مەزن بچویک کرن تا ژ رێکا خوە و هەڤوەڵاتیێن کوردستانێ دا راکرین. هەر وەک مە ئاماژە پێکری د دووماهیک هەلبژاردن ژی دا پارتی سۆزا کوردستانەکا بهێز دایە و پشتی بدەستڤەئینانا زۆرترین دەنگێن هەڤوەڵاتیان ژی، د ئێکەم پێنگاڤا چوون بەرەف ئارمانجێ دەستنیشانکرن و بەربژارکرنا کەسەکێ بهێز، لێهاتی و کارێزما بوو بۆ پۆستێ سەرۆکێ هەرێمێ. چونکی سەرۆکێ نوی د کاروانێ خوە یێ حکومڕانیێ دا وەک سەرۆکێ وەزیران لێزانین و لێهاتووییا خوە ب کارێن خوە یێن ئاڤەدانکرن و پێشڤەبرنا کوردستانێدا بۆ هەر کەسی دیارکرینە. سەرۆک وەزریرێن بەرێ و سەرۆکێ هەرێمێ یێ نوی “نێچیرڤان بارزانی” ئەو کەسەیە یێ کو خەلکێ هەرێمێ ب ئەندازیارێ ئاڤەدانکرنێ پێناسە دکەن، ئەو کەسەیە یێ کو ل نەخۆشترین دەمدا ژ بەرپرسایەتیێ نەرەفی و مینا هندەک پارتێن دی نەکری کو ل دەمێ ئاستەنگان خوە ڤەکێشن و ل بەرفرەهیێ ژی بهێنە سەر سفرا ئامادە. ئەو کەسەیە یێ کو ب هەبوونا پەیووەندیێن بهێز ل گەل سەرکردەیێن وەڵاتێن زلهێز ب ناڤ و دەنگ.

ئەڤا مە ئاماژەپێکری نە پێهەلدان و پەسنن، بەلکو ژ بلی خەلکێ هەرێمێ هەتا رۆژنامەڤان، سیاسەتڤانێن وەڵاتێن دەردۆر و بیانی دیدەڤانیێ ل سەر ڤێ چەندێ ددەن. هەر ئەڤ تایبەتمەندیەنە وەکری کو ل دەمێ بەربژارکرنا ناڤهاتی بۆ پۆستێ سەرۆکێ هەرێمێ پڕانییا سیاسەتڤان و چاڤدێرێن سیاسی ڤێ پێنگاڤێ ب جێبەجێکرنا ئێکەم پێنگاڤا چوون بەرەف کوردستانەکا بهێز ل قەلەم بدەن. هەر وەک ئاژانسا سپۆتینکی یا رووسیا د راپۆرتەکێ دا باس دکەت و تێدا هاتییە، نێچیرڤان بارزانی ئەو کەسەیە یێ کو خەلکەکێ زۆر پشتەڤانیا وی دکەن ژبەرکو ل دەمێ شەڕێ ل گەل داعش شیا ل سەر هەمی گیرۆ گرفتێن دارایی و ئابووری زاڵ ببیت. دیسان د راپۆرتێ دا هاتییە و دبێژیت: ل دەمێ هێرشێن بەغدایێ بۆ سەر کەرکووکێ و ئابلۆقە بۆ سەر کوردستانێ زۆربووین نێچیرڤان بارزانی شیا ب پەیوەندیێن خوە یێن دبلۆماسی پەیوەندیێ ل گەل زۆربەیا سەرکردەێێن وەڵاتان بکەت و فشارێ ل سەر بەغدا دروست بکەت کو ڤەگەڕنە دانوستاندنان. د راپۆرتێ دا هاتییە باشترین بژاردەیە بۆ پۆستێ سەرۆکێ هەرێمێ. لەوما دڤێت خەلکێ کوردستانێ یێ گەشبین بیت و گوهـ نەدەتە پۆختانێن بێ بنەما یێن وان پارت و لایەنان یێن هیچ جارەکێ خوە ب بەرپرسیاری هیچ کێماسییەکێ نەرانی و ل دەمێ سەرکەفتنان ژی خوە ب هەڤپشک و قەهرەمان بناڤ کرین.

سەرۆکێ نوی دەمێ د ماوەیێ سەرۆکایەتییا خوە دا وەک سەرۆکێ وەزیران، کوردستان ل چەند گوند، کومەڵگەه، قەزا و باژێڕێن ب ناڤ باژێڕ، کرە کوردستانەکا پڕی ئاڤەدانی. ئەگەر بەراوردەکا بچویک د ناڤبەرا هەرێما کودستانێ ل گەل باژێڕێن دی یێن عیراقێ بکەین “کو عیراق پترە ژ سەدەیەکێ دەولەت و کوردستان چارێک سەدەیەکە د وێ عیراقێ دا خوە ب رێڤەدبەت”. لێ ئاڤەدانی، پێشڤەچوون ل عیراقێ راوەستایە، پێکڤەژیان ل بەر مرنێ یە و چاڵاکڤان و چاڤدێرێن عیراقێ ب خوە دبێژن: ئەو ئاڤەدانی، پێکڤەژیان، پێشڤەچوون و رویێ جوانێ ل هەرێما کوردستانێ هەی ب هیچ رەنگەکی ناهێتە هەڤبەرکرن ل گەل عیراقەکا ڤەمای. بێگۆمان ئەڤە ژی بۆ سەرۆک و سەرۆکێ حکوومەتێ و خەلکێ کوردستانێ دزڤڕیت. لەوما پۆستێ سەرۆکێ هەرێمێ پێدڤی ب نێچیرڤان بارزانی یە ژبۆ وێ ئێکێ ب رێکا ڤی پۆستی هێزێن پێشمەرگەی رێکبێخیت، ئەو پەیوەندیێن دبلۆماسی یێن ل گەل وەڵاتان هەین بهێزتر لێ بکەت، وەکی هەر جار سۆزێن خوە ل گەل هەڤوەڵاتییان بجهـ بینیت، کو کوردستانەکا بهێزە بەرەف بهێزترینێ.

  • نوونەرێ رۆژئارتیکڵ ل ئامێدی

Leave a Comment

پۆستی ئەلیکترۆنییەکەت بڵاوناکرێتەوە. خانە پێویستەکان دەستنیشانکراون بە *

Scroll to Top